ଓଡ଼ିଶା ତାଜା ନ୍ୟୁଜ୍/୨୧ ଜୁନ ମଙ୍ଗଳବାର/ଭୁବନେଶ୍ୱର :-
ବୋଉ କୁଳୁକୁଳୁ ଗାଁ ନଈ ହେଲେ
ବାପା ଅଥଳ ସମୁଦ୍ର
ବୋଉ ଝରଝର ପାହାଡି ଝରଣା
ବାପା ପରା ସ୍ଥିର ହ୍ରଦ ।
ବୋଉ କୂଅମୂଳ ମଲ୍ଲି ବୁଦା, ବାପା
ଗାଁ ମୁଣ୍ଡ ବରଗଛ
ବୋଉ ତୁଠ ପାଖ ମହୁରାଳି, ବାପା
ଗଭୀର ଜଳର ମାଛ ।
ବୋଉ ଅଙ୍କାବଙ୍କା ଗ୍ରାମପଥ ଆଉ
ବାପା ଲମ୍ବା ଦିଗବଳୟ
ଗାଁ ପୋଖରୀର କଇଁ ବୋଉ, ବାପା
ପାରିଜାତର ବଳୟ ।
ବୋଉ ଓଳିଝରା ପାଣିଫୋଟକା ମୋ
ବାପାତ କାଗଜ ଡଙ୍ଗା
ବୋଉ ମମତାର ମହାନଦୀ ମୋର
ବାପା ତ ଜ୍ଞାନର ଗଙ୍ଗା ।
ଚାଳ ମଥାନର ପୋଇଡଙ୍କ ବୋଉ
ବାପା ତାଳଗଛ ଶାଖା
ବୋଉ ଅଗଣାର ସଜ ତୁଳସୀ ମୋ
ବାପା କଳ୍ପବଟ ଝଙ୍କା ।
ବୋଉ ମଗୁଶିର ମାଣ ଖଟୁଲି ମୋ
ବାପା ଦାଣ୍ଡଘର ଦିଅଁ
ବୋଉ ଆଶ୍ୱାସର ପାହାନ୍ତି ଓ ବାପା
ଭରସାର ସୂର୍ଯ୍ୟୋଦୟ ।
ବୋଉ ମାଟିକାନ୍ଥ ଝୋଟି ଚିତା, ବାପା
ମୁଗୁନି ପଥର ମୂର୍ତ୍ତି
ବୋଉ ଚଉରାର ସଞ୍ଜବତୀ, ବାପା
ମନ୍ଦିର ସନ୍ଧ୍ୟା ଆଳତି ।
ବୋଉ ବାରିପଟ ଢିଙ୍କିଶାଳ,ବାପା
ଦମ୍ଭିଲା ଦାଣ୍ଡ କବାଟ
ବୋଉଟି ସରଳ ସାହିତ୍ୟ ଓ ବାପା
ଗହନ ଗଣିତ ପାଠ ।
ବୋଉତ ଘରର ମଜବୁତ ନିଅଁ
ବାପା ସେ ଘରର ଛାତ
ବୋଉଟି ଅସରା ପଖାଳ ହାଣ୍ଡି ମୋ
ବାପା ଅବଢା ଅନ୍ନ ତ ।
ଅଶିଣ ଆକାଶ ରୂପା ଜହ୍ନ ବୋଉ
ବାପା ବଇଶାଖ ସୂର୍ଯ୍ୟ
ଠାକୁର ଘରର ଶଙ୍ଖଧ୍ୱନି ବୋଉ
ବାପା ବିଜୟର ତୂର୍ଯ୍ୟ ।
ବୋଉ ହସକୁରି ଗ୍ରାମଦେବତୀ ମୋ
ବାପା ଭାଗବତ ଗାଦି
ରୋଷେଇ ଘରର ମାଟି ଚୁଲି ବୋଉ
ବାପା ତ ଯଜ୍ଞର ବେଦି ।
କାକର ଗାଧୁଆ ଦୂବ ଘାସ ବୋଉ
ବାପା ତ ଧାନ କିଆରି
ବୋଉ ଘୁମୁ ଘୁମୁ ଲୋଟଣି ପାରା ମୋ
ବାପା ପଞ୍ଜୁରିର ଶାରି ।
ବୋଉ ଅନ୍ତରଙ୍ଗ ଗାଁ ଦାଣ୍ଡ ଧୂଳି
ବାପା ନିଦା ଶାଳଗ୍ରାମ
ବୋଉ ମନଟି ତ ଫୁଲର ପାଖୁଡା
ବାପା ନାରିକେଳ ସମ ।
ବୋଉ ସମ୍ପର୍କର ସାଲୁକନା, ବାପା
ବଡ ଦେଉଳର ନେତ
ବୋଉ ଅପାଶୋରା କୁଆଁର ପୁନେଇଁ
ବାପା ପରା ରଥଯାତ ।
ପରୀ ରାଇଜର କାହାଣୀ ତ ବୋଉ
ବାପା ସତ ସ୍ୱାଭିମାନ
ବୋଉ ତ ନିରୀହ ନିଃଶ୍ୱାସ, ମୋ ବାପା
ବିଶ୍ୱାସର ଅମ୍ଲଜାନ ।
