ରାଜଭବନ ପରିବାର ପକ୍ଷରୁ ରାଜ୍ୟପାଳଙ୍କୁ ବିଦାୟ ସମ୍ବର୍ଦ୍ଧନା ସମସ୍ତଙ୍କ ସହଯୋଗରେ ଓଡ଼ିଶାବାସୀଙ୍କ ସେବା କରିଛି – ରାଜ୍ୟପାଳ

୨୬ ଡିସେମ୍ବର ୨୦୨୪ (ଓଡ଼ିଶା ତାଜା ନ୍ୟୁଜ୍ )  ଭୁବନେଶ୍ୱର  :-> ରାଜ୍ୟପାଳ ପଦ ଏକ ସାମ୍ବିଧାନିକ ପଦ । ସମ୍ବିଧାନର ପରିଧି ମଧ୍ୟରେ ରହି ସରକାରଙ୍କ ବିଭିନ୍ନ ଜନକଲ୍ୟାଣକାରୀ କାର୍ଯ୍ୟକ୍ରମର ସୁଫଳ ଯେପରି ଜନସାଧାରଣଙ୍କ ନିକଟରେ ପହଂଚିପାରିବ ସେଥିପାଇଁ ସର୍ବଦା ଚେଷ୍ଟା କରିଛି ବୋଲି ବିଦାୟୀ ରାଜ୍ୟପାଳ ଶ୍ରୀ ରଘୁବର ଦାସ କହିବା ସହିତ ସମସ୍ତଙ୍କ ସହଯୋଗରେ ଓଡ଼ିଶାବାସୀଙ୍କ ସେବା କରିଛି ବୋଲି ସେ ପ୍ରକାଶ କରିଛନ୍ତି । ଆଜି ରାଜଭବନର ନ୍ୟୁ ଅଭିଷେକ ହଲ୍‌ଠାରେ ରାଜଭବନ ପରିବାର ପକ୍ଷରୁ ରାଜ୍ୟପାଳଙ୍କୁ ବିଦାୟ ସମ୍ବର୍ଦ୍ଧନା ପ୍ରଦାନ ପାଇଁ ଆୟୋଜିତ ଏକ ବିଶେଷ କାର୍ଯ୍ୟକ୍ରମରେ ସେ ରାଜ୍ୟପାଳ ଦାୟିତ୍ୱ ଗ୍ରହଣର ପ୍ରଥମ ଚାରିମାସ ମଧ୍ୟରେ ରାଜ୍ୟର ୩୦ଟି ଜିଲ୍ଲା ଗସ୍ତ କରି ତୃଣମୂଳସ୍ତରରେ ଜନସାଧାରଣଙ୍କ ସହ ଯୋଡ଼ି ହେବା ପାଇଁ ଓ ସେମାନଙ୍କର ଅଭାବ ଅସୁବିଧା ଦୂର କରିବା ପାଇଁ ସେ ପ୍ରାଥମିକତା ଦେଇଥିଲେ ଓ ଏହା ତାଙ୍କୁ ଅଶେଷ ଆତ୍ମସନ୍ତୋଷ ପ୍ରଦାନ କରିଥିଲା ବୋଲି ସେ କହିଥିଲେ ।

ଓଡ଼ିଶା ଏକ ଶାନ୍ତିପ୍ରିୟ ରାଜ୍ୟ, ପ୍ରକୃତିର ଆଶୀର୍ବାଦ ଏଠାରେ ବିବିଧ ରୂପରେ ପରିଲକ୍ଷିତ ହୁଏ, ଜନସାଧାରଣ ବେଶ୍ ମେଳାପୀ ଏବଂ ଏଠାରେ ବିକାଶର ଅପାର ସମ୍ଭାର ରହିଛି ବୋଲି ରାଜ୍ୟପାଳ କହିଥିଲେ । ରାଜ୍ୟର ଜନସାଧାରଣଙ୍କ ରାଜଭବନ ଉପରେ ଯଥେଷ୍ଟ ଆସ୍ଥା ଓ ବିଶ୍ୱାସ ରହିଛି । ସେମାନଙ୍କର ଅସୁବିଧା ଦୂର କରିବା ପାଇଁ ରାଜଭବନରେ କାର୍ଯ୍ୟରତ ଅଧିକାରୀ ଏବଂ କର୍ମଚାରୀମାନେ ସର୍ବଦା ଚେଷ୍ଟା କରିବା ସହିତ ନିଜର କାର୍ଯ୍ୟ ଦ୍ୱାରା ରାଜଭବନର ଗାରିମା ବଢ଼ାଇବା ପାଇଁ ଯତ୍ନଶୀଳ ରହିବାକୁ ସେ ସମସ୍ତଙ୍କୁ କହିଥିଲେ ।

