ଦାଦନକରି ଗାଁକୁ ଫେରୁଥିବା ଅଧବାଟରେ ଦାଦନ ନିଖୋଜ

୫ମଇ ,୨୦୨୩ (ଓଡ଼ିଶା ତାଜାନ୍ୟୁଜ ) ଆର,ଉଦୟଗିରି :- ନୁଆଗଡ ବ୍ଳକର ପୁଣି ଜଣେ ଘର ଫେରନ୍ତା ଦାଦନ ଶ୍ରମିକଙ୍କ ଅଧା ବାଟରୁ ନିଖୋଜ ହେବା ଘଟଣା ଆଲୋଚନା ସୃଷ୍ଟି କରିଛି । ଚେନ୍ନାଈରୁ ଦାଦନ କାମରୁ ଘରକୁ ଫେରୁଥିବା ବାଟରେ ଗଜପତି ଜିଲ୍ଲା ନୁଆଗଡ ବ୍ଳକ ପୁଟୁରୁପଡା ପଞ୍ଚାୟତର ପାରାଜି ଗ୍ରାମର ଦାଦନ ଶ୍ରମିକ ଲକ୍ଷ୍ମୀକାନ୍ତ ମଣ୍ଡଳ ନିଖୋଜ ହୋଇଥିବା ଅଭିଯୋଗ ହୋଇଛି । ଗତ ୨ ତାରିଖ ଠାରୁ ଲକ୍ଷ୍ମୀକାନ୍ତଙ୍କ ଆଉ କୌଣସି ଖୋଜଖବର ନଥିବା ବେଳେ ଆଜି ପର୍ଯ୍ୟନ୍ତ ସେ ଘରେ ପହଞ୍ଚି ନଥିବା ଜଣାପଡିଛି । ଏ ନେଇ ତାଙ୍କ ପତ୍ନୀ ଗୀତା ମଣ୍ଡଳ ଓ ଭାଇ ସନାତନ ମଣ୍ଡଳ ଗୁରୁବାର ଥାନାରେ ଏତଲା ଦେଇଥିଲେ ।

ଗତ ଦୁଇମାସ ତଳେ କାମଧନ୍ଦା ଅନ୍ବେଷଣରେ ଚେନ୍ନାଈ ଯାଉଥିଲେ ଲକ୍ଷ୍ମୀକାନ୍ତ । ତେବେ ମା ଙ୍କ ସ୍ବାସ୍ଥ୍ୟ ଖରାପ ହେବାରୁ ପତ୍ନୀ ରୀତା ମଣ୍ଡଳ ତାଙ୍କୁ ଫୋନ୍ କରି ଡକାଇଥିଲେ । ତେବେ ପତ୍ନୀ କହିବାନୁଯାୟୀ ଟ୍ରେନ୍ ଯୋଗେ ଆସିବା ବେଳେ ବିଜୟନଗରମ୍ ପର୍ଯ୍ୟନ୍ତ ସେ ସ୍ବାମୀଙ୍କ ସହ ଯୋଗାଯୋଗରେ ଥିଲେ । କିନ୍ତୁ ତା ‘ ପରେ ୨ତାରିଖ ଠାରୁ ତାଙ୍କ ସ୍ବାମୀଙ୍କ ଆଉ କୌଣସି ଖୋଜଖବର ମିଳୁନାହିଁ । ଲକ୍ଷ୍ମୀକାନ୍ତଙ୍କୁ ଫେରାଇ ଆଣିବା ନିମନ୍ତେ ଜିଲ୍ଲା ଶ୍ରମ ଅଧିକାରୀ ସହଯୋଗ କରିବାକୁ ପତ୍ନୀ ରୀତା ନିବେଦନ କରିଛନ୍ତି ।