ହିଞ୍ଜିଳିରେ ଅନଲାଇନ ପ୍ଲାଟଫର୍ମରେ ଅଭିଯୋଗ”ମୋ ନିବେଦନ”

ଓଡ଼ିଶା ତାଜା ନ୍ୟୁଜ ( ୧୮ ଜୁଲାଇ ରବିବାର ) ହିଞ୍ଜିଳିକାଟୁ :- ରାଜ୍ୟ ସରକାରଙ୍କ କୋଭିଡ ନିୟମ ଅନୁଯାୟୀ ଗଞ୍ଜାମ ଜିଲ୍ଲା ପ୍ରଶାସନ ପକ୍ଷରୁ ସର୍ଵ ପ୍ରଥମେ ଆରମ୍ଭ ହୋଇଛି ଅନଲାଇନ ପ୍ଲାଟଫର୍ମରେ ଜନ ଅଭିଯୋଗର ପ୍ରତିକାର ବ୍ୟବସ୍ଥା”ମୋ ନିବେଦନ” । ରାଜ୍ୟ ସରକାରଙ୍କ ଦ୍ୱାରା ସ୍ୱତନ୍ତ୍ର ଭାବେ ପରିଚାଳିତ ୫ ଟି ପଦ୍ଧତି ଆଧାରରେ ଜିଲ୍ଲାବାସୀଙ୍କୁ ବିଭିନ୍ନ ପ୍ରକାର ସାମାଜିକ ଅଭିଯୋଗର ସମୟାନୁବର୍ତ୍ତୀ ସମାଧାନ ବ୍ୟବସ୍ଥା ସ୍ୱରୂପ ଏକ ନୂତନ ପଦକ୍ଷେପକୁ ସର୍ବ ପ୍ରଥମେ ଆରମ୍ଭ କରିଥିଲା ଗଞ୍ଜାମ ଜିଲ୍ଲା ପ୍ରଶାସନ ।ରାଜ୍ୟରେ ସର୍ଵପ୍ରଥମେ ଗଞ୍ଜାମ ଜିଲ୍ଲାରେ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେଙ୍କ ଉଦ୍ୟମ କ୍ରମେ ଆରମ୍ଭ ହୋଇଥିଲା “ମୋ ନିବେଦନ” ନାମକ ଏକ ଜନଆଦୃତ ଅଭିଯୋଗ ପ୍ରତିକାର ବ୍ୟବସ୍ଥା । ଜିଲ୍ଲାରେ ଏହାର ସଫଳତା ଓ ବାସ୍ତବତାକୁ ଉପଲବ୍ଧି କରି ଗଞ୍ଜାମ ଜିଲ୍ଲା ପ୍ରଶାସନ ପକ୍ଷରୁ ଏହାକୁ ପୁଣି ଥରେ ଉପଯୋଗ ଓ କାର୍ଯ୍ୟକାରୀ କରାଯାଇଛି । ଗତ ଜୁନ ୨୬ ତାରିଖରୁ ଜିଲ୍ଲାରେ ପ୍ରଥମ କରି ଅନଲାଇନ ପ୍ଲାଟଫର୍ମରେ ମୋ ନିବେଦନ କାର୍ଯ୍ୟକାରୀ ହେବା ଆରମ୍ଭ କରିଛି ଗଞ୍ଜାମ ଜିଲ୍ଲା ପ୍ରଶାସନ ।

