ଶ୍ରୀରାମକୃଷ୍ଣ ଆଦର୍ଶ ଶିକ୍ଷାକେନ୍ଦ୍ର,ନୟାଗଡରେ ୭୩ତମ ସାଧାରଣତନ୍ତ୍ର ଦିବସ ପାଳିତ

ଓଡ଼ିଶା ତାଜା ନ୍ୟୁଜ୍ (୨୭ ଜାନୁଆରୀ ଗୁରୁବାର) ନୟାଗଡ :- ନୟାଗଡ ହାଉସିଂ ବୋର୍ଡ ନିକଟ ଶ୍ରୀରାମକୃଷ୍ଣ ଆଦର୍ଶ ଶିକ୍ଷାକେନ୍ଦ୍ର ପରିସରରେ ବିଦ୍ଯାଳୟର ପ୍ରତିଷ୍ଠାତା ସଂପାଦକ ଶ୍ରୀଧର ସାହୁଙ୍କ ସଂଯୋଜନାରେ ୭୩ତମ ସାଧାରଣତନ୍ତ୍ର ଦିବସ ପାଳନ ହୋଇ ଯାଇଛି । ମୁଖ୍ଯ ଅତିଥି ଭାବେ ପ୍ରାକ୍ତନ ଜିଲ୍ଲା ମୁଖ୍ଯ ଚିକିତ୍ସା ଅଧିକାରୀ,ନୟାଗଡ଼ ତଥା ବରିଷ୍ଠ ଶିଶୁରୋଗ ବିଶେଷଜ୍ଞ ଡାକ୍ତର ଉମେଶ ଚନ୍ଦ୍ର ମିଶ୍ର ଯୋଗ ଦେଇ ପତାକା ଉତ୍ତୋଳନ କରି ଉପସ୍ଥିତ ଆଚାର୍ଯ୍ୟ ଆଚାର୍ଯ୍ୟା ମାନଙ୍କ ଉପଲକ୍ଷେ ସାଧାରଣତନ୍ତ୍ର ଦିବସର ତାତ୍ପର୍ଯ୍ୟ ଓ ସ୍ବାଧୀନତା ସଂଗ୍ରାମୀ ମହାପୁରୁଷ ମାନଙ୍କ ଅମରଗାଥା ବିଷୟରେ ବକ୍ତବ୍ଯ ରଖି କହିଥିଲେ ଗଣତନ୍ତ୍ରର ପ୍ରତିଷ୍ଠା ଓ ବିକାଶ ସାରା ପୃଥିବୀରେ ଭାରତରୁହିଁ ସମ୍ଭବ ହୋଇପାରି ଥିଲା l

ଭାରତ ଶାସନର ସଂହିତା ଆମ ସମ୍ବିଧାନ ସର୍ବୋତ୍କୃଷ୍ଟ l ବ୍ରିଟିଶ ସମ୍ବିଧାନର ବିଶେଷଜ୍ଞ ସାର ଆଇଭର ଜେନିଙ୍ଗ କହନ୍ତି, ଭାରତୀୟ ସମ୍ବିଧାନ ପୃଥିବୀର ସର୍ବବୃହତ ଲିଖିତ ସମ୍ବିଧାନ l ଭାରତର ସମ୍ବିଧାନରେ ବିଶାଳ ରୂପରେ ସନ୍ନିବେଶିତ ହୋଇ ରହିଛି ବ୍ରିଟିଶ, ଆମେରିକା, ଜର୍ମାନୀ,ଆୟର୍ଲାଣ୍ଡ, କାନାଡ଼ା,ଫ୍ରାନ୍ସ ପ୍ରଭୃତି ଦେଶମାନଙ୍କ ସମ୍ବିଧାନର ବିଶେଷତା ଏବଂ ସାରତତ୍ତ୍ୱ l ଜେନିଙ୍ଗ ଭାରତୀୟ ସମ୍ବିଧାନର ବିଶାଳ ରୁପକୁ ‘ଆଇନଜୀବୀ ମାନଙ୍କ ନନ୍ଦନ କାନନ’ ବୋଲି ଅଭିହିତ କରିଛନ୍ତି l ଆମ ସମ୍ବିଧାନ ଆମର ଗର୍ବ,ଗୌରବ,ସ୍ୱାଭିମାନ ତଥା ଶକ୍ତିର ପ୍ରତୀକ l ଦୁଃଖର ସେ ଦିନ ଚାଲିଯାଇଛି l ଆମେ ଆଜି ସ୍ୱାଧୀନ l

ଅର୍ଦ୍ଧ ଶତାବ୍ଦୀରୁ ଉର୍ଦ୍ଧ୍ୱକାଳ ଆମେ ଗଣ ତନ୍ତ୍ରର ସୁଫଳ ଭୋଗି ସାରିଲେଣି l ପ୍ରାଚୀନ ଭାରତର ସୁଶାସନକୁ ସ୍ମରଣକରି ଆମ ଗଣତନ୍ତ୍ରଶାସନ ଯେମିତି ତିଷ୍ଠି ରହିପାରିବ,ସେଥି ପାଇଁ ଦେଶର ସମସ୍ତ ନାଗରିକ ଯତ୍ନବାନ ହେବା ସର୍ବାଦୌ ଆବଶ୍ୟକ l ଆସନ୍ତୁ ଆମେ ସମସ୍ତେ ଏ ପବିତ୍ର ସାଧାରଣ ତନ୍ତ୍ର ଦିବସ ଅବସରରେ ଆମ ତ୍ରିରଙ୍ଗା ତଳେ ଜାତି ପ୍ରଗତି ପଥରେ ନିୟୋଜିତ ହେବା ପାଇଁ ଦୃଢ଼ ସଂକଳ୍ପ ନେବା ।  ଆଜିର ଶିଶୁ କାଲିର ନାଗରିକ।ସେହି ଆଗାମୀ କାଲିର ଭବିଷ୍ଯତ କଞ୍ଚା ମାଟି ସଦୃଶ କୋମଳମତି ଶିଶୁ ମାନଙ୍କୁ ଗଢୁଥିବା ଗୁରୁମା ଗୁରୁଜୀ ମାନଙ୍କୁ ଭୂୟସୀ ପ୍ରସଂଶା କରିଥିଲେ । ଏବଂ ଦେଶ ଜାତି ମାଟି ପାଇଁ ପବିତ୍ର ଭାବନାର ସହିତ ଦେଶପ୍ରେମରେ ଉଦବୁଦ୍ଧ ହୋଇ ଭାରତମାତା ଚରଣରେ ସମର୍ପିତ ହେବା ପାଇଁ ନିବେଦନ କରିଥିଲେ ।