ମଧ୍ୟପ୍ରଦେଶର (ଓଡିଶା ତାଜା ନ୍ୟୁଜ୍ ) ମଧ୍ୟପ୍ରଦେଶର ତା-9.3.2020 :- କଂଗ୍ରେସର ବରିଷ୍ଠ ନେତା ଜ୍ୟୋତିରାଦିତ୍ୟ ସିନ୍ଧିଆଙ୍କ ସମର୍ଥକ 20 ବିଧାୟକ ପହଞ୍ଚିଛନ୍ତି ବିଜେପି ଶାସିତ ରାଜ୍ୟ କର୍ଣ୍ଣାଟକରେ । ଯାହା ପରେ ମଧ୍ୟ ପ୍ରଦେଶ ସହ ଦେଶର ରାଜନୀତିରେ ସୃଷ୍ଟି ହୋଇଛି ଝଡ଼ । ଏହା ପରେ ପ୍ରଶ୍ନ ଉଠୁଛି ଯେ କ’ଣ ଆରମ୍ଭ ହେଲା କି କମଳ ନାଥ ସରକାରଙ୍କ ଉପରେ ‘ଅପରେଶନ କମଳ’ ? ଭାଙ୍ଗିଯିବେ କି ‘ନାଥ ସରକାର’ ? ପୁଣିଥରେ ସଫଳ ହେବ କି ‘ଅପରେଶନ କମଳ’ ? ଶାହଙ୍କ ଗୋଟି ଚାଳନା ଆଗରେ ଛତ୍ରଭଙ୍ଗ ଦେବେ କି କମଳ ନାଥ ? ନା ନିଜ ଲୋକଙ୍କ ବିଶ୍ୱାସଘାତକର ଶିକାର ହେବେ କମଳ ନାଥ । ମଧ୍ୟ ପ୍ରଦେଶର ବର୍ତ୍ତମାନ ରାଜନୈତିକ ପରିସ୍ଥିତି ଦେଖି ଏପରି ଅନେକ ପ୍ରଶ୍ନର ଉଦ୍ରେକ ହେଉଛି । ଏହା ମଧ୍ୟରେ ଖବର ମିଳୁଛି ଜ୍ୟୋତିରାଦିତ୍ୟ ସିନ୍ଧିଆ ବିଜେପିରେ ସାମିଲ ହୋଇପାରନ୍ତି । ରିପୋର୍ଟ ଅନୁଯାୟୀ, ବେଙ୍ଗାଲୁରୁରେ ପହଞ୍ଚିଥିବା ବିଧାୟକଙ୍କ ମଧ୍ୟରେ ମଧ୍ୟପ୍ରଦେଶ ସରକାରଙ୍କ 6 ଜଣ ମନ୍ତ୍ରୀ ମଧ୍ୟ ସାମିଲ ଅଛନ୍ତି । ଗୋଟିଏ ପଟେ ମଧ୍ୟପ୍ରଦେଶରେ ରାଜନୈତିକ ସଙ୍କଟ ଶିଖରରେ ପହଞ୍ଚି ଥିବା ବେଳେ ଅନ୍ୟ ପଟେ ଜ୍ୟୋତିରାଦିତ୍ୟ ସିନ୍ଧିଆ ଦିଲ୍ଲୀ ଆସି ପହଛନ୍ତି ।
ଗତ କିଛି ଦିନ ମଧ୍ୟରେ ମଧ୍ୟପ୍ରଦେଶରେ ରାଜନୈତିକ ପରିଦୃଶ୍ୟରେ କ୍ରମାଗତ ଦ୍ରୁତ ପରିବର୍ତ୍ତନ ଜାରି ରହିଛି । ପିଟିଆଇ ଅନୁଯାୟୀ ମୁଖ୍ୟମନ୍ତ୍ରୀ କମଲ ନାଥ ଦିଲ୍ଲୀ ଗସ୍ତ ଶେଷ କରି ଭୋପାଳକୁ ଫେରି ଜରୁରୀକାଳୀନ କ୍ୟାବିନେଟ ବୈଠକ କରୁଛନ୍ତି । ମାର୍ଚ୍ଚ 26ରେ ହେବାକୁ ଥିବା ରାଜ୍ୟସଭା ନିର୍ବାଚନ ପୂର୍ବରୁ ବିଧାୟକଙ୍କ ବିଦ୍ରୋହୀ ମନୋଭାବ ରାଜ୍ୟ ରାଜନୀତିକୁ ସରଗରମ କରିଦେଇଛି । ମଧ୍ୟପ୍ରଦେଶର କମଲ ନାଥ ସରକାର ସାମାନ୍ୟ ସଂଖ୍ୟାଗରିଷ୍ଠତା ଆଧାରରେ ସରକାର ପରିଚାଳନା କରୁଛନ୍ତି । ଏଭଳି ପରିସ୍ଥିତିରେ ଏବେ ସରକାରଙ୍କ ଅସ୍ତିତ୍ୱ ଉପରେ ପ୍ରଶ୍ନ ଉଠିଛି । ସୂତ୍ରରୁ ମିଳିଥିବା ସୂଚନା ଅନୁଯାୟୀ କଂଗ୍ରେସ ନେତୃତ୍ୱ ଜ୍ୟୋତିରାଦିତ୍ୟ ସିନ୍ଧିଆଙ୍କୁ ମନାଇବା ପାଇଁ ପ୍ରୟାସ ଆରମ୍ଭ କରି ଦେଇଛନ୍ତି ଏବଂ ତାଙ୍କୁ ମଧ୍ୟପ୍ରଦେଶ କଂଗ୍ରେସ କମିଟିର ସଭାପତି କରିବାକୁ ପ୍ରସ୍ତାବ ଦିଆଯାଇପାରେ । ଡିସେମ୍ବର ୨୦୧୮ରେ ମୁଖ୍ୟମନ୍ତ୍ରୀ ପଦ ପାଇଁ ୪୯ ବର୍ଷର ସିନ୍ଧିଆ ରେସରେ ପଛରେ ରହି ଯାଇଥିଲେ । ସେତେବେଳେ ସେ କେବଳ ୨୩ ଜଣ ବିଧାୟକଙ୍କ ସମର୍ଥନ ପାଇପାରିଥିଲେ । ଅନ୍ୟପକ୍ଷେ ସେ ମଧ୍ୟପ୍ରଦେଶରେ କଂଗ୍ରେସର ବିଜୟରେ ପ୍ରମୁଖ ଯୋଗଦାନ ଦେଇଥିଲେ । କମଳ ନାଥ ମୁଖ୍ୟମନ୍ତ୍ରୀ ହୋଇଥିଲେ, ଦଳର ରାଜ୍ୟ ୟୁନିଟ୍ ଉପରେ ମଧ୍ୟ ତାଙ୍କର ନିୟନ୍ତ୍ରଣ ଥିଲା । ରାଜ୍ୟରେ ଚାଲିଥିବା ରାଜନୈତିକ ସଙ୍କଟକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ କମଳ ନାଥ ସୋମବାର ଦିନ ଦଳର ମୁଖ୍ୟ ସୋନିଆ ଗାନ୍ଧୀଙ୍କୁ ଭେଟିଥିଲେ । ଏହା ପରେ କହିଥିଲେ ଯେ ସବୁ ଠିକ୍ ଅଛି । କିନ୍ତୁ ସେଠାରେ ଥିବା ସରକାରରେ ସବୁକିଛି ଠିକ୍ ଚାଲିଥିବା ପରି ମନେ ହେଉନାହିଁ । କ’ଣ କହୁଛି ମଧ୍ୟ ପ୍ରଦେଶ ବିଧାନସଭାର ଗଣିତ ମଧ୍ୟପ୍ରଦେଶରେ 230 ଟି ବିଧାନସଭା ଆସନ ଅଛି ଏବଂ ବର୍ତ୍ତମାନ 2 ଜଣ ବିଧାୟକଙ୍କ ନିଧନ ଯୋଗୁଁ ବିଧାନସଭାରେ 228 ଜଣ ବିଧାୟକ ଅଛନ୍ତି । କଂଗ୍ରେସରେ 114 ଜଣ ବିଧାୟକ ଅଛନ୍ତି । ୪ଟି ନିର୍ଦଳୀୟ ବିଧାୟକଙ୍କ ବ୍ୟତୀତ ଏଥିରେ 2 ବିଏସପି (ଗୋଟିଏ ଦଳରୁ ନିଲମ୍ବିତ) ଏବଂ ଗୋଟିଏ ସମାଜବାଦି ପାର୍ଟି(ଏସପି) ବିଧାୟକଙ୍କ ସମର୍ଥନ ରହିଛି । ଏଭଳି ପରିସ୍ଥିତିରେ କମଲ ନାଥ ସରକାରଙ୍କୁ 121 ଜଣ ବିଧାୟକଙ୍କ ସମର୍ଥନ ରହିଛି । ଅନ୍ୟପକ୍ଷରେ ଭାରତୀୟ ଜନତା ପାର୍ଟିରେ 107 ଜଣ ବିଧାୟକ ଅଛନ୍ତି । 230 ସଦସ୍ୟ ବିଶିଷ୍ଟ ବିଧାନସଭାରେ ସଂଖ୍ୟାଗରିଷ୍ଠତା ପ୍ରମାଣ କରିବାକୁ 116 ଜଣ ବିଧାୟକଙ୍କ ସମର୍ଥନ ଆବଶ୍ୟକ । କଂଗ୍ରେସ ଶିବିରର ସଙ୍କଟକୁ ଦୃଷ୍ଟିରେ ରଖି ରାଜ୍ୟ ବିଜେପି ସକ୍ରିୟ ହୋଇପାରିଛି । ମଙ୍ଗଳବାର ହୋଲି ହୋଇଥିଲେ ମଧ୍ୟ ବିଜେପି ବିଧାନସଭା ଦଳର ଏକ ବୈଠକ ଡାକିଛି । ମଙ୍ଗଳବାର ସନ୍ଧ୍ୟା 7 ଟାରେ ଭୋପାଳରେ ବିଜେପି ବିଧାୟକ ଦଳର ବୈଠକ ଅନୁଷ୍ଠିତ ହେବାକୁ ଯାଉଛି । ଅନ୍ୟପକ୍ଷେ ଗୃହମନ୍ତ୍ରୀ ଅମିତ ଶାହ ବିଜେପି ନେତାଙ୍କ ସହ ଆଜି ସନ୍ଧ୍ୟାରେ ବୈଠକ କରିଛନ୍ତି ବୋଲି ସୂଚନା ରହିଛି ।