ମାସର ପ୍ରତି ଶନିବାର ପଞ୍ଚାୟତ ସ୍ତରରେ ଏବଂ ପ୍ରତି ସୋମବାର ବ୍ଳକ ସ୍ତରରେ ଏହି କାର୍ଯ୍ୟକ୍ରମ ଆୟୋଜିତ କରିବା ପାଇଁ ବିଡ଼ିଓ,ତହସିଲଦାର ଓ ପୌର ପ୍ରଶାସନକୁ ଜିଲ୍ଲା ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି । ଏହି ପରିପ୍ରେକ୍ଷୀରେ ଶନିବାର ତୃତୀୟ ପର୍ଯ୍ୟାୟ ରେ ବିଡ଼ିଓ ସୁବ୍ରତ କୁମାର ଜେନାଙ୍କ ତତ୍ତ୍ୱାବଧାନରେ ସ୍ଥାନୀୟ ହିଞ୍ଜିଳି ବ୍ଳକର ସାରୁ,ଗଣ୍ଡଳା, ଧୋବାଡି ଓ ସାହାପୁର ଆଦି ୪ ଟି ପଞ୍ଚାୟତରେ ଆରମ୍ଭ ହୋଇଥିଲା ଅନ ଲାଇନରେ ମୋ ନିବେଦନ କାର୍ଯ୍ୟକ୍ରମ । ରାଜ୍ୟ ସରକାରଙ୍କ ଦ୍ୱାରା କାର୍ଯ୍ୟକାରୀ ହେଉଥିବା ସାମାଜିକ ନିରାପତ୍ତା,ଖାଦ୍ୟ ସୁରକ୍ଷା,ଆବାସ ଯୋଜନା,ମୁଖ୍ୟମନ୍ତ୍ରୀ ଙ୍କ ଆର୍ଥିକ ସହାୟତା ପାଣ୍ଠି ଭଳି ବିଭିନ୍ନ ଜନ ହିତକର ଯୋଜନାରେ ୯୧ ଜଣ ଅନ ଲାଇନ ବ୍ୟବସ୍ଥାରେ ମୋ ନିବେଦନ ଅଭିଯୋଗ କରିଥିଲେ । ଏଥି ମଧ୍ୟରୁ ସାରୁରେ ୩୦ଜଣ,ଗଣ୍ଡଳାରେ ୨୮ଜଣ, ଧୋବାଡି ରେ ୮ ଓ ସାହାପୁର ପଞ୍ଚାୟତରେ ୩୦ ଜଣ ଆବେଦନକାରୀ ଖାଉଟି କାର୍ଡ, ଆବାସ ଗୃହ,ବାର୍ଦ୍ଧକ୍ୟ ଭତ୍ତା ଓ ଅନ୍ୟାନ୍ୟ ଆର୍ଥିକ ସହାୟତା ପାଇଁ ସର୍ବମୋଟ ୯୧ ଜଣ ଅଭିଯୋଗ କରିଥିଲେ ।

ବ୍ଳକ କାର୍ଯ୍ୟାଳୟ ପକ୍ଷରୁ ବିଡ଼ିଓ ସୁବ୍ରତ କୁମାର ଜେନା, ତହସିଲଦାର ସୁବ୍ରତ କୁମାର ପରିଡା, ଏବିଡ଼ିଓ ଅରୁଣ କୁମାର ପ୍ରଧାନ,ଗଣ୍ଡଳା ସହକାରୀ କୃଷି ଅଧିକାରୀ ଅମର ପ୍ରସାଦ ସାହୁ ଓ ଯୋଗାଣ ନିରୀକ୍ଷକ ପୁରଞ୍ଜୟ ସାହୁ ପ୍ରମୁଖ ଉପସ୍ଥିତ ଥିଲେ । ସାରୁ ପଞ୍ଚାୟତରେ ପିଇଓ ଏସ. ରାଜେଶ,ହିସାବ ଅଧିକାରୀ ଦିବ୍ୟସିଂହ ନାୟକ,ଗଣ୍ଡଳାରେ ପିଇଓ ନବୀନ ଚନ୍ଦ୍ର ମହାରଣା, ଜିପିଇଓ ପ୍ରଶାନ୍ତ କୁମାର ରଥ, ଧୋବାଡିରେ ପିଇଓ ମଧୁସୂଦନ ବିଷୋୟୀ ଓ ସାହାପୁରରେ ପିଇଓ ବି.ହରି,ସରପଞ୍ଚ ରମା ଦାସ,ଗୌରୀ ସାହୁ,ସହଦେଵ ବେହେରା, ଜିଲ୍ଲା ପରିଷଦ ସଭ୍ୟ ଦୁର୍ଗା ମାଧବ ମହାନ୍ତି, ଅଜିତ ପାତ୍ର,ସୁଧାଂଶୁ କୁମାର ସାହୁ, ରାମଚନ୍ଦ୍ର ସାହୁ ,ଜିଆରଏସ ଓ ଅନ୍ୟାନ୍ୟ କର୍ମଚାରୀ ଉପସ୍ଥିତ ଥିଲେ । ଆବେଦନ ହୋଇଥିବା ୯୧ ଟି ମଧ୍ୟରୁ ୧୮ଟି ଅଭିଯୋଗର ସମାଧାନ ହୋଇଥିଲା ବେଳେ ଅବଶିଷ୍ଟ ୭୩ ଟି ଅଭିଯୋଗର କ୍ଷେତ୍ରୀୟ ଅନୁସନ୍ଧାନ ଓ ପ୍ରକୃତ ପର୍ଯ୍ୟବେକ୍ଷଣ ହୋଇ ସମାଧାନ କରାଯିବ ବୋଲି ବିଡ଼ିଓ ଶ୍ରୀ ଜେନା ସୂଚନା ଦେଇଛନ୍ତି ।‌  ( ରିପୋର୍ଟ – ଶୁସାନ୍ତ ପ୍ରଧାନ )