ଓଡ଼ିଶାର ବାନ୍ଧକଳା କେନେଡ଼ି ସେଣ୍ଟରରେ ଦର୍ଶକଙ୍କ ମନ ମୋହିଲା ବିଭୁ ମହାପାତ୍ର ନେସ୍‌ନାଲ୍‌ ଅପେରାରେ ‘ଇକତ୍‌’ରୁ  ପ୍ରସ୍ତୁତ କଲେ ଅପୂର୍ବ ଫେସନ୍‌ ପୋଷାକ

ଓଡ଼ିଶା ତାଜା ନ୍ୟୁଜ୍ (୦୭ ନଭେମ୍ବର ରବିବାର) ଭୁବନେଶ୍ୱର :- ୱାସିଙ୍ଗଟନ୍‌ସ୍ଥିତ କେନେଡ଼ି ସେଣ୍ଟରରେ ମହାସମାରୋହରେ ଅନୁଷ୍ଠିତ ହୋଇଛି ନେସ୍‌ନାଲ୍‌ ଅପେରା । ଏହି ଅପେରା ପାଇଁ ଓଡ଼ିଶାର ଖ୍ୟାତନାମା ଫେସନ୍‌ ଡିଜାଇନର୍‌ ବିଭୁ ମହାପାତ୍ର ପୋଷାକ ଡିଜାଇନ୍‌ କରି ଓଡ଼ିଶା ପାଇଁ ଗୌରବ ଆଣିଦେଇଛନ୍ତି । ନେସ୍‌ନାଲ୍‌ ଅପେରା ୨ ବର୍ଷ ପରେ ପ୍ରଥମ ଥର ପାଇଁ ଖୋଲିଛି ା ଚଳିତ ନଭେମ୍ବର ୬ ତାରିଖ ଦିନ ଏହି ଅପେରା ପ୍ରଦର୍ଶିତ ହୋଇଥିଲା । ଏହାର ଶୀର୍ଷକ ରହିଛି ‘ଗୃହାଗମନ- ସେଲିବ୍ରେସନ୍‌ ଅଫ୍‌ ରିଟର୍ଣ୍ଣ’ । ବିଭୁ ମହାପାତ୍ର ମାତୃଭୂମି ଓଡ଼ିଶାକୁ ନେସ୍‌ନାଲ୍‌ ଅପେରାର ମଞ୍ଚ ମାଧ୍ୟମରେ ବିଶ୍ୱ ଦରବାରରେ ସ୍ଥାନିତ କରିଛନ୍ତି ।

ଓଡ଼ିଶାର ଚମତ୍କାର ହସ୍ତତନ୍ତରୁ ପ୍ରସ୍ତୁତ ପୋଷାକକୁ ଅପେରାର କଳାକାରମାନେ ପରିଧାନ କରି ଦର୍ଶକମାନଙ୍କ ମନ ଓ ହୃଦୟ ଜିଣିଛନ୍ତି । ଅପେରା ତାରକା ଇସାବେଲ୍‌ ଲିଓନାର୍ଡ ଓଡ଼ିଶାର କଳା, ଧଳା ଓ ନାଲି ସୂତାରେ ପ୍ରସ୍ତୁତ ‘ଇକତ୍‌’ରୁ ଏକ ଚମତ୍କାର ସ୍ଥାପତ୍ୟ ପୋଷାକ ପରିଧାନ କରିଥିଲେ । ଅପେରାର ଅନ୍ୟତମ ସୁପ୍ରସିଦ୍ଧ ତାରକା ଲରେନ୍ସ ବ୍ରାଉନ୍‌ଲି କମଳା ଓ ସ୍ୱର୍ଣ୍ଣିମ ‘ଇକତ୍‌’ପ୍ରସ୍ତୁତ ସ୍କାର୍ଫ ଏବଂ ଓଡ଼ିଶା କୋଟପାଡ଼ ରେଶମ୍‌ ନେହେରୁ ଜ୍ୟାକେଟ୍‌ ପରିଧାନ କରିଥିଲେ ।

ପ୍ରଥିତଯଶା ଫେସନ୍‌ ଡିଜାଇନର୍‌ ବିଭୁ ମହାପାତ୍ରଙ୍କ ‘ଇକତ୍‌’ ବାନ୍ଧକଳା ବିଶ୍ୱ ଦରବାରରେ ଫେସନ୍‌ ରୂପେ ଆଦୃତ ହୋଇ ଓଡ଼ିଶାର ଅନୁପମ ହସ୍ତତନ୍ତ ଓ ଅପୂର୍ବ ବୟନଶିଳ୍ପକୁ ସାରା ବିଶ୍ୱବଜାରରେ ଆଦୃତ କରାଇବାରେ ମହନୀୟ ଭୂମିକା ଗ୍ରହଣ କରିବ ଏଥିରେ ସନ୍ଦେହ ନାହିଁ ।