ନୂଆଗଡ ବ୍ଲକ ଆଞ୍ଚଳିକ ଉନ୍ନୟନ କମିଟି ପକ୍ଷରୁ ବିଭିନ୍ନ ସମସ୍ୟା ନେଇ ୫ଦଫା ଦାବିପତ୍ର ଜିଲ୍ଲା ପ୍ରଶାସନକୁ ପ୍ରଦାନ

ଓଡ଼ିଶା ତାଜା ନ୍ୟୁଜ ( ୧୯ ଜୁନ ଶନିବାର ) ପାରଳାଖେମୁଣ୍ଡି :-  ଗଜପତି ଜିଲ୍ଲା ନୂଆଗଡ ବ୍ଲକ ଆଞ୍ଚଳିକ ଉନ୍ନୟନ କମିଟି ତରଫରୁବ୍ଲକର ବିଭିନ୍ନ ସମସ୍ୟାକୁ ନେଇ ୫ଦଫା ଦାବୀ ସମ୍ବଳିତ ସ୍ମାରକପତ୍ର ଗଜପତି ଜିଲ୍ଲା ପ୍ରଶାସନକୁ ପ୍ରଦାନ କରାଯାଇଛି । ନୂଆଗଡ ପଞ୍ଚାୟତ ସମିତି ଅଧ୍ୟକ୍ଷା ଗୁଡୁବାଇ ମଣ୍ଡଳଙ୍କ ନେତୃତ୍ୱରେ ପ୍ରଦାନ କରାଯାଇଥିଲା । ଉକ୍ତ ଦାବୀପତ୍ରରେ ନୂଆଗଡ ପ୍ରାଣୀ ଚିକିତ୍ସାଳୟ ଠାରୁ ପଞ୍ଚାୟତ ସମିତି କାର୍ଯ୍ୟାଳୟ ପର୍ଯ୍ୟନ୍ତ ରାସ୍ତାର ପ୍ରଶସ୍ତିକରଣ,ନୂଆଗଡ ଓ କେରଡାଙ୍ଗ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଡାକ୍ତର ନିଯୁକ୍ତ କରିବା, ଉଚ୍ଚ କ୍ଷମତା ସମ୍ପର୍ଣ୍ଣ ମୋବାଇଲ ସେବା ପ୍ରଦାନ ସହ ନେଟୱାର୍କ ଜନିତ ଅସୁବିଧାକୁ ଦୂର କରିବା, ସରକାରଙ୍କ ତରଫରୁ ସ୍ଥିରକୃତ ହୋଇଥିବା ଲୁହାଙ୍ଗର ପଞ୍ଚାୟତର କୁୁମୁଜାଙ୍ଗ ଠାରେ ଏକଲବ୍ୟ

ଆଦର୍ଶ ବିଦ୍ୟାଳୟ ପ୍ରତିଷ୍ଠା କରିବା ଏବଂ ନୂଆଗଡ ବ୍ଲକର ନୂଆଗଡ ଓ କେରଡାଙ୍ଗ ଠାରୁ ରାୟଗଡା ଜିଲ୍ଲାକୁ ସଂଯୋଗ କରୁଥିବା ଆନ୍ତଃଜିଲ୍ଲା ରାସ୍ତା ନିର୍ମାଣ କରିବା ଇତ୍ୟାଦି ଦାବୀ ଉଲ୍ଲେଖ ରହିଛି । ଏହି ଦାବୀପତ୍ର ପ୍ରଦାନ ବେଳେ ନୂଆଗଡ ସରପଞ୍ଚ ମୀନ ମଣ୍ଡଳ,ଲୁହାଙ୍ଗର ସରପଞ୍ଚ ରବିନ୍ଦ୍ର ଭୂୟାଁ, କେରଡାଙ୍ଗ ସରପଞ୍ଚ ସୁବାଷ ଶବର, ପୂର୍ବତନ ପଞ୍ଚାୟତ ସମିତି ଉପାଧ୍ୟକ୍ଷ ରବିନ୍ଦ୍ର ସୁବୁଦ୍ଧି,ଦେବରତ୍ନ ଦେଶିନାୟକ,ଜାକ୍ୟୁବ ରାଇକାଙ୍କ ସମେତ ବହୁ ରାଜନେତା, ବୁଦ୍ଧିଜୀବି ଉପସ୍ଥିତ ଥିଲେ । ଜିଲ୍ଲା ପ୍ରଶାସନ ତରଫରୁ ୧୫ଦିନ ମଧ୍ୟରେ ସମସ୍ୟା ଗୁଡିକର ସମାଧାନ କରା ନଯାଏ ଏକ ବଡ ଧରଣର ଜନ ଆନ୍ଦୋଳନ କରାଯିବ ବୋଲି ଗଣମାଧ୍ୟମକୁ ସୂଚନା ପ୍ରଦାନ କରିଛନ୍ତି ।  ( ରିପୋର୍ଟ – ଗରୁଡ଼ ଧ୍ଵଜ ଚୌଧୁରୀ )