ରାଜଭବନରେ ରାଜ୍ୟପାଳ ପ୍ରଫେସର ଶ୍ରୀଯୁକ୍ତ ଗଣେଶୀ ଲାଲଙ୍କ କରକମଳରେ – ‘ପୂର୍ବପଶ୍ଚିମ’ ପୁସ୍ତକ ଲୋକାର୍ପିତ

ଓଡ଼ିଶା ତାଜା ନ୍ୟୁଜ୍ (୨୩ ଫେବ୍ରୁଆରୀ ବୁଧବାର ) ଭୁବନେଶ୍ୱର :- ଓଡ଼ିଶା ରାଜଭବନରେ ମହାମହିମ ରାଜ୍ୟପାଳ ପ୍ରଫେସର ଶ୍ରୀଯୁକ୍ତ ଗଣେଶୀ ଲାଲଙ୍କ କରକମଳରେ କେନ୍ଦ୍ର ସାହିତ୍ୟ ଏକାଡେମୀର ପୂର୍ବତନ ସଭାପତି ଓ ଭାରତର ବିଶିଷ୍ଟ ଉପନ୍ୟାସକାର ଶ୍ରୀଯୁକ୍ତ ସୁନୀଲ ଗଙ୍ଗୋପାଧ୍ୟାୟଙ୍କ ମୂଳ ବଂଙ୍ଗଳା ରଚିତ ଏବଂ ପୂର୍ବତନ ପୋଲିସ୍ ଆଇ.ଜି. ଶ୍ରୀଯୁକ୍ତ ବିଧୁଭୂଷଣ ମିଶ୍ରଙ୍କ ଧର୍ମପତ୍ନୀ ବିଶିଷ୍ଟ ଗାଳ୍ପିକା ଓ କବି ଶ୍ରୀମତୀ ଗୀତା ମିଶ୍ରଙ୍କ ଦ୍ୱାର ଓଡ଼ିଆରେ ଅନୁଦିତ ହୋଇଥିବା ଉପନ୍ୟାସ ‘ପୂର୍ବପଶ୍ଚିମ’ର ଲୋକାର୍ପଣ ହୋଇଯାଇଛି ।

ରାଜ୍ୟର ସଂମ୍ଭ୍ରାନ୍ତ ପ୍ରକାଶନ ସଂସ୍ଥା ଅପୂର୍ବା ପ୍ରକାଶନୀ ଦ୍ୱାରା ପ୍ରକାଶିତ ହୋଇଥିବା ପ୍ରାୟ ଏକହଜାର ପୃଷ୍ଠା ବିଶିଷ୍ଟ ଏହି ମନଲୋଭା ଓ ଚିାକର୍ଷକ ଉପନ୍ୟାସ ପୂର୍ବପଶ୍ଚିମ ଭାରତୀୟ କଥା ସାହିତ୍ୟର ଏକ ରତ୍ନ ଆଭୁଷଣ କହିଲେ ଅତ୍ୟୁକ୍ତି ହେବନାହିଁ । ‘ଦେଶ’ ପତ୍ରିକାରେ ଧାରାବାହିକ ଭାବେ ପ୍ରକାଶିତ ହୋଇ ଅନେକ ଶ୍ରଦ୍ଧା ସାଉଁଟି ଥିବା ଏହି ଏବଂ ଏକ ବିଶାଳ କାନ୍‌ଭାସ୍‌ରେ ଚିତ୍ରିତ ଏହି ସୁଦୀର୍ଘ ଉପନ୍ୟାସର ଘଟନା ପ୍ରବାହ ଏପାଖ ଏବଂ ସେପାଖ ବଙ୍ଗଳାକୁ ଏକ ସଙ୍ଗରେ ସ୍ପର୍ଶ କରି ପାରିଛି ।