ପାକ୍‍ ଅଧିକୃତ କାଶ୍ମୀରରେ ଲୁଚିଥିବା ଆତଙ୍କବାଦୀଙ୍କ ବିରୁଦ୍ଧରେ ମୋଦୀ ସରକାର ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବେ, ଜମ୍ମୁ କାଶ୍ମୀରରେ ସେମାନଙ୍କ ସମ୍ପତ୍ତି ଜବତ ହେବ

୧୦ ସେପ୍ଟେମ୍ବର ୨୦୨୩ (ଓଡ଼ିଶା ତାଜା ନ୍ୟୁଜ ) ନୂଆଦିଲ୍ଲୀ :-> ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ ଅଧୀନରେ ଏବଂ କେନ୍ଦ୍ର ସ୍ୱରାଷ୍ଟ୍ର ଓ ସହକାରିତା ମନ୍ତ୍ରୀ ଶ୍ରୀ ଅମିତ ଶାହଙ୍କ ପ୍ରୟାସରେ ଜମ୍ମୁ କାଶ୍ମୀରର ବାସିନ୍ଦା ତଥା ପାକିସ୍ତାନ ଅଧିକୃତ କାଶ୍ମୀର (ପିଓକେ)ରେ ଆଶ୍ରୟ ନେଇଥିବା ଆତଙ୍କବାଦୀଙ୍କର ସମ୍ପତ୍ତି ଜବତ କରିବାକୁ ଭାରତ ସରକାର ନିଷ୍ପତ୍ତି ନେଇଛନ୍ତି । ଜମ୍ମୁ କାଶ୍ମୀରର ଅସ୍ଥିର ଅଞ୍ଚଳର ବାସିନ୍ଦା ଅସଂଖ୍ୟ ଆତଙ୍କବାଦୀ ପିଓକେରେ ଦୀର୍ଘକାଳ ଧରି ଶରଣ ନେଇଛନ୍ତି । ଏହି କାରଣରୁ ମୋଦୀ ସରକାରଙ୍କ ନେତୃତ୍ୱରେ ଜମ୍ମୁ କାଶ୍ମୀରରେ ଥିବା ସେମାନଙ୍କର ସମସ୍ତ ସମ୍ପତ୍ତି ଜବତ କରିବାକୁ ନିଷ୍ପତ୍ତି ନିଆଯାଇଛି । ଏହି ମର୍ମରେ ଜମ୍ମୁ କାଶ୍ମୀର ପୋଲିସ ପକ୍ଷରୁ ପାକିସ୍ତାନରେ ଆଶ୍ରୟ ନେଇଥିବା ସମସ୍ତ ଆତଙ୍କବାଦୀଙ୍କ ବିରୁଦ୍ଧରେ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଦୃଢ ପ୍ରତିବଦ୍ଧତା ଆଧାରରେ ଏକ ଘୋଷଣାନାମା ଜାରି କରାଯାଇଛି ।

ତଦନୁଯାୟୀ ଜମ୍ମୁ କାଶ୍ମୀରର ମୂଳ ଅଧିବାସୀ ହୋଇ ଗିରଫ ଏଡାଇବାକୁ ପିଓକେକୁ ଚାଲିଯାଇଥିବା ଆତଙ୍କବାଦୀଙ୍କର ସମ୍ପତ୍ତି ବାଜ୍ୟାପ୍ତ କରାଯିବ । ଜମ୍ମୁ କାଶ୍ମୀର ପୋଲିସ ଅତ୍ୟନ୍ତ ସାବଧାନତାର ସହିତ ଆତଙ୍କବାଦୀମାନଙ୍କର ଏକ ପୂର୍ଣ୍ଣାଙ୍ଗ ତାଲିକା ପ୍ରସ୍ତୁତ କରିଛନ୍ତି, ଯେଉଁମାନେ ଏକଦା ଏହି ଅଞ୍ଚଳର ବିଭିନ୍ନ ସେକ୍ଟରରେ ସକ୍ରିୟ ଥିଲେ କିନ୍ତୁ ପରବର୍ତ୍ତୀ ସମୟରେ ସେମାନେ ପିଓକେରେ ଆଶ୍ରୟ ନେଇଛନ୍ତି । ଏହି ପୂର୍ଣ୍ଣାଙ୍ଗ ତାଲିକାରେ ୧୯୯୦ରୁ ପିଓକେରେ ରହିଆସୁଥିବା ୪୨୦୦ରୁ ଅଧିକ ଆତଙ୍କବାଦୀଙ୍କର ନାମ ରହିଛି । ୧୯୯୦ରେ ବହୁସଂଖ୍ୟକ ଯୁବଗୋଷ୍ଠୀ ବେଆଇନ ଭାବରେ ନିୟନ୍ତ୍ରଣ ରେଖା ଟପି ପିଓକେରେ ପ୍ରବେଶ କରିଥିଲେ ଏବଂ ସେମାନେ ଏବେ ଜମ୍ମୁ କାଶ୍ମୀର ମଧ୍ୟରେ ପୁନର୍ବାର ଆତଙ୍କବାଦୀ କାର୍ଯ୍ୟକଳାପରେ ନିୟୋଜିତ ହେବାକୁ ପ୍ରସ୍ତୁତ ହେଉଛନ୍ତି । ଏହିଭଳି ଆତଙ୍କୀଙ୍କର ସମ୍ପତ୍ତିଗୁଡିକ ସମ୍ପ୍ରତି ବାଜ୍ୟାପ୍ତ କରାଯିବା ପ୍ରକ୍ରିୟା ଆରମ୍ଭ ହୋଇଛି ଏବଂ ତାହା ଜାରି ରହିବ ।

