ଅଚଳାବସ୍ଥା ଅବ୍ୟାହତ : ଶୀତ ଅଧିବେଶନର ଅଷ୍ଟମ ଦିନରେ ସର୍ବାଧିକ ୩୬ ମିନିଟ୍ ବିଧାନସଭା ଚାଲିପାରିଛି – ‘ଗିଲୋଟିନ୍’ ଜରିଆରେ ୩୯ ବିଭାଗର ଅତିରିକ୍ତ ଖର୍ଚ୍ଚ ଦାବି ପାରିତ

ମନ୍ତ୍ରୀଙ୍କ ସାମ୍ନାରେ ବିରୋଧୀଙ୍କ ଘଣ୍ଟମାଡ଼

ଓଡ଼ିଶା ତାଜା ନ୍ୟୁଜ୍ (୦୯ ଡିସେମ୍ବର ଗୁରୁବାର ) ଭୁବନେଶ୍ୱର :- ମମିତା ମେହେର ହତ୍ୟାକାଣ୍ଡ ମାମଲାକୁ ନେଇ ବିଜେପି ଓ କଂଗ୍ରେସ ସଭ୍ୟମାନେ ଆଜି ମଧ୍ୟ ସରକାରଙ୍କୁ ଘେରିଥିଲେ । ଶୀତ ଅଧିବେଶନର ଅଷ୍ଟମ ଦିନରେ ସର୍ବାଧିକ ୩୬ ମିନିଟ୍ ବିଧାନସଭା ଚାଲିପାରିଛି । ପୂର୍ବାହ୍ନରେ ପ୍ରାୟ ୧୫ମିନିଟ୍ ଦିବଂଗତ ସିଡ଼ିଏସ ବିପିନ ରାୱତ ଓ ଅନ୍ୟମାନଙ୍କ ଉଦ୍ଦେଶ୍ୟରେ ଶୋକ ପାଇଁ ଗୃହ ସୁରୁଖୁରୁରେ ଚାଲିଥିବାବେଳେ ଅପରାହ୍ଣରେ ଘଣ୍ଟ, ଘଣ୍ଟି ଓ ହଟ୍ଟଗୋଳ ଭିତରେ ୨୧ ମିନିଟ୍ ଚାଲିଥିଲା ।

ହଟ୍ଟଗୋଳ ଭିତରେ ପଞ୍ଚାୟତିରାଜ ମନ୍ତ୍ରୀ ପ୍ରତାପ ଜେନା ଗୃହରେ ବିଭାଗୀୟ ଅତିରିକ୍ତ ଖର୍ଚ୍ଚଦାବି ଉପସ୍ଥାପନ କରିଥିଲେ। ଏତିକିବେଳେ ତାଙ୍କ ନିକଟକୁ କଂଗ୍ରେସ ସଭ୍ୟ ତାରା ପ୍ରସାଦ ବାହିନୀପତି, ଅଧିରାଜ ପାଣିଗ୍ରାହୀ ଓ ରାଜନ ଏକ୍କା ଯାଇ ଘଣ୍ଟ ବାଡ଼େଇ କରି ପ୍ରତିବାଦ ଜଣାଇଥିଲେ। ବିରୋଧୀ ସଭ୍ୟମାନେ ଘଣ୍ଟମାଡ଼ କରୁଥିବାବେଳେ ସରକାରୀ ଦଳର ସଭ୍ୟମାନେ ମନ୍ତ୍ରୀ ଶ୍ରୀ ଜେନାଙ୍କୁ ସୁରକ୍ଷା ଦେଇଥିଲେ ।

ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝି, ନାଉରୀ ନାୟକ, ମୁକେଶ ମହାଲିଙ୍ଗ ଓ ଅନ୍ୟମାନେ ହାତରେ ପୋଷ୍ଟର, ବ୍ୟାନର ଧରି ନାରାବାଜି କରିବା ସହିତ ବାଚସ୍ପତିଙ୍କ ପୋଡିୟମ ବାଡେଇ ପ୍ରତିବାଦ ଜଣାଇଥିଲେ । ବିରୋଧୀଙ୍କ ଏହି ହଟ୍ଟଗୋଳ ମଧ୍ୟରେ ପଞ୍ଚାୟତିରାଜ ଓ ପାନୀୟଜଳ ଯୋଗାଣ ବିଭାଗ ପାଇଁ ଆଗତ ୨୦୨୧-୨୨ ବର୍ଷର ଅତିରିକ୍ତ ଖର୍ଚ୍ଚ ଦାବି ବାବଦକୁ ୩୬୨୩.୬୩ କୋଟି ଟଙ୍କା ପାରିତ ହୋଇଛି ।

ଅବଶିଷ୍ଟ ୩୯ଟି ବିଭାଗର ଅତିରିକ୍ତ ଖର୍ଚ୍ଚ ଦାବିକୁ ବାଚସ୍ପତି ‘ଗିଲୋଟିନ୍’ ଜରିଆରେ ପାରିତ କରିଥିଲେ । ଚଳିତ ଆର୍ଥିକ ବର୍ଷ ଲାଗି ୧୯ହଜାର ୮୩୩କୋଟି ଟଙ୍କାର ଅତିରିକ୍ତ ଖର୍ଚ୍ଚଦାବି ଗୃହରେ ପାରିତ ହୋଇଛି । ଏତିକିବେଳେ ବିରୋଧୀ ବିଜେପି ଓ କଂଗ୍ରେସ ସଭ୍ୟମାନଙ୍କ ଘଣ୍ଟଘଣ୍ଟି ମାଡ଼ ଏତେ ଭୀଷଣ ଥିଲା ଯେ ଗୃହ ପ୍ରକମ୍ପିତ ହୋଇଥିଲା । ବାଚସ୍ପତି ସୂର‌୍ୟ୍ୟନାରାୟଣ ପାତ୍ର ଆସନ୍ତାକାଲି ପୂର୍ବାହ୍ନ ସାଢ଼େ ୧୦ଟା ପର‌୍ୟ୍ୟନ୍ତ ଗୃହକୁ ମୁଲତବି ଘୋଷଣା କରିଥିଲେ ।