ଭାରତ ପ୍ରସିଦ୍ଧ ଦଶପଲ୍ଲା ଲଙ୍କାପୋଡ଼ି ଯାତ୍ରାପାଇଁ ଚୂଡାନ୍ତ ବୈଠକ

ଦଶପଲ୍ଲା  (ଓଡ଼ିଶା ତାଜା ନ୍ୟୁଜ୍) :- ଚଳିତବର୍ଷ ଶ୍ରୀ ରଘୁନାଥ ଜୀଉଙ୍କ ପ୍ରସିଦ୍ଧ ଲଙ୍କାପୋଡ଼ି ଯାତ୍ରା ଓ କୁଆଁରିଆ ମହୋତ୍ସବ ପୂର୍ବାପେକ୍ଷା ଅଧିକ ସରସ ସୁନ୍ଦର ଓ ଲୋକାଭିମୁଖୀ ହେବ। ଲଙ୍କାପୋଡ଼ି ଯାତ୍ରା କମିଟି ପକ୍ଷରୁ ଶ୍ରୀ ରଘୁନାଥ ଜୀଉଙ୍କ ମନ୍ଦିର ପରିସରରେ ସନ୍ଧ୍ୟାରେ ଅନୁଷ୍ଠିତ ଗୁରୁତ୍ୱପୂର୍ଣ୍ଣ ବୈଠକରେ ଏହି ନିଷ୍ପତି ଗ୍ରହଣ କରାଯାଇଥିବା ଜଣାପଡ଼ିଛି।ଯାତ୍ରା କମିଟିର ସଭାପତି ତଥା କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀଙ୍କ ଅଧ୍ୟକ୍ଷତାରେ ବୈଠକ ଆରମ୍ଭ ହୋଇଥିଲା ।

ଏହି ବୈଠକରେ ସ୍ଥାନୀୟ ବିଧାୟକ ରମେଶଚନ୍ଦ୍ର ବେହେରା ,ଚଳିତବର୍ଷ ଲଙ୍କାପୋଡ଼ି ଯାତ୍ରା ଓ କୁଆଁରୀଆ ମହୋତ୍ସବକୁ ସରସ ସୁନ୍ଦର ତଥା ଲୋକାଭିମୁଖୀ କରିବା ପାଇଁ ଆଲୋଚନା କରିଥିଲେ । ଯାତ୍ରା କମିଟିର କର୍ମକର୍ତ୍ତା ଓ ସଭ୍ୟମାନେ ନିଜନିଜ ମତାମତ ଉପସ୍ଥାପନ କରିଥିଲେ । ଯାତ୍ରାରେ ପ୍ରବଳ ଜନସମାଗମ କୁ ଆଖି ଆଗରେ ରଖି ଆଇନଶୃଙ୍ଖଳା ରକ୍ଷା ପାଇଁ ନୟାଗଡ଼ ଜିଲ୍ଲା ପ୍ରଶାସନ ବ୍ୟାପକ ବ୍ୟବସ୍ଥା ଗ୍ରହଣ କରିବ ।

ଦଶପଲ୍ଲା ଥାନାଧିକାରୀ ଶାନ୍ତିଶୃଙ୍ଖଳା ରକ୍ଷାପାଇଁ ପଦକ୍ଷେପ ନେବେ ବୋଲି ସୂଚନା ଦେଇଛନ୍ତି।ବଣିକ ମହାସଂଘ ପକ୍ଷରୁ ରାମ ନବମୀ ଦିନ ଦଶପଲ୍ଲାର ସମସ୍ତ ଆମିଷ ବଜାର ବନ୍ଦ ରଖାଯିବ । ମହାସଂଘର ସଭାପତି ଅଲେଖ ସାହୁ ଏହି ସୂଚନା ଦେଇଛନ୍ତି । ଯଦି କୌଣସି ଆମିଷ ବ୍ୟବସାୟୀ ଏହାକୁ ଅବମାନନା କରନ୍ତି ସଂଘର ନିୟମ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରୀ ସାହୁ କହିଛନ୍ତି ।
ବୈଠକରେ ଦଶପଲ୍ଲା ତହସିଲଦାର ସ୍ମୃତି ରଞ୍ଜନ ଶତପଥୀ, ଏବିଡ଼ିଓ ସାରଦା ପ୍ରସନ୍ନ ମହାନ୍ତି, ବିଦ୍ୟୁତ ବିଭାଗ ଏସଡ଼ିଓ ତନ୍ମୟ କୁମାର ପୃଷ୍ଟି, ଥାନାଧିକାରୀ ଅନିତା ସାହୁ, ପୂର୍ବତନ ବ୍ଲକ ଅଧ୍ୟକ୍ଷ ଉପେନ୍ଦ୍ର କୁମାର ସାହୁ, ଯାତ୍ରା କମିଟିର ସମ୍ପାଦକ ସୂର୍ଯ୍ୟମଣୀ ଦାସଙ୍କ ସମେତ ସହ – ସମ୍ପାଦକ ଅଞ୍ଜନ ଦାସ ଓ ସୁଶାନ୍ତ କୁମାର ସୀଠ, କୋଷାଧ୍ୟକ୍ଷ ଭବାନୀ ପ୍ରସାଦ ମିଶ୍ର, କୁଆଁରୀଆ ମହୋତ୍ସବ ସମ୍ପାଦକ କିଶୋର ଚନ୍ଦ୍ର ସାହୁ, ହାଡ଼ିବନ୍ଧୁ ମହାଖୁଡ଼, ସାଂସଦଙ୍କ ବ୍ଲକ ପ୍ରତିନିଧି କିଶୋର ଚନ୍ଦ୍ର ଦଳବେହେରାଙ୍କ ସମେତ ସ୍ଥାନୀୟ ଅଂଚଳର ବହୁ ବୁଦ୍ଧିଜୀବୀ ଓ ମାନ୍ୟଗଣ୍ୟ ବ୍ୟକ୍ତିବିଶେଷ ଉପସ୍ଥିତ ଥିଲେ ।