ସ୍କୁଲ ବସକୁ ପିଟିଲା ସ୍କୁଲ ବସ୍:୨୦ରୁ ଉର୍ଦ୍ଧ୍ବ ଛାତ୍ରଛାତ୍ରୀ ଆହତ

୨ ଫେବୃଆରୀ ୨୦୨୪ (ଓଡିଶା ତାଜା ନ୍ୟୁଜ) ହିଞ୍ଜିଳିକାଟୁ :- ଶୁକ୍ରବାର ସକାଳେ ୫୯ନଂ ଜାତୀୟ ରାଜପଥ ତଥା ହିଞ୍ଜିଳି ଥାନା ସୋମପୁର ଛକରେ ୨ଟି ସ୍କୁଲବସ ମଧ୍ୟରେ ଧକ୍କା ଘଟି ୨୦ରୁ ଉର୍ଦ୍ଧ୍ୱ ଛାତ୍ରଛାତ୍ରୀ ଆହତ ହୋଇଛନ୍ତି । ଅନ୍ୟପକ୍ଷରେ ଗୋଟିଏ ସ୍କୁଲ ବସ୍ ଚାଳକ ଓ ମାଲିକଙ୍କ ମିଳିତ ଆକ୍ରମଣରେ ଆଂଶିକ କ୍ଷତିଗ୍ରସ୍ତ ସ୍କୁଲ ବସ ଚାଳକ ଗୁରୁତର ଆହତ ହୋଇଛନ୍ତି । ଆହତ ଗାଡ଼ି ଚାଳକ ଜଣଙ୍କ ହେଲେ ହିଞ୍ଜିଳି ଥାନା ସମରଝୋଳ ଗ୍ରାମର କାହ୍ନୁ ଚରଣ ସାହୁ(୨୧) । ପ୍ରକାଶ ଯେ, କୁକୁଡାଖଣ୍ଡି, ସମରଝୋଳ ଓ ନିକଟସ୍ଥ ଗ୍ରାମରୁ ଶିକ୍ଷାର୍ଥୀ ମାନଙ୍କୁ ନେଇ ଶୁକ୍ରବାର ସକାଳେ ହିଞ୍ଜିଳିକାଟୁ ପୌରାଞ୍ଚଳ କେନ୍ଦ୍ରୀୟ ବିଦ୍ୟାଳୟକୁ ୨ଟି ଗାଡି ଆସୁଥିଲା । ଗୋଟିଏ ସ୍କୁଲ ଭ୍ୟାନ (ଓଆର୦୭ବି ୪୧୬୧) ହିଞ୍ଜିଳି ଥାନା ସୋମପୁର ଛକରେ କୌଣସି କାରଣରୁ ହଠାତ୍ ବ୍ରେକ ମାରିବାରୁ ପଛରେ ଆସୁଥିବା ଅନ୍ୟ ଏକ ସ୍କୁଲ ବସ୍‌(ଓଆର୦୨ବିଏମ ୨୨୫୯) ଟି ସମ୍ମୁଖରେ ଥିବା ସ୍କୁଲ ବସ୍ ପଛପଟକୁ ଧକ୍କା ଦେଇଥିଲା । ଦୁର୍ଘଟଣାରେ ଉଭୟ ଗ୍ରାଡିରେ ଯାତ୍ରା କରୁଥିବା ଶିକ୍ଷାର୍ଥୀଙ୍କ ମଧ୍ୟରୁ ୨୦ରୁ ଉର୍ଦ୍ଧ୍ୱ ଛାତ୍ରଛାତ୍ରୀ ଆହତ ହୋଇଥିଲେ । ସ୍ଥାନୀୟ ଲୋକେ ଆହତ ଶିକ୍ଷାର୍ଥୀଙ୍କୁ ଉଦ୍ଧାର କରି ଚିକିତ୍ସା ପାଇଁ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ । ସେମାନଙ୍କ ମଧ୍ୟରୁ ଶିକ୍ଷାର୍ଥୀ ଡି. ଶୁଭଶ୍ରୀ, କେ. ଶୀମ୍ରନ, ଆକାକ୍ଷାଂ ସାହୁ, କେ, ପ୍ରେମକୁମାର, ଅମରେଶ ପଟ୍ଟନାୟକ ଗୁରୁତର ଆହତ ହୋଇଥିବାବେଳେ ୧୫ରୁ ଉର୍ଦ୍ଧ୍ୱ ଶିକ୍ଷାର୍ଥୀ ସାମାନ୍ୟ ଆହତ ହୋଇଥିଲେ । ଘଟଣାକୁ ନେଇ ଅନ୍ୟ ଏକ ସ୍କୁଲ ବସର ଚାଳକ ଓ ମାଲିକ ମିଳିତ ଭାବେ ପ୍ରଥମେ ଆସୁଥିବା ସ୍କୁଲ ବସ ଚାଳକଙ୍କୁ ଆକ୍ରମଣ କରିଥିଲେ । ଆକ୍ରମଣରେ ଚାଳକ ଜଣଙ୍କ ଗୁରୁତର ଆହତ ହୋଇଥିଲେ । ଖବର ପାଇ ହିଞ୍ଜିଳି ପୁଲିସ ଡାକ୍ତରଖାନାରେ ପହଞ୍ଚି ଶିକ୍ଷାର୍ଥୀ ମାନଙ୍କ ସ୍ୱାସ୍ଥ୍ୟ ଅବସ୍ଥା ପଚାରି ବୁଝିଥିଲା । ଘଟଣା ଲେଖା ହେବା ସୁଦ୍ଧା ଥାନାରେ କୌଣସି ଅଭିଯୋଗ ହୋଇନାହିଁ । ଉଭୟ ଗାଡି ଚାଳକଙ୍କୁ ପୁଲିସ ଥାନାରେ ଅଟକ ରଖି ଘଟଣାର ତଦନ୍ତ ଚଳାଇଥିବା ଥାନା ଭାରପ୍ରାପ୍ତ ଅଧିକାରୀ ଶ୍ରୀନୀବାସ ସେଠୀ ଙ୍କ ସୂତ୍ରରୁ ପ୍ରକାଶ । ପ୍ରକାଶ ଥାଉକି, ସରକାରଙ୍କ ଗାଇଡ ଲାଇନକୁ ଅବମାନନା କରି ବହୁ ସରକାରୀ ଓ ବେସରକାରୀ ବିଦ୍ୟାଳୟରେ ନିୟୋଜିତ ସ୍କୂଲ ଭ୍ୟାନ ଗୁଡିକ ନିର୍ଦ୍ଧାରିତ ସିଟ ଠାରୁ ବହୁ ଅଧିକ ଶିକ୍ଷାର୍ଥୀଙ୍କୁ ନେଇ ବିଦ୍ୟାଳୟକୁ ଯାତାୟତ କରୁଥିବା ସହ ବହୁ ସମୟରେ ବିଦ୍ୟାଳୟ ଗାଡି ଗୁଡିକ ମଧ୍ୟରେ ପ୍ରତିଯୋଗିତା ମୂଳକ ଗାଡି ଚାଳନା ହେଉଥିବା ଯୋଗୁଁ ବହୁ ସମୟରେ ଛୋଟ ବଡ ଦୂର୍ଘଟଣା ଘଟୁଥିବା ନଜିର ରହିଛି । ଏଥି ପ୍ରତି ସ୍ଥାନୀୟ ପ୍ରଶାସନ ଦୃଷ୍ଟି ପ୍ରଦାନ କରି ନିୟମ ଖିଲାପକାରୀ ଗାଡି ମାଲିକ ଓ ବିଦ୍ୟାଳୟ କର୍ତ୍ତୁପକ୍ଷଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ଅଞ୍ଚଳର ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି ।