୮୯ତମ ସଂସ୍କୃତି ଚର୍ଚ୍ଚା ସମାରୋହ : ଓଡ଼ିଶା ରାଜ୍ୟ ଅଭିଲେଖାଗାର – ଭୁବନେଶ୍ୱର ପ୍ରାଚୀନ ଇତିହାସରେ ଓଡ଼ିଆଙ୍କ ସ୍ୱାକ୍ଷର (ଏକ ସାଂସ୍କୃତିକ ଅନୁଶୀଳନ)

ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) (ନି.ପ୍ର ) :- ଓଡ଼ିଶା ରାଜ୍ୟ ଅଭିଲେଖାଗାରରେ ୮୯ତମ ସଂସ୍କୃତି ଚର୍ଚ୍ଚା ସମ୍ପାନ ସମାରୋହ ଅନୁଷ୍ଠିତ ହୋଇଯାଇଅଛି । ଉକ୍ତ ଉତ୍ସବରେ ମୁଖ୍ୟ ବକ୍ତା ଭାବରେ ଯୋଗଦାନ କରିଥିଲେ ବରିଷ୍ଠ ଆଇନଜୀବୀ, କବି, ଲେଖକ ତଥା ସାହିତ୍ୟିକ ଶ୍ରୀଯୁକ୍ତ ଚନ୍ଦ୍ର ବିଜୟୀ ମିଶ୍ର । ସଂପାନରେ ସମ୍ମାନନୀୟ ଅତିଥି ଭାବରେ ଯୋଗ ଦାନ କରିଥିଲେ ଉପଶାସନ ସଚିବ, ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଶ୍ରୀମତୀ ସଙ୍ଘମିତ୍ରା ବେହେରା । ସମ୍ପାନରେ ସ୍ୱାଗତ ଭାଷଣ ଦେଇଥିଲେ ଓଡ଼ିଶା ରାଜ୍ୟ ଅଭିଲେଖାଗାରର ଅଧୀକ୍ଷକ ଡ. ଶେଖ୍ ସୋଲେମାନ ଅଲ୍ଲୀ ଏବଂ ଧନ୍ୟବାଦ ଅର୍ପଣ କରିଥିଲେ ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ଅନୁଶାସନ ସଚିବ ତଥା ସ୍ୱତନ୍ତ୍ର କାର୍ଯ୍ୟ ନିର୍ବାହୀ ଅଧିକାରୀ ଶ୍ରୀମତୀ ବନାନୀ ମହାପାତ୍ର ।ଉକ୍ତ ଆଲୋଚନା ଚକ୍ରରେ ଶ୍ରୀଯୁକ୍ତ ମନୋରଞ୍ଜନ ପାଣିଗ୍ରାହୀ, ପ୍ରଫେସର ଅଶୋକ କୁମାର ପଟ୍ଟନାୟକ, ଡ. ଅନାମ ବେହେରା, ଡ. ସତ୍ୟନାରାୟଣ ମିଶ୍ର ଏବଂ ବହୁ ମାନ୍ୟଗନ୍ୟ ବ୍ୟକ୍ତି ଓ ଛାତ୍ରଛାତ୍ରୀ ଉପସ୍ଥିତ ଥିଲେ । ସମ୍ପାନର ମୁଖ୍ୟ ବକ୍ତା ଶ୍ରୀଯୁକ୍ତ ଚନ୍ଦ୍ର ବିଜୟୀ ମିଶ୍ର କହିଥିଲେ ଯେ ଓଡ଼ିଆ ମାନେ ହିଁ ମହାଭାରତୀୟ ଜାତୀୟ ଚେତନାର ଜନ୍ମଦାତା । ଓଡିଆ ମାନେ ହିଁ ସମନ୍ୱୟ-ସଦ୍ଭାବନା-ସଂପ୍ରୀତି ଓ ଶାନ୍ତିର ବାର୍ତ୍ତା ଦେଇଆସିଛନ୍ତି । ଓଡିଆ ମାନେ ମୁକ୍ତିକାମୀ ଚେତନାର ଅଗ୍ରଦୂତ ଓ ମହାମାନବୀୟ ଚିନ୍ତା-ଚେତନାରେ ଜଗତକୁ ଉଦବୁଦ୍ଧ କରିଆସିଛନ୍ତି । ଶିକ୍ଷା ଓ ଜ୍ଞାନ ବିଜ୍ଞାନ କ୍ଷେତ୍ରରେ ଭାରତକୁ ଓ ବିଶ୍ୱକୁ ଶୁଣାଇଥିଲେ ଅମୃତର ବାର୍ତ୍ତା ।

ବହିର୍ବାଣିଜ୍ୟ ମାଧ୍ୟମରେ- ଆପଣାକୁ ସମୃଦ୍ଧ କରିବା ସହ ମାନବ ସମାଜକୁ ଶିଖାଇଥିଲେ “ସହଯୋଗ ହିଁ ସମୃଦ୍ଧି’। ପୃଥିବୀର ପ୍ରଥମ ବୌଦ୍ଧଥିଲେ ଓଡ଼ିଆ । ମହାବୀରଙ୍କ ବିଜୟ ଚକ୍ର୍ର ପ୍ରବର୍ତ୍ତନର ସ୍ଥାନ ଥିଲା ଓଡ଼ିଶା । କରକଣ୍ଡୁ ଓ ଖାରବେଳଙ୍କ ପରି ସମ୍ରାଟମାନେ ଓଡ଼ିଆ ଜାତିର ପ୍ରତିନିଧିତ୍ତ୍ୱ କରି ଜଗତକୁ କହିଯାଇଛନ୍ତି- ସବୁକ୍ଷେତ୍ରରେ (ଯୁଦ୍ଧ, କଳା, ସାହିତ୍ୟ, ଧର୍ମ ଓ ଶାନ୍ତି) ଓଡ଼ିଆମାନେ ଅଗ୍ରଦୂତ ।ପ୍ରକୃତରେ ପ୍ରାଚୀନ ଓଡ଼ିଶା ଥିଲା ଏକ ଅତୁଳନୀୟ ଭୂଖଣ୍ଡ ଓ ପ୍ରାଚୀନ ଓଡ଼ିଆମାନେ ଥିଲେ ବସୁଧୈବ କୁଟୁମ୍ବକମ୍ ମନ୍ତ୍ରର ବାହକ । ସମ୍ପାନର ସମ୍ମାନନୀୟ ଅତିଥି ବିଭାଗୀୟ ଉପଶାସନ ସଚିବ ଶ୍ରୀମତୀ ସଂଙ୍ଘମିତ୍ରା ବେହେରା ସଂପାନ ଅବସରରେ ସମସ୍ତ ବୁଦ୍ଧିଜୀବି, ଐତିହାସିକ, ବିଶ୍ୱବିଦ୍ୟାଳୟର ଅଧ୍ୟାପକ, ପ୍ରାଧ୍ୟାପକ, ଛାତ୍ରଛାତ୍ରୀ, ଗବେଷକ ଏବଂ ପତ୍ରକାରମାନଙ୍କୁ ସ୍ୱାଗତ କରିବା ସହ ଅଭିବାଦନ ଜଣାଇଥିଲେ । ପରିଶେଷରେ ବିଷୟ ସମ୍ବନ୍ଧୀୟ ପ୍ରଶ୍ନୋତ୍ତର କାର୍ଯ୍ୟକ୍ରମ କରାଯାଇ ସମ୍ପାନ ସାଙ୍ଗ କରାଯାଇଥିଲା ।