“ଖୁସିର ଉତ୍ସ” କବିତା ପାଠ ଓ ଆଲୋଚନା

୨୦ ଏପ୍ରିଲ, ୨୦୨୪ (ଓଡ଼ିଶା ତାଜା ନ୍ୟୁଜ୍ ) ବେଗୁନିଆ  :->  ବେଗୁନିଆ ବ୍ଲକ ବୋତଳମା ପଞ୍ଚାୟତ  ଅନ୍ତର୍ଗତ ଅଠରାଙ୍ଗ ଗ୍ରାମର ଶ୍ରୀ ରାଧାମୋହନ ଦେବ ସତଶିକ୍ଷା କେନ୍ଦ୍ର ଆନୁକୂଲ୍ୟରେ ଏକ ସାରସ୍ୱତ ସଭା ଅନୁଷ୍ଠିତ ହୋଇଯାଇଛି ।  ଶନିବାର ଅପରାହ୍ନରେ ଗ୍ରାମର ଆରାଧ୍ୟ ଠାକୁର ଶ୍ରୀ ରାଧାମୋହନ ଦେବଙ୍କ ମନ୍ଦିର ପ୍ରାଙ୍ଗଣରେ ଅନୁଷ୍ଠିତ ” ଖୁସିର ଉତ୍ସ ” ଶୀର୍ଷକ କବିତା ପାଠ ଓ ଆଲୋଚନାରେ ଅନୁଷ୍ଠାନର ସଭାପତି ନାଟ୍ୟ ନିର୍ଦ୍ଦେଶକ ଡ. ବନବିହାରୀ ମହାପାତ୍ର ପୌରୋହିତ୍ୟ କରିଥିଲେ । ଶିକ୍ଷକ ଲକ୍ଷ୍ମୀଧର ମହାପାତ୍ରଙ୍କ ମଙ୍ଗଳା ଚରଣ ପାଠ ସହ ପୀଠାଧୀଶ ପ୍ରଭୁ ରାଧାମୋହନଙ୍କ ପୂଜାର୍ଚ୍ଚନା ହୋଇଥିଲା ।

କାର୍ଯ୍ୟକ୍ରମ ସଂଯୋଜକ ପ୍ରଫେସର ରବୀନ୍ଦ୍ର ନାଥ ପାଣିଗ୍ରାହୀ ସ୍ୱରଚିତ ଆବାହନୀ ସଙ୍ଗୀତ ” ଖୁସି ତୁ ଯାଆନା ରୁଷି ” ଗାନ କରିଥିଲେ । ଏଥିରେ ପୂର୍ବତନ ପ୍ରଶାସନିକ ଅଧିକାରୀ ସୁଧାକର ସାମନ୍ତରାୟ ଓ ବାଗ୍ମୀ ଡାକ୍ତର ଅମରେନ୍ଦ୍ର ନାଥ ମହାପାତ୍ର ଓ କବି ବଳରାମ ରଣସିଂହ ପ୍ରମୁଖ ଅତିଥି ରୂପେ ଯୋଗଦେଇ କେବଳ ପାର୍ଥିବ ଆବଶ୍ୟକତାର ପରିପୂର୍ତ୍ତିରେ ଖୁସି ମିଳେନାହିଁ, ଏଥିପାଇଁ ମନୁଷ୍ୟକୁ ନିଜ ଆଧୁନିକ କାର୍ଯ୍ୟଶୈଳୀରେ ପରିବର୍ତ୍ତନ ଆଣି ପ୍ରକୃତ ଆନନ୍ଦକୁ ଉପଲବ୍ଧି କରିବାକୁ ପଡିବ ।

ଆୟୋଜିତ କବିତା ପାଠରେ ଶିକ୍ଷାବିତ ଶରତ କୁମାର ପଣ୍ଡା, କବିକେତନ ଗୌର ଚରଣ ସାମନ୍ତସିଂହାର, କବି ବସନ୍ତ କୁମାର ସାହୁ, ଅଶ୍ୱିନୀ ପଟ୍ଟନାୟକ ଓ କବୟିତ୍ରୀ ଗୀତାଞ୍ଜଳି ମହାପାତ୍ର ପ୍ରମୁଖ ଅଂଶ ଗ୍ରହଣ କରିଥିଲେ । ଏହି ଅବସରରେ ନାଟ୍ୟନିର୍ଦ୍ଦେଶକ ଡ. ବନବିହାରୀ ମହାପାତ୍ର ଓ ଲେଖିକା ସ୍ନିଗ୍ଧା ସୁଚରିତାଙ୍କ ନାଟକ ” ମୁଁ କେବେ ଦୁଷ୍ଟ ହେବିନି ” ଓ ” ପରିବର୍ତ୍ତନ ” କୁ ଅତିଥି ମାନେ ଉନ୍ମୋଚନ କରିଥିଲେ । ଶେଷରେ ଗାୟକ ପ୍ରଦୀପ କିଶୋର ତ୍ରିପାଠୀ ଉଦଯାପନୀ ସଙ୍ଗୀତ ଗାନ କରିଥିବା ବେଳେ ଶିକ୍ଷୟିତ୍ରୀ ପ୍ରତିମା ପ୍ରଧାନ ଧନ୍ୟବାଦ ଅର୍ପଣ କରିଥିଲେ ।