ଆତଙ୍କବାଦ ମୁକ୍ତ ଭାରତ ନିମନ୍ତେ ଉତ୍ସର୍ଗୀକୃତ ଭାବରେ କାର୍ଯ୍ୟ କରୁଥିବା ଶ୍ରୀ ଶାହଙ୍କ ତତ୍ତ୍ୱାବଧାନରେ ନିୟନ୍ତ୍ରଣ ରେଖା (ଏଲ୍‍ଓସି) ଆରପଟୁ ଉଗ୍ରବାଦ କାର୍ଯ୍ୟକଳାପ ଚଳାଉଥିବା ଏହି ଆତଙ୍କବାଦୀଙ୍କ ଉପରେ କଡା ସତର୍କ ଦୃଷ୍ଟି ରଖାଯାଉଛି । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପ୍ରଶାସନ ସ୍ପଷ୍ଟ ଏବଂ ଦୃଢତାର ସହିତ କହିଛନ୍ତି ଯେ ଏହି ଆତଙ୍କବାଦୀଙ୍କ ପକ୍ଷରୁ ଭାରତୀୟ ସୀମା ମଧ୍ୟକୁ ଅନୁପ୍ରବେଶ ନିମନ୍ତେ କୌଣସି ପ୍ରକାର ଉଦ୍ୟମ କରାଗଲେ ତାହାର ପରିଣତି ଭୟାବହ ହେବ । କାଶ୍ମୀର ଉପତ୍ୟକାର କୁଲଗାମ୍‍-ଶୋପିଆନ୍‍ ଜିଲ୍ଲାରୁ ଜମ୍ମୁ ଡିଭିଜନ୍‍ର ରାଜୌରୀ-ପୁଞ୍ଚ ଜିଲ୍ଲା ଆଡକୁ ଆସୁଥିବା ୯-୧୨ଜଣ ଆତଙ୍କବାଦୀ ଗୋଷ୍ଠୀ ମରଣାନ୍ତକ ଦଶା ଭୋଗିଛନ୍ତି ଏବଂ ସେମାନଙ୍କ ମଧ୍ୟରୁ ତିନିଜଣ ନିହତ ହୋଇଥିବାବେଳେ ଅବଶିଷ୍ଟ ଆତଙ୍କବାଦୀଙ୍କୁ ଖୋଜିବା କାର୍ଯ୍ୟ ଜାରି ରହିଛି ।

ଶ୍ରୀ ଶାହଙ୍କ ଦୂରଦୃଷ୍ଟି ଆଧାରରେ ନିଷିଦ୍ଧ ନିଶାଦ୍ରବ୍ୟ ଚୋରାଚାଲାଣ ରୋକିବାକୁ ବ୍ୟାପକ ପ୍ରସ୍ତୁତି ପ୍ରକ୍ରିୟା ଚାଲିଛି । ଶ୍ରୀ ଶାହ ଦୃଢତାର ସହିତ କହିଛନ୍ତି ଯେ ନିଷିଦ୍ଧ ନିଶାଦ୍ରବ୍ୟ ଚୋରା ଚାଲାଣ ଏବଂ ସେଥିରୁ ହେଉଥିବା ବେଆଇନ ଆୟକୁ ନେଇ ଆତଙ୍କବାଦୀମାନେ ସେମାନଙ୍କ କାର୍ଯ୍ୟକଳାପ ଜାରି ରଖୁଛନ୍ତି । ସେଥିପାଇଁ ସମାନ ସମୟରେ ଆତଙ୍କବାଦ ଏବଂ ନିଷିଦ୍ଧ ନିଶାଦ୍ରବ୍ୟକୁ ଲକ୍ଷ୍ୟ କରି ଏହାକୁ ନିପାତ କରିବା ଅନିବାର୍ଯ୍ୟ ହୋଇପଡିଛି । ରାଷ୍ଟ୍ରର ଶାନ୍ତି ବଜାୟ ରଖିବାରେ ପ୍ରତିବନ୍ଧକ ହେଉଥିବା ଏବଂ ଆତଙ୍କବାଦୀ କାର୍ଯ୍ୟକଳାପରେ ସେମାନଙ୍କ ସମ୍ପୃକ୍ତି କାରଣରୁ ଜମ୍ମୁ କାଶ୍ମୀରର ସ୍ଥାନୀୟ ଆତଙ୍କବାଦୀଙ୍କର ସମ୍ପତ୍ତି ଜବତ ଏବଂ ବାଜ୍ୟାପ୍ତ କରାଯିବା କାର୍ଯ୍ୟ ଏକ ଶକ୍ତିଶାଳୀ ଭାରତ ଗଠନ ଦିଗରେ ଏକ ନୂତନ ପ୍ରୟାସକୁ ପ୍ରତିଫଳିତ କରୁଛି ।