ପାରଦ ଖସୁଛି, ସାହି ଗଳିରେ ଜମୁଛି ନିଆଁ ପୁଆଁ ଆସର

ହିଞ୍ଜିଳିକାଟୁ  (ଓଡ଼ିଶା ତାଜା ନ୍ୟୁଜ୍) (ନି. ପ୍ର) :- ଗତ କିଛି ଦିନ ଧରି ଜାଡରେ ଥରୁଛି ହିଞ୍ଜିଳିକାଟୁ ସହର ଓ ଆଖପାଖ ଅଞ୍ଚଳ। ଦୈନିକ ସର୍ବନିମ୍ନ ତାପମାତ୍ରା ପ୍ରାୟତଃ ୧୩ – ୨୩ ଡିଗ୍ରୀ ମଧ୍ୟରେ ରହୁଛି । କାଁ ଭାଁ ଖରା ଅନୁଭୂତ ହେଉଥିବା ବେଳେ ଦିନସାରା ପାଗ ପାଉଁଶିଆ । ଚଳିତ ବର୍ଷର ଏଭଳି ହାଡ଼ ଭଙ୍ଗା ଶୀତର ପ୍ରକୋପ ସାଧାରଣ ଲୋକଙ୍କ ଠାରୁ ପଶୁ ପକ୍ଷୀଙ୍କୁ ମଧ୍ଯ କଲବଲ କଲାଣି । ଶୀତର ପ୍ରକୋପରୁ ବର୍ତ୍ତିବା ପାଇଁ ସ୍ୱଚ୍ଛଳ ବର୍ଗର ଲୋକେ ପାଦରୁ ମୁଣ୍ଡ ଯାଏଁ ଆବଶ୍ୟକତାକୁ ଦୃଷ୍ଟିରେ ରଖି ଶୀତବସ୍ତ୍ର ପରିଧାନ କରିଥାନ୍ତି ।

ଯୁବ ସମ୍ପ୍ରଦାୟ ବୁଟ୍ ଓ ଟ୍ରାକ ସୁଟ ସହ ଟୋପି ପରିଧାନ କରି ପ୍ରାତଃ ଭ୍ରମଣରେ ବ୍ୟସ୍ତ ରହୁଥିବା ବେଳେ ବୟସ୍କ ଲୋକେ ସାଲ, ସୁଇଟର ଓ ଧୋତି ପିନ୍ଧି ସକାଳୁଆ ଚା ପିଇବାରେ ମଜ୍ଜା ନିଅନ୍ତି। ଏସବୁ ଭିତରେ ମଫସଲ ଗାଁରେ ବସବାସ କରୁଥିବା ସରଳ ଲୋକେ ନିଜ ଖେତ ବାଡିରୁ ଫସଲ ଆଦାୟ ପାଇଁ ପ୍ରସ୍ତୁତ ହୁଅନ୍ତି। ମୁଣ୍ଡରେ ଗାମୁଛା ଓ ଦେହରେ ଚାଦର ଘୋଡେ଼ଇ ହୋଇ ସାହି ପଡୋଶୀଙ୍କୁ ଡାକି ହାକି ଗାଁ ଛକ ନିକଟରେ ମେଳି ବାନ୍ଧନ୍ତି । କୋଉଠୁ କାଠ, ପାଳ, ଗୋବର ଘଷି ଓ କାଗଜ ପତ୍ର ସଂଗ୍ରହ କରି ନିଆଁ ପ୍ରସ୍ତୁତ କରିବାରେ ବ୍ୟସ୍ତ ରୁହନ୍ତି ।

ପାଖକୁ ପାଖ ବସି ମେଳିବାନ୍ଧି ନିଆଁର ଧୁନିରେ ହାତ ପୁଇଁ ଧୀରେ ଧୀରେ ମଜା ଉଠାନ୍ତି। ଏଭଳି ସ୍ଥିତିରେ ଥଣ୍ଡା କାକରକୁ ଅଧିକ ଉପଭୋଗ କରିବା ପାଇଁ କିଏ ବିଡି, କିଏ ସିଗାରେଟ, ନାଶ, କିଏ ଚା ଓ କିଏ ଗୁଟଖା ସେବନ କରି କିଛି ସମୟ ଅତିବାହିତ କରନ୍ତି।ଗାଁ ଗହଳରେ କିଛି ଦିନ ଧରି ସାହି ସାହିରେ ଆରମ୍ଭ ହୋଇଥିବା ଏଭଳି କିଛି ଦୃଶ୍ୟ ସେମାନଙ୍କ ପିଲା ଦିନର ପୁରୁଣା ସ୍ମୃତିକୁ ବହନ କରିଛି । ଗାଁ ଗହଳିର କୋଳାହଳ ପରିବେଶରେ ମଧ୍ୟରେ ଭାଇଚାରା,ଗାଁ ରାଜନୀତି ଓ ସଂଗଠନ ବିଷୟରେ ମଧ୍ଯ ଆଲୋଚନାର ପ୍ରସଙ୍ଗ ପାଲଟିଛି । ଏ ବିଷୟରେ ହିଞ୍ଜିଳି ବ୍ଲକ ପୋଡିଙ୍ଗି ଗ୍ରାମର ସମାଜସେବା ଶଙ୍କର ବେହେରା ସାଙ୍ଗ ସାଥିଙ୍କ ଗହଣରେ ନିଆଁ ପୂଆଁର ଖୁସି ନିଆରା ବୋଲି ସେ କହିଛନ୍ତି ।