ପ୍ରତିହିଂସା ପରାୟଣ ନହୋଇ ଜନସେବା କରିବା ଗଣମାଧ୍ୟମର କର୍ତ୍ତବ୍ୟ

ଓଡ଼ିଶା ତାଜା ନ୍ୟୁଜ୍ (୧୩ ଡିସେମ୍ବର ସୋମବାର ) ଭୁବନେଶ୍ୱର :- ଭୁବନେଶ୍ୱର ସ୍ଥିତ ଇନ୍‌ଷ୍ଟିଚ୍ୟୁଟ ଅଫ୍ ଇଞ୍ଜିନିୟରଠାରେ ଦୈନିକ ତ୍ରୈଭାଷିକ ଖବରକାଗଜ ‘ବିଶ୍ୱବାଣୀ’ର ୧୬ତମ ସ୍ୱନକ୍ଷତ୍ର ଉତ୍ସବ ପାଳନ ହୋଇଯାଇଛି । ଏହି ଉତ୍ସବରେ ପୂର୍ବତନ ଅର୍ଥମନ୍ତ୍ରୀ ପ୍ରଫୁଲ୍ଲ ଘଡ଼େଇ ମୁଖ୍ୟ ଅତିଥି ଭାବେ ଯୋଗଦେଇ ବିଶ୍ୱବାଣୀ ଖବରକାଗଜ ଦିନକୁ ଦିନ ସଫଳତାର ପାହାଚ ଚଢୁ । ଆଜି ବହୁ ବଡ଼ ବଡ଼ ଗଣମାଧ୍ୟମ ସହିତ ସମକକ୍ଷ ହୋଇଥିବାରୁ ଭୂୟସୀ ପ୍ରଶଂସା କରିଥିଲେ । ବିଶେଷକରି ଆଜିର ଦିନରେ ଲୋକଙ୍କ ସମସ୍ୟାକୁ ଲୋକଲୋଚନକୁ ଆଣିବା, ସତ୍ୟ ଓ ନିରପେକ୍ଷ ଭାବେ ସମ୍ବାଦ ପରିବେଷଣ କରିବା, ପ୍ରତିହିଂସା ପରାୟଣ ନହୋଇ ଜନସେବାରେ ଗଣମାଧ୍ୟମକୁ ନିୟୋଜିତ କରିବା ପାଇଁ ପରାମର୍ଶ ଦେଇଥିଲେ ।

ବିଶ୍ୱବାଣୀର ପ୍ରତିଷ୍ଠାତା ତଥା ସମ୍ପାଦକ ଅର୍ଜୁନ ମୁଦୁଲି ନିଜେ କିଭଳି କରୋନା ମହାମାରୀ ସମୟରେ ଲୋକମାନଙ୍କ ପାଖରେ କିପରି ଖବରକାଗଜ ପହଞ୍ଚାଉଥିଲେ ସେହି କଷ୍ଟ ମୁହୂର୍ତ୍ତର କଥା ମନେ ପକାଇ ଭାବବିହ୍ୱଳ ହୋଇଯାଇଥିଲେ । ସମ୍ବାଦପତ୍ରକୁ ଆଜିର ଦିନରେ ପରିଚାଳନା କରିବା ଓ ଲୋକଙ୍କ ସମସ୍ୟା ଉପସ୍ଥାପନ କରିବା, ବିନା କୌଣସି ସରକାରୀ ଅନୁଦାନରେ ଚଳାଇ ରଖିବା କେତେ ଯେ କଷ୍ଟ, ତାହା ସେ ନିଜସ୍ୱ ଅନୁଭୂତିରେ ପ୍ରକାଶ କରିଥିଲେ । ବିଶ୍ୱବାଣୀ ଖବରକାଗଜ ଗ୍ରାମାଞ୍ଚଳରେ ବେଶ୍ ଆଦୃତ ହୋଇପାରିଛି ଓ ଆଗାମୀ ଦିନରେ ଖାଲିଥିବା ଅନ୍ୟାନ୍ୟ ବ୍ଲକରେ ନିଜର ପ୍ରତିନିଧି ନିଯୁକ୍ତି ଦେବେ ବୋଲି କହିଥିଲେ ।

ଏହି ଉତ୍ସବରେ ବିଶିଷ୍ଟ ଶିକ୍ଷାବିତ୍ ବଦ୍ରୀନାଥ ପଟ୍ଟନାୟକ, ଆଇଓୟୁଜେର ସଭାପତି ଡଃ ପିତବାସ ମିଶ୍ର ସମ୍ମାନିତ ଅତିଥି ଭାବେ ଯୋଗ ଦେଇଥିଲେ । ଉତ୍ସବକୁ ଉଦ୍‌ଘାଟନ କରିଥିଲେ ନାଇଜରର କୁଳସଚିବ ଅଭୟ କୁମାର ନାୟକ ଓ ତପନ ମହାରଣ୍ୟ ଶର୍ମା ଧନ୍ୟବାଦ ଅର୍ପଣ କରିଥିଲେ । ପରେ ପରେ ମାନ୍ୟଗଣ୍ୟ ଅତିଥିମାନଙ୍କ ଦ୍ୱାରା ନାରାୟଣା ଗ୍ରୁପ୍ ଅଫ୍‌ ସ୍କୁଲ୍‌ର ପରିଚାଳନା ଅଧ୍ୟକ୍ଷ ଡ଼ି. ଶେଷୁ କୁମାରଙ୍କୁ ବିଶ୍ୱବାଣୀ ତରଫରୁ ‘ବିଶିଷ୍ଟ ଶିକ୍ଷାବିତ୍ ସମ୍ମାନ’ରେ ସମ୍ମାନିତ କରାଯାଇଥିଲା । ଜଣେ ସୁପରିଚିତ ଆଶାକର୍ମୀ ତଥା ଭାରତର ତିନିନମ୍ବର ସ୍ଥାନରେ ଥିବା ସୁନ୍ଦରଗଡ଼ ଜିଲ୍ଲାର ଶ୍ରୀମତୀ ମାତୁରୁତା କୁଲୁଙ୍କୁ ‘ବିଶ୍ୱବାଣୀ କୋଭିଡ଼ ଯୋଦ୍ଧା’ ଭାବେ ସମ୍ମାନିତ କରାଯାଇଥିଲା ।