ବିପଦକୁ ଆମନ୍ତ୍ରଣ କରୁଛି ରାସ୍ତାପାର୍ଶ୍ବ ଶୁଖିଲା ଗଛ

୦୬ଜୁଲାଇ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ଆର,ଉଦୟଗିରି :-  ଗଜପତି ଜିଲ୍ଲା ନୂଆଗଡ଼ ସଦର ମହକୁମା ଠାରୁ ଖଜୁରୀପଦା ପର୍ଯ୍ୟନ୍ତ ପୂର୍ତ୍ତ ବିଭାଗ ୬କିମି ରାସ୍ତାର ଉଭୟ ପାର୍ଶ୍ବର ଅନେକ ସ୍ଥାନରେ ଶୁଖିଲା ଗଛ ଗୁଡ଼ିକ ବିପଦ ସଙ୍କୁଳ ଅବସ୍ଥାରେ ରହିଛି। ବଡ଼ ବଡ଼ ଗଛ ଶୁଖି ତାର ଶାଖା ପ୍ରଶାଖା ରାସ୍ତା ଉପରେ ମେଲେଇ ହୋଇ ରହିଛି। ତେଣୁ ବିପଦକୁ ସ୍ବାଗତ କରୁଛି ଏଠାରେ ରହିଥିବା ଶୁଖିଲା ଗଛ ଗୁଡ଼ିକ। ଏହି ରାସ୍ତାରେ ଶହଶହ ଲୋକେ ବିଭିନ୍ନ କାର୍ଯ୍ୟରେ ଯିବା ଆସିବା କରିଥାନ୍ତି। ପଥଚାରୀ ମାନଙ୍କ ଉପରେ କାଲେ ଶାଖାର ଶୁଖିଲା କାଠ ଖଣ୍ଡ ପଡ଼ିବା ନେଇ ଭୟ ସୃଷ୍ଟି ହେଉଥିବା ଚର୍ଚ୍ଚ ହେଉଛି। ସାମାନ୍ୟ ବର୍ଷା ପବନରେ ଶାଖା ପ୍ରଶାଖାର ଶୁଖିଲା ବକଲ ଏବଂ କାଠ ଖଣ୍ଡ ରାସ୍ତା ଉପରେ ଖଣ୍ଡ ଖଣ୍ଡ ହୋଇ ପଡ଼ୁଥିବା ଦେଖିବାକୁ ମିଳୁଛି। ଦୀର୍ଘ ବର୍ଷର ଗଛ ଗୁଡାକ ଶୁଖି ଶୁଖି ରହିଥିବାରୁ କେତେକ ଗଛରେ ଶାଖା ପ୍ରଶାଖା ଖଣ୍ଡ ଖଣ୍ଡ ହୋଇ ପଡ଼ି ଲମ୍ବା ହୋଇ ଗଣ୍ଡୀ ରହିଛି।

ବେଳେବେଳେ ରାସ୍ତାରେ ଗଣ୍ଡୀ ପଡ଼ି ଗମନା ଗମନରେ ବାଧା ସୃଷ୍ଟ ହେବାର ସୂଚନା ରହିଛି। ତେଣୁ ଆଗାମୀ ଦିନରେ ପଥଚାରୀ ମାନଙ୍କର ଜୀବନ ହାନି ହେବାର ଆଶଙ୍କା ରହିଛି।ଏହି ରାସ୍ତା ଦେଇ ପ୍ରଶାସନ,ପୂର୍ତ୍ତ ବିଭାଗ, ବନ ବିଭାଗ କର୍ମଚାରୀ ନୀତି ଯିବା ଆସିବା କରନ୍ତି। ହେଲେ କାହାରବି ଉଭୟ ପାଶ୍ୱରେ ବିପଦ ସଙ୍କୁଳ ଅବସ୍ଥାରେ ଥିବା ଶୁଖିଲା ଗଛ ଗୁଡ଼ିକ ଉପରେ ଦୃଷ୍ଟି ପଡୁନାହିଁ କି ଏହାକୁ ହଟାଇବା ପାଇଁ କେହି ଗୁରୁପ୍ତ ଦେଉନଥିବା ଅଭିଯୋଗ ହେଉଛି। ବର୍ତମାନ ଆଗକୁ ମୌସୁମୀ ସହ ଝଡ଼ ବାତ୍ୟା ଦେବାର ଆଶଙ୍କା ରହିଛି। ବେଳ ଥାଉ ଥାଉ ଏହାର ପ୍ରତିକାର କରାନଗଲେ ଦୁର୍ଘଟଣା ଘଟିବାର ସମ୍ଭାବନାକୁ ଏଡ଼ାଇ ଦିଆଯାଇ ପାରିବ ନାହିଁ। ରାସ୍ତା କଡ଼ର ଶୁଖିଲା ଗଛ ଗୁଡ଼ିକ ପ୍ରତି ବିଭାଗୀୟ ଅଧିକାରୀ ମାନେ ଧ୍ୟାନ ଦେଉ ନ ଥିବା ବୁଦ୍ଧିଜୀବୀ ମହଲରେ ଆଲୋଚ୍ୟ ବିଷୟ ହୋଇଛି। ଏଣୁ ବିଭାଗୀୟ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ କୌଣସି ଅଘଟଣ ଘଟିବା ପୂର୍ବରୁ ଶୁଖିଲା ଗଛ ଗୁଡାକ ସଫା କରିବାକୁ ବିଭିନ୍ନ ମହଲରେ ଦାବି ହେଉଛି।