ବାଲିପାଟଣା ବ୍ଲକ ପ୍ରାଥମିକ ବିଦ୍ୟାଳୟର ଶିକ୍ଷକଙ୍କୁ ଦରମା ମିଳୁନଥିବାରୁ ଶିକ୍ଷକ ମହଲରେ ତୀବ୍ର ଅସନ୍ତୋଷ

ବାଲିପାଟଣା (ଓଡିଶା ତାଜା ନ୍ୟୁଜ) ନି. ପ୍ର :- ରାଜ୍ୟ ସରକାର ତଥା ଶିକ୍ଷା ବିଭାଗର ବେପରୁଆ ମନୋଭାବ ଯୋଗୁଁ ଖୋର୍ଦ୍ଧା ଜିଲ୍ଲା ବାଲିପାଟଣା ବ୍ଲକ ପ୍ରାଥମିକ ବିଦ୍ୟାଳୟର ଶିକ୍ଷକମାନଙ୍କୁ ଏକ ମାସ ଧରି ସମୟ ବିତି ଯାଇଥିଲେ ସୁଦ୍ଧା ତାଙ୍କୁ ଦରମା ମିଳୁନଥିବାରୁ ସେଥି ନେଇ ଶିକ୍ଷକ ମହଲରେ ତୀବ୍ର ଅସନ୍ତୋଷ ଓ ପ୍ରତିକ୍ରିୟା ଦେଖା ଦେଇଛି । ପ୍ରାଥମିକ ବିଦ୍ୟାଳୟର ଶିକ୍ଷକମାନେ ପ୍ରତି ମାସର ୩୦ ତାରିଖ ଦିନ ବ୍ଲକରୁ ଦରମା ପାଇ ଥାଆନ୍ତି। କିନ୍ତୁ ବଡ ଦୁଃଖର ବିଷୟ ତାଙ୍କୁ ଏପର୍ଯ୍ୟନ୍ତ ଦରମା ମିଳି ପାରିନାହିଁ ।

ଏ ନେଇ ବାଲିପାଟଣା ବ୍ଲକ ପ୍ରାଥମିକ ଶିକ୍ଷକ ସଂଘ ପକ୍ଷରୁ ଶୀଘ୍ର ଦରମା ପ୍ରଦାନ କରିବା ପାଇଁ ଜିଲ୍ଲା ଶିକ୍ଷା ଅଧିକାରିଣୀ ଖୋର୍ଦ୍ଧାଙ୍କୁ ଏକ ଲିଖିତ ଅଭିଯୋଗ କରାଯାଇଛି । କିନ୍ତୁ ଅଦ୍ୟାବଧି ତାଙ୍କୁ ଦରମା ମିଳିପାରି ନାହିଁ । ସେଥି ପାଇଁ ଶିକ୍ଷକମାନେ ଦୁଃଖ ପ୍ରକାଶ କରି କହିଛନ୍ତି ଯେ ଆଗକୁ ରଜ ପର୍ବ ଥିବାରୁ ଦରମାକୁ ପ୍ରତ୍ୟେକ ଶିକ୍ଷକ, ଶିକ୍ଷୟିତ୍ରୀମାନେ ଚାଇଁରହିଛନ୍ତୀ। ଦରମା ପାଇଲେ ନିଜ ନିଜର ଖର୍ଚ୍ଚ ସମେତ EMI ଓ ଅନ୍ୟାନ ଖର୍ଚ୍ଚ ମେଣ୍ଟାଇବେ ।

ଏଠାରେ ସୂଚନା ଯୋଗ୍ୟ ଯେ ଓଡିଶା ସରକାରଙ୍କ ସ୍କୁଲ ଆଣ୍ଡ ଗଣଶିକ୍ଷା ବିଭାଗର ଚିଠି ନମ୍ୱର ୧୩୨୩୮- ୨୫/୦୫/୨୦୨୬/ ତାରିଖ ଅନୁଯାଇ ବାଲିପାଟଣା ବ୍ଲକ ଶିକ୍ଷାଧିକାରୀ ( ବିଇଓ) ଡ ପ୍ରଭାତ କୁମାର ରଥ ଙ୍କୁ ବାଲେଶ୍ଵର ଜିଲ୍ଲା ରେମୁଣା କୁ ବଦଳି କରାଯାଇଥିଲେ ମଧ୍ୟ ଦେଖାଯାଇଛି ଯେ ବିଇଓ ଶ୍ରୀ ରଥ ଫୋନ ଜରିଆରେ ବିଭିନ୍ନ କାର୍ଯ୍ୟ ପାଇଁ ଶିକ୍ଷକଙ୍କୁ ମେସେଜ ପଠାଉଛନ୍ତି ।

ଅଥଚ ଶ୍ରୀ ରଥ ଦରମା ପ୍ରଦାନ କରିବାରେ କାହିଁକି ଟାଳଟୁଳ ନୀତି ଅବଲମ୍ବନ ଗ୍ରହଣ କରୁଛନ୍ତି ବୋଲି ଏବେ ପ୍ରଶ୍ନବାଚୀ ସୃଷ୍ଟି କରିଛି । ଏହି ବାଲିପାଟଣା ବ୍ଲକ ଶିକ୍ଷା ବିଭାଗକୁ ତୁରନ୍ତ ନୂତନ ବିଇଓଙ୍କୁ ନିଯୁକ୍ତି ପ୍ରଦାନ ପାଇଁ ଏବେ ବିଭିନ୍ନ ମହଲରେ ଦାବୀ କରାଯାଇଅଛି । ରାଜ୍ୟ ସରକାର ତଥା ଶିକ୍ଷା ବିଭାଗୀୟ ଅଧିକାରୀ ଏଥି ପ୍ରତି ତୁରନ୍ତ ଦୃଷ୍ଟି ଦେଇ ଶିକ୍ଷକମାନଙ୍କୁ ଶୀଘ୍ର ଦରମା ପ୍ରଦାନ କରିବାକୁ ଶିକ୍ଷକ ସଂଘ ପକ୍ଷରୁ ନିବେଦନ କରାଯାଇଛି ।