ନିଜର ଚିନ୍ତାଧାରାରେ ପରିବର୍ତ୍ତନ ଆଣି ଜନସାଧାରଣଙ୍କ ପାଇଁ କିଛି ଉତମ କାର୍ଯ୍ୟ କରିବାର ଅଛି ବୋଲି ହୃଦୟଙ୍ଗମ କରିବା ସହ ପ୍ରତ୍ୟେକ ନିୟମକାନୁନ୍ ମଧ୍ୟରେ ରହି କାର୍ଯ୍ୟ କରି ଅପାର ଶାନ୍ତି ଓ ସନ୍ତୋଷ ଲାଭ କରିବା ପାଇଁ ଚେଷ୍ଟିତ ହେବାକୁ ସେ ପରାମର୍ଶ ଦେଇଥିଲେ । ମହାପ୍ରଭୁ ଜଗନ୍ନାଥଙ୍କ ପବିତ୍ର ଭୂମି ଓଡ଼ିଶା ରାଜ୍ୟରେ ଚଉଦ ମାସ ସେବା କରିବାର ସୁଯୋଗ ପାଇ ସେ ନିଜକୁ ଧନ୍ୟ ମନେ କରୁଛନ୍ତି ଏବଂ ନିଜ ଜନ୍ମଭୂମି ଓ କର୍ମଭୂମି ଝାଡ଼ଖଣ୍ଡ ରାଜ୍ୟକୁ ଏବେ ପ୍ରତ୍ୟାବର୍ତ୍ତନ କରୁଛନ୍ତି ବୋଲି ରାଜ୍ୟପାଳ ପ୍ରକାଶ କରିଥିଲେ ।

ଏହି କାର୍ଯ୍ୟକ୍ରମରେ ଉପସ୍ଥିତ ରହି ରାଜ୍ୟପାଳଙ୍କ ମୁଖ୍ୟ ପରାମର୍ଶଦାତା ଶ୍ରୀ ସନ୍ତୋଷ କୁମାର ଶତ୍‌ପଥୀ ବିଦାୟୀ ରାଜ୍ୟପାଳଙ୍କ ସହିତ ଝାଡ଼ଖଣ୍ଡ ରାଜ୍ୟରେ ଦୀର୍ଘ ବର୍ଷ କାର୍ଯ୍ୟ କରିବାର ଅନୁଭୂତି ବର୍ଣ୍ଣନା କରିବା ସହିତ ଜନସାଧାରଣଙ୍କର ସେବାକୁ ସେ ବିଭିନ୍ନ ପଦପଦବୀରେ ରହି ଏପରି କି ମୁଖ୍ୟମନ୍ତ୍ରୀ ପଦରେ ରହିବା ସମୟରେ ସର୍ବଦା ଅଗ୍ରାଧିକାର ଦେଉଥିଲେ ବୋଲି କହିଥିଲେ । ରାଜ୍ୟପାଳଙ୍କ ପ୍ରମୁଖ ସଚିବ ଶ୍ରୀ ଏନବିଏସ ରାଜପୁତ ରାଜ୍ୟପାଳଙ୍କ ଦୂରଦୃଷ୍ଟି ଏବଂ ଆଗ୍ରହ ଦୃଷ୍ଟିରୁ ପୁରୀ ଏବଂ ଭୁବନେଶ୍ୱରସ୍ଥିତ ରାଜଭବନରେ ଆବଶ୍ୟକତାକୁ ଲକ୍ଷ୍ୟ ରଖି ନୂତନ ନିର୍ମାଣ ପ୍ରକଳ୍ପମାନ କାର୍ଯ୍ୟକାରୀ କରାଯାଉଛି ଏବଂ ଏହା ରାଜଭବନ ପାଇଁ ବେଶ୍‌ ଉପଯୋଗୀ ହେବ ବୋଲି କହିଥିଲେ ।

ରାଜ୍ୟପାଳଙ୍କ ବ୍ୟକ୍ତିଗତ ସଚିବ ଶ୍ରୀ ହିମାଂଶୁ ନାରାୟଣ ପଟ୍ଟନାୟକ, ରାଜ୍ୟପାଳଙ୍କ ଏଡ଼ିସି ଶ୍ରୀ ଚିନ୍ମୟ କୁମାର ନାୟକ ଓ ଲେଫ୍ଟନାଂଟ୍ କମୋଡ଼ର ଶ୍ରୀ ନିତିନ ତ୍ରିପାଠୀ ମଧ୍ୟ ଉଦ୍‌ବୋଧନ ଦେଇଥିଲେ । ଏହି ଅବସରରେ ରାଜଭବନ ପରିବାର ପକ୍ଷରୁ ପ୍ରମୁଖ ସଚିବ ଶ୍ରୀ ରାଜପୁତ ସମସ୍ତଙ୍କ ଭଲ ପାଇବାର ପ୍ରତୀକ ସ୍ୱରୂପ ତାରକସୀ କାର୍ଯ୍ୟର ଏକ ସୁନ୍ଦର ଉପହାର ବିଦାୟୀ ରାଜ୍ୟପାଳଙ୍କୁ ପ୍ରଦାନ କରିବା ସହ ଆଗାମୀ ଦିନ ପାଇଁ ଅନେକ ଶୁଭେଚ୍ଛା ଓ ଶୁଭକାମନା ଜଣାଇଥିଲେ । ଏହି କାର୍ଯ୍ୟକ୍ରମରେ ରାଜଭବନର ସମସ୍ତ ଅଧିକାରୀ ଏବଂ କର୍ମଚାରୀ ଉପସ୍ଥିତ ଥିଲେ ।