ପୁରୀ (ଓଡ଼ିଶା ତାଜା ନ୍ୟୁଜ୍) ନି. ପ୍ର :- ଶ୍ରୀମନ୍ଦିର କାର୍ଯ୍ୟାଳୟ ସଭାଗୃହରେ ଶନିବାର ପୂର୍ବାହ୍ନରେ ଶ୍ରୀଜଗନ୍ନାଥ ମନ୍ଦିର ପରିଚାଳନା କମିଟିର ଗୁରୁତ୍ବପୂର୍ଣ ବୈଠକ ଅନୁଷ୍ଠିତ ହୋଇଯାଇଛି । ଏଥିରେ କମିଟିର ସ୍ଥାୟୀ ସଭାପତି ଗଜପତି ଦିବ୍ଯସିଂହ ଦେବ ମହାରାଜା ଅଧ୍ୟକ୍ଷତା କରିଥିଲେ । ବୈଠକ ସମ୍ପର୍କରେ ଶ୍ରୀମନ୍ଦିର ମୁଖ୍ଯ ପ୍ରଶାସକ ଡ.ଅରବିନ୍ଦ ପାଢ଼ୀ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଖୁବଶୀଘ୍ର ରତ୍ନଭଣ୍ଡାର ଅଳଙ୍କାର ଗୁଡିକ ଗଣତିମଣତି ଓ ଡିଜିଟାଲାଇଜେସନ ରେକର୍ଡ ରଖାଯିବ ।
ଏ ସମ୍ପର୍କରେ ୧୧ପୃଷ୍ଠାର ମାର୍ଗଦର୍ଶିକା ଆଲୋଚନା କରାଯାଇଛି । ଏହାକୁ ରାଜ୍ଯ ସରକାରଙ୍କ ନିକଟକୁ ପଠାଯିବ । ରାଜ୍ଯ ସରକାରଙ୍କ ନିଷ୍ପତ୍ତି ପରେ ଗଣତିମଣତି ତାରିଖ ସମୟ ନିର୍ଘଣ୍ଟ କରାଯିବ । ପ୍ରତିଦିନ ଠାକୁରଙ୍କ ନିତିକାନ୍ତି ସମୟକୁ ଦେଖି ଗଣତି ର ସମୟ ସାରଣୀ ପ୍ରସ୍ତୁତ ହେବ । ସୁରକ୍ଷା ବ୍ଯବସ୍ଥାକୁ ବଢାଯିବ । ଆଦର୍ଶ ଗୁରୁକୁଳ ସୋସାଇଟି ସମ୍ପର୍କରେ ମଧ୍ଯ ଆଲୋଚନା କରାଯାଇଥିଲା । ସେବାୟତ କୂଳର ପିଲାମାନଙ୍କ ପାଇଁ ମୂଲ୍ଯବୋଧ ଭିତ୍ତିକ ଶିକ୍ଷା ସମ୍ପର୍କରେ ଆଲୋଚନା ହୋଇଥିଲା । ବିର୍ଲା କମ୍ପାନୀ ସହ ହୋଇଥିବା ଏମଓୟୁ ବାତିଲ କରାଯାଇ ନୂଆ ସଂସ୍ଥାକୁ ଦିଆଯିବା ପାଇଁ ଆଲୋଚନା ହୋଇଥିଲା ।
ଗୁରୁକୁଳ ପାଇଁ ଯାଗା ଠିକ ହୋଇଥିବା ବେଳେ ଓବିସିସି ଅବଢା ଯୋଜନାରେ ଏହାକୁ ନିର୍ମାଣ କରିବ । ଶ୍ରୀଜୀଉଙ୍କ ନୂତନ ରତ୍ନ ପଲଙ୍କ ନିର୍ମାଣ କରାଯାଇ ରଖାଯାଇଛି । ଶୁଭ ବେଳା ଧାର୍ଯ୍ଯ କରାଯାଇ ଏହା ମହାପ୍ରଭୁଙ୍କ ଲାଗି ପାଇଁ ବ୍ଯବହାର କରାଯିବ । ଶ୍ରୀଗୁଣ୍ଡିଚା ମନ୍ଦିରକୁ ନିଲାମ ଦିଆଯିବ ନାହିଁ । ପ୍ରଶାସନ ଏହି କାର୍ଯ୍ୟ ବୁଝିବ । ଭକ୍ତଙ୍କ ପ୍ରବେଶ ଶୁକ୍ଳ ୧୦ଟଙ୍କା ରଖାଯିବ । ଯୋତା, ଛତା ମୋବାଇଲ ପ୍ରଶାସନର ଷ୍ଟାଣ୍ଡରେ ଭକ୍ତ ରଖିପାରିବେ । ୮୦ ବର୍ଷରୁ ଊର୍ଦ୍ଧ୍ବ ଭକ୍ତ, ଦିବ୍ଯାଙ୍ଗ ଓ ଶିଶୁ ମାନଙ୍କୁ ପ୍ରବେଶ ଶୁକ୍ଳ ଛାଡ କରାଯିବ ।
