ହିନ୍ଦୋଳ ଏନଏସି ନିର୍ବାଚନ : ଅନ୍ତିମ ଦିନରେ ଜୋରଦାର ପ୍ରଚାର ସୀମା – ଅଞ୍ଜଳି ଙ୍କ ପାଇଁ ଅଗ୍ନି ପରୀକ୍ଷା ବିଜେଡି – ବିଜେପି ଟକ୍କର , ବିଜେପି ପଲା ଭାରି

୧ ଏପ୍ରିଲ୍ ,୨୦୨୩ (ଓଡ଼ିଶା ତାଜାନ୍ୟୁଜ ) ଢେଙ୍କାନାଳ ଜିଲ୍ଲା ହିନ୍ଦୋଳ :- ଢେଙ୍କାନାଳ ଜିଲ୍ଲା ହିନ୍ଦୋଳ ବିଜ୍ଞାପିତ ଅଂଚଳ ପରିଷଦରେ ଆସନ୍ତା ୩ ତାରିଖ ଦିନ ଭୋଟଗ୍ରହଣ ହେବ । ପ୍ରଚାର ର ଅନ୍ତିମ ଦିବସରେ ଆଜି ଶାସକ ବିଜୁ ଜନତା ଦଳ ସମେତ ବିରୋଧୀ ବିଜେପି ଓ କଂଗ୍ରେସ ଦଳ ତରଫରୁ ଭୋଟରଙ୍କୁ ଆକୃଷ୍ଟ କରିବାକୁ ତିନି ଦଳ ଜୋରଦାର ପ୍ରଚାର କରିଥିଲେ । ବିଜେଡି ତରଫରୁ ଢେଙ୍କାନାଳ ସଦର ବିଧାୟକ ସୁଧୀର କୁମାର ସାମଲ (ନିଧି ବାବୁ)ଙ୍କ ସହିତ ହିନ୍ଦୋଳ ବିଧାୟିକା ସୀମାରାଣୀ ନାୟକ, ସାଂସଦ ମହେଶ ସାହୁ , ତାଳଚେର ବିଧାୟକ ବ୍ରଜ କିଶୋର ପ୍ରଧାନ, ଓଡାପଡା ବ୍ଲକ ଅଧ୍ୟକ୍ଷ , ହିନ୍ଦୋଳ ବ୍ଲକ ଅଧ୍ୟକ୍ଷ ,ପୂର୍ବତନ ବ୍ଲକ ଅଧ୍ୟକ୍ଷ ପ୍ରିୟ ରଂଜନ ମାହୁନ୍ତ , ଢେଙ୍କାନାଳ ଜିଲ୍ଲା ପରିଷଦ ଅଧ୍ୟକ୍ଷା ଅର୍ଚ୍ଚନା ପୁହାଣ ,ସରପଂଚ , ସମିତିସଭ୍ୟ ,ଜିଲ୍ଲା ପରିଷଦ ସଭ୍ୟ ଙ୍କ ସମେତ ସାରା ଜିଲ୍ଲା ତଥା ପଡୋଶୀ ଜିଲ୍ଲାର ବିଜେଡି କାର୍ଯ୍ୟକର୍ତା ମାନେ ପୂର୍ବ ସ୍ଥିତି ବଜାୟ ରଖିବା ପାଇଁ ସାହି ସାହି ଓ ଘର କୁ ଘର ବୁଲି ବିକାଶ ପାଇଁ ବିଜେଡି ପ୍ରାର୍ଥୀ ଙ୍କୁ ଭୋଟ ଦେଇ ଜୟଯୁକ୍ତ କରିବାକୁ ଭୋଟରଙ୍କୁ ନିବେଦନ କରୁଛନ୍ତି । ବିରୋଧୀ ବିଜେପି ତରଫରୁ ପୂର୍ବତନ ରାଜ୍ୟସଭା ସାଂସଦ ରୁଦ୍ର ନାରାୟଣ ପାଣି , ପୂର୍ବତନ ମନ୍ତ୍ରୀ ଅଂଜଳି ବେହେରା ଙ୍କ ନେତୃତ୍ୱରେ ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ର , ଗଁନ୍ଦିଆ ବ୍ଲକର ପୂର୍ବତନ ଅଧ୍ୟକ୍ଷ ମଳୟ ସିଂହ , ସୁନୀଲ ଶର୍ମା ପ୍ରମୁଖ ସାହି ସାହି ରେ ଶୋଭାଯାତ୍ରା ଓ ପଥପ୍ରାନ୍ତ ସଭା କରି ଭୋଟରଙ୍କୁ ଆକୃଷ୍ଟ କରିବାରେ ଲାଗିପଡିଛନ୍ତି । ବିଜେଡି ଓ ବିଜେପି ଉଭୟ ଦଳ ବିକାଶ ନାମରେ ଭୋଟ ସଂଗ୍ରହ କରୁଥିବା ବେଳେ କଂଗ୍ରେସ ଦଳ ରାଜ୍ୟ ଓ କେନ୍ଦ୍ର ସରକାରଙ୍କ ଏକଛତ୍ରବାଦ ନୀତି ଓ ଦୁର୍ନିତି ବିରୋଧରେ ସଚେତନ କରି ପ୍ରଚାର କରୁଛି ।ବିଜେଡି ଓ ବିଜେପି ସମସ୍ତ ୧୬ ଟି ୱାର୍ଡରେ ପ୍ରାର୍ଥୀ ଦେଇଥିବା ବେଳେ କଂଗ୍ରେସ ୧୪ ଟି ୱାର୍ଡରେ କାଉନସିଲର ପ୍ରାର୍ଥୀ ଦେଇଛି । ୪ ଜଣ ସ୍ୱାଧୀନ କାଉନସିଲର ପ୍ରାର୍ଥୀ ପ୍ରତିଦ୍ୱନ୍ଦିତାରେ ଅବତୀର୍ଣ୍ଣ ହୋଇଛନ୍ତି । ବିଜେଡି ର କେଶବ ପ୍ରଧାନ , ବିଜେପି ର ଶୋଭାଗିନି ବେହେରା, କଂଗ୍ରେସ ର ରୀତା ପଲେଇ ଚେୟାରମ୍ୟାନ ପଦବୀ ପାଇଁ ପ୍ରତିଦ୍ୱନ୍ଦିତା କରୁଛନ୍ତି । ୧୬ ଟି ୱାର୍ଡର ସମୁଦାୟ ୯୮୬୩ ଜଣ ଭୋଟରଙ୍କ ମଧ୍ୟରୁ ୫୦୪୬ ଜଣ ପୁରୁଷ ଓ ୪୮୧୭ ଜଣ ମହିଳା ଆସନ୍ତା ୩ ତାରିଖ ଦିନ ସେମାନଙ୍କ ପ୍ରତିନିଧି ଓ ନୂତନ ନଗରପାଳ ଚୟନ କରିବେ ।ହିନ୍ଦୋଳ ବାସୀ ପ୍ରଥମ ଥର ପାଇଁ ପ୍ରତ୍ୟକ୍ଷ ଭାବେ ଚେୟାରମ୍ୟାନ ବାଛିବେ । ଅଧ୍ୟକ୍ଷ ପଦବୀ ପାଇଁ ଆଉ ପୂର୍ବଭଳି ଘୋଡା ବେପାର ନଥିବାରୁ ଶାସକ ଦଳ ପାଇଁ ଅଡୁଆ ସୃଷ୍ଟି ହୋଇଛି । ହିନ୍ଦୋଳ ଏନଏସି ଗଠନ ହେବା ପରେ ୨୦୧୩ ମସିହା ପ୍ରଥମ ନିର୍ବାଚନରେ ନିଧି ବାବୁ ଙ୍କ ନେତୃତ୍ୱରେ କଂଗ୍ରେସ ଦଳ ଅଧ୍ୟକ୍ଷ ହୋଇଥିବା ବେଳେ ୨୦୧୮ ମସିହାରେ ପୁନଶ୍ଚ ନିଧି ବାବୁ ଙ୍କ ଜରିଆରେ ବିଜେଡି ଅଧ୍ୟକ୍ଷ ପଦ ହାତେଇ ଥିଲା । ନିଧି ବାବୁ ୨ ଥର ଦୁଇଟି ଦଳ ରୁ ଅଧ୍ୟକ୍ଷ ବସାଇଥିବା ବେଳେ ଚଳିତ ଥର ହ୍ୟାଟ୍ରିକ ଲକ୍ଷ୍ୟରେ ଦିନରାତି ଏକ କରିଦେଇଛନ୍ତି । କଂଗ୍ରେସ ପ୍ରାର୍ଥୀ ରୀତା ପଲେଇ ପୂର୍ବରୁ ବିଜେଡି ସହାୟତାରେ ଥରେ ସରପଂଚ ଓ ଥରେ କାଉନସିଲର ହୋଇଥିବା ବେଳେ ଚଳିତ ଥର ଦଳ ବଦଳ କରି କଂଗ୍ରେସ ତରଫରୁ ଅଧ୍ୟକ୍ଷା ପ୍ରାର୍ଥୀ ହୋଇ ବିଜେଡି ପାଇଁ ମୁଣ୍ଡ ବ୍ୟଥାର କାରଣ ସାଜିଛନ୍ତି । ତେବେ ମୋଟ ଉପରେ ଦେଖିବାକୁ ଗଲେ ପ୍ରକୃତ ଲଢେଇ ବର୍ତମାନର ବିଧାୟିକା ସୀମାରାଣୀ ନାୟକ ଓ ପୂର୍ବତନ ବିଧାୟିକା ତଥା ପୂର୍ବତନ ମନ୍ତ୍ରୀ ଅଂଜଳି ବେହେରା ଙ୍କ ମଧ୍ୟରେ ହେଉଛି । ଉଭୟ ଙ୍କ ପାଇଁ ଏହି ନିର୍ବାଚନ ଅଗ୍ନି ପରୀକ୍ଷା ପାଲଟିଛି । ଆସନ୍ତା ସାଧାରଣ ନିର୍ବାଚନ ପୂର୍ବରୁ ଏନଏସି ନିର୍ବାଚନ ସେମିଫାଇନାଲ ମ୍ୟାଚ ବୋଲି କୁହାଯାଉଛି । ୨୦୧୯ ରେ ସୀମା ଦ୍ୱିତୀୟ ଥର ବିଧାୟିକା ହେବା ପରଠାରୁ ସର୍ବଦା ଭୁବନେଶ୍ୱରରେ ରହି ଖୋସାମତିଆ କର୍ମୀଙ୍କୁ କେବଳ କାମ ବାଣି୍ଟ ପିସି ଆଦାୟରେ ବ୍ୟସ୍ତ ଥିବା ବେଳେ ପୂର୍ବତନ ମନ୍ତ୍ରୀ ଅଂଜଳି ବେହେରା ଲୋକଙ୍କ ସୁଖ ଦୁଃଖ , ହାନି ଲାଭ ରେ ପାଖରେ ଛିଡା ହୋଇଥିବାରୁ ଅଂଜଳି ଙ୍କ ପ୍ରତି ଅଧିକା ଜନସମର୍ଥନ ସ୍ପଷ୍ଟ ବାରିହୋଇପଡୁଛି । ଫଳରେ ଆଜିର ଦିନରେ ବିଜେପି ସ୍ଥିତି ମଜବୁତ ରହିଥିବା ଲକ୍ଷ୍ୟ କରାଯାଉଛି । ଶେଷରେ କେବଳ ଏତିକି କୁହାଯାଇପାରିବ କି ନିଧି ଙ୍କ ନିଧି (ଟଙ୍କା) ଯଦି କାମ କଲା ତାହେଲେ ବିଜେଡି ବାଜି ମାରିନେଇପାରେ ।