ଗଜପତି ଜିଲ୍ଲା : ବଜ୍ରପାତରେ ୩ଟି ଗାଈ ମୃତ୍ୟୁ

୧୨ଏପ୍ରିଲ୍ ,୨୦୨୩ (ଓଡ଼ିଶା ତାଜାନ୍ୟୁଜ ) ଆର, ଉଦୟଗିରି :- ଗଜପତି ଜିଲ୍ଲା ନୂଆଗଡ଼ ବ୍ଲକ ଟାଙ୍ଗିଲି ପଞ୍ଚାୟତର ବାଗସିଂ ସାହିର ପୋଖରୀ ନିକଟରେ ବଜ୍ରପାତରେ ୩ଟି ଗାଈ ମୃତ୍ୟୁ ହୋଇଛି । ମଙ୍ଗଳବାର ସନ୍ଧ୍ୟା ସମୟରେ ଗାଈଗୋରୁ ଚରୁଥିବା ସମୟରେ ଅଦିନିଆ ବର୍ଷା ପବନ ସାଙ୍ଗକୁ ବଜ୍ରପାତ ହୋଇଥିଲା । ଏଥିରେ ୩ଟି ଗାଈ ଟଳି ପଡ଼ିଥିଲେ । ଗ୍ରାମର ସୁରେଖା ରଇତ, ଚନ୍ଦ୍ର ରଇତ ଓ ଟୁନି ରଇତଙ୍କ ଗୋଟିଏ ଲେଖାଏଁ ଗାଈ ମୃତ୍ୟୁବରଣ କରିଛନ୍ତି । ଗ୍ରାମବାସୀ ଏବିଷୟରେ ସରପଞ୍ଚ ସିଙ୍ଗନା ରଇତଙ୍କୁ ଜଣାଇଥିଲେ । ସେ ଘଟଣା ସ୍ଥଳରେ ପହଞ୍ଚି ତଦାରଖ କରି ପ୍ରାଣୀ ଚକିତ୍ସାଳୟକୁ ଜଣାଇ ଥିଲେ । ଗୋଷ୍ଠି ପ୍ରାଣୀ ଚିକିତ୍ସାଧିକାରୀ ଡ଼ଃ ତପସ୍ଵିନୀ ନାୟକଙ୍କ ତତ୍ତ୍ଵାବଧାନରେ ପ୍ରାଣିଧନ ନିରୀକ୍ଷକ ଅନୁସୁୟା ରଇତ ଓ ରାଜେଶ କୁମାର ପାଇକ ଆଜି ଘଟଣା ସ୍ଥଳରେ ପହଞ୍ଚି ମୃତ ଗାଈ ମାନଙ୍କୁ ଶବବ୍ୟବଚ୍ଛେଦ କରିଥିଲେ ।ତିନୋଟି ଯାକ ଗାଈ ଗର୍ଭବତୀ ଥିବା ଜଣାପଡିଛି । ଚାଷୀଙ୍କୁ ଉପଯୁକ୍ତ କ୍ଷତିପୂରଣ ଦେବାକୁ ପ୍ରଶାସନଠାରେ ସରପଞ୍ଚ ସିଙ୍ଗନା ରଇତ ଦାବି କରିଛନ୍ତି । ସ୍ଥାନୀୟ ରାଜସ୍ବ ନିରୀକ୍ଷକ ରାଜେଶ୍ୱର ରଇତ ଘଟଣାସ୍ଥଳକୁ ଯାଇ ତଦନ୍ତ କରିଥିବା ସୂଚନା ମିଳିଛି ।