ସଞ୍ଜୟଙ୍କୁ ବାରମ୍ବାର ଷ୍ଟାର ପ୍ରଚାରକ ତାଲିକାରୁ ବାଦ୍ କାହିଁକି…?

ସଞ୍ଜୟଙ୍କୁ ବାରମ୍ବାର ଷ୍ଟାର ପ୍ରଚାରକ ତାଲିକାରୁ ବାଦ୍ ଦିଆଯାଉଛି କାହିଁକି…?

ସେ କ’ଣ ଆଉ ବିଜେଡି ଶିବିରରେ ନାହାଁନ୍ତି କି…?

ନା ତାଙ୍କୁ ଦଳ କୋଣଠେସା କରିଦେଇଛି…?

୨୦ଏପ୍ରିଲ୍ ,୨୦୨୩ (ଓଡ଼ିଶା ତାଜାନ୍ୟୁଜ ) ଭୁବନେଶ୍ୱର :- ଝାରସୁଗୁଡା ଉପ-ନିର୍ବାଚନ ଲାଗି ରାଜ୍ୟର ଏକ ନମ୍ବର ରାଜନୈତିକ ଦଳ ବିଜେଡି ଷ୍ଟାର ପ୍ରଚାରକ ତାଲିକା ପ୍ରକାଶ କରିଛି । ତାଲିକାରେ ମୁଖ୍ୟମନ୍ତ୍ରୀଙ୍କ ସମେତ ୪୦ଜଣଙ୍କ ନାଁ ପ୍ରକାଶ ପାଇଛି । ଏଥିରେ ଅନେକ ଯୁବନେତା ସ୍ଥାନ ପାଇଥିବା ବେଳେ ପୂର୍ବତନ ମନ୍ତ୍ରୀ ତଥା ବିଜେଡିର ବରିଷ୍ଠ ନେତା ସଞ୍ଜୟ ଦାସବର୍ମାଙ୍କ ନାଁ ନାହିଁ । ଏହା ପୂର୍ବରୁ ମଧ୍ୟ ଧାନନଗର ଓ ପଦ୍ମପୁର ଉପ-ନିର୍ବାଚନ ବେଳେ ତାଙ୍କ ନାଁ ଷ୍ଟାର ପ୍ରଚାରକ ତାଲିକାରେ ନଥିଲା । ତେବେ ସଞ୍ଜୟଙ୍କୁ ବାରମ୍ବାର ଷ୍ଟାର ପ୍ରଚାରକ ତାଲିକାରୁ ବାଦ୍ ଦିଆଯାଉଛି କାହିଁକି…? ସେ କ’ଣ ଆଉ ବିଜେଡି ଶିବିରରେ ନାହାଁନ୍ତି କି…? ନା ତାଙ୍କୁ ଦଳ କୋଣଠେସା କରିଦେଇଛି?

ସଞ୍ଜୟଙ୍କୁ ନେଇ ବିଭିନ୍ନ ଚର୍ଚ୍ଚା ହେଉଥିବା ବେଳେ ବେଶ କିଛିଦିନ ହେଲା ତାଙ୍କୁ ଦଳୀୟ କାର‌୍ୟ୍ୟକ୍ରମରେ ଅଣଦେଖା କରାଯାଉଥିବା ପରିଲକ୍ଷିତ ହେଉଛି । ସେ ମଧ୍ୟ ଆଉ ପୂର୍ବ ଭଳି ଦଳ ପାଇଁ କାମ ମଧ୍ୟ କରୁନାହାନ୍ତିି । କୁହାଯାଉଛି, ପ୍ରଣବ ପ୍ରକାଶ ଦାସ ସାଙ୍ଗଠନିକ ଦାୟିତ୍ୱ ନେବା ପରେ ସଞ୍ଜୟଙ୍କୁ ଦଳରେ ଅଣଦେଖା କରିବା ଆରମ୍ଭ ହୋଇଥିଲା । ଯୋଜନାବୋର୍ଡ ଉପାଧ୍ୟକ୍ଷ ପଦ ଯିବା ପରେ ତାଙ୍କୁ ଆଉ କୌଣସି ପଦପଦବୀ ଦିଆଯାଇନଥିଲା । ଏହାକୁ ନେଇ ସଞ୍ଜୟ ଅସନ୍ତୋଷ ଥିଲେ ।

ଏହା ପରେ ସେ ବ୍ରହ୍ମଗିରିର ଏକ ଦଳୀୟ ସଭାରେ ସେ ଅଣ ଓଡ଼ିଆମାନଙ୍କୁ ଚାଲେଞ୍ଜ କଲେ । କହିଥିଲେ, ଏକ ବିଦେଶୀ ଶକ୍ତି ରତ୍ନ ଭଣ୍ଡାର ଉପରେ ଆଖି ପକେଇଛନ୍ତି । ରାଜ୍ୟର ଖଣି ଉପରେ ସେମାନଙ୍କ ନିଜର ଅଛି । ଏଥର କିନ୍ତୁ ସେମାନଙ୍କୁ ଛଡାଯିବନି । ମୁଁହତୋଡ ଜବାବ ଦିଆଯିବ । ସଞ୍ଜୟଙ୍କ ଏହି ଭାଷଣ ପରେ ତାଙ୍କ ଅସନ୍ତୋଷ ପଦାକୁ ଆସିଥିଲା । ହେଲେ କ’ଣ ହେଲା କେଜାଣି, ଏହା ପରଠାରୁ ସଞ୍ଜୟଙ୍କର ଆଉ କିଛି ସ୍ୱରଶବ୍ଦ ଶୁଭିଲା ନାହିଁ । କିଛିଦିନ ପରେ ପୁଣି ସେ ମୁଖ୍ୟମନ୍ତ୍ରୀଙ୍କୁ ପ୍ରସଂଶା କରୁଥିବା ଦେଖିବାକୁ ମିଳିଲା । ତାଙ୍କୁ ପୁରୀର ଏକ ଦଳୀୟ ସଭାକୁ ଡକାଗଲା, ହେଲେ କହିବାକୁ ସୁଯୋଗ ମିଳିଲାନି ।

ସେହିପରି ନିକଟରେ ସଞ୍ଜୟ ନିଜର ଏକ ୟୁଟ୍ୟୁଭ ଚାନେଲର ଉଦଘାଟନ ଉତ୍ସବ କଲେ । ସେଥିରେ କଂଗ୍ରେସ, ବିଜେପି ନେତାଙ୍କୁ ଡାକି ମଞ୍ଚରେ ବସାଇଲେ । ହେଲେ ବିଜେଡିର କାହାରିବାକୁ ଦେଖିବାକୁ ମିଳିଲାନି । ଏଥିରୁ ଲାଗୁଛି ସଞ୍ଜୟ ବିଜେଡିରେ ଅଛନ୍ତି କିମ୍ବା କୋଣଠେସା ହୋଇଛନ୍ତି । ସେଥିପାଇଁ ତାଙ୍କୁ କୌଣସି ଦଳୀୟ କାର‌୍ୟ୍ୟକ୍ରମ ଦାୟିତ୍ୱ ଦିଆଯାଉ ନାହିଁ । ଅନ୍ୟପକ୍ଷରେ ସଞ୍ଜୟ ବି ପଦ୍ମ ଶିବିର ସହିତ ଯୋଗାଯୋଗରେ ଥିବା ମଧ୍ୟ ଚର୍ଚ୍ଚା ହେଉଛି । କୁହାଯାଉଛି, ସଞ୍ଜୟ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ମଧ୍ୟ ଭେଟି ସାରିଛନ୍ତି । ତେବେ ଦେଖାଯାଉ ସଞ୍ଜୟଙ୍କ ରାଜନୈତିକ କ୍ୟାରିୟର କେଉଁ ଦିଗକୁ ଯାଉଛି । ଆଗାମୀ ୨୦୨୪ ନିର୍ବାଚନରେ ସେ ବିଜେଡି ନା ବିଜେପି ଟିକେଟରୁ ଲଢିବେ, ତାହା ଉପରେ ସମସ୍ତର ନଜର ରହିଛି ।