କରୋନାରେ ମୃତ୍ୟୁର ୧୮ଦିନ ପରେ ଘରକୁ ଆସିଲେ ବୃଦ୍ଧା – ଶୁଦ୍ଧିକ୍ରିୟା ସରିବା ପରଦିନ ବୃଦ୍ଧା ଘରେ ପହଞ୍ଚିବାରୁ ଆଚମ୍ବିତ

ଓଡ଼ିଶା ତାଜା ନ୍ୟୁଜ (୦୪ ଜୁନ ଶୁକ୍ରବାର ) ଆନ୍ଧ୍ରପ୍ରଦେଶ :- କରୋନାରେ ପ୍ରତି ଦିନ ହଜାର ହଜାର ଲୋକଙ୍କର ମୃତ୍ୟୁ ହେଉଛି । କରୋନା କାରଣରୁ ମୃତ୍ୟୁ ପରେ ଶବକୁ ପୁରା ସିଲ୍‌ କରି ପରିବାର ଲୋକଙ୍କୁ ହସ୍ତାନ୍ତର କରାଯାଉଛି । କିନ୍ତୁ ଆଜି ଏଭଳି ଏକ ଘଟଣା ସାମ୍ନାକୁ ଆସିଛି ଯାହା ଆପଣଙ୍କୁ ଆଶ୍ଚର୍ଯ୍ୟ କରିଦେବ । କରୋନାରେ ମୃତ୍ୟୁର ୧୮ଦିନ ପରେ ଘରକୁ ଆସିଲେ ବୃଦ୍ଧା । ଶୁଦ୍ଧିକ୍ରିୟା ସରିବା ପରଦିନ ବୃଦ୍ଧା ଘରେ ପହଞ୍ଚିବାରୁ ଆଚମ୍ବିତ ହୋଇଗଲେ ପରିବାର ଲୋକେ । ଘଟଣା ଘଟିଛି ଆନ୍ଧ୍ରପ୍ରଦେଶର କୃଷ୍ଣା ଜିଲ୍ଲାରେ ।

କରୋନା ଆକ୍ରାନ୍ତ ବୃଦ୍ଧା ଗିରିଜାମ୍ମାଙ୍କୁ ମେ ୧୨ ତାରିଖରେ ବିଜୟଓ୍ୱାଡ଼ାସ୍ଥିତ ସରକାରୀ ହସ୍ପିଟାଲରେ ଭର୍ତ୍ତି କରାଯାଇଥିଲା । ୧୫ ମେ’ରେ ଗିରିଜାମ୍ମାଙ୍କ ସ୍ୱାମୀ ହସ୍ପିଟାଲ ଯାଇଥିଲେ ବି ସେଠାରେ ତାଙ୍କୁ ପାଇ ନଥିଲେ । ବୃଦ୍ଧାଙ୍କର ମୃତ୍ୟୁ ହୋଇଯାଇଥିବା ହସ୍ପିଟାଲର ନର୍ସମାନେ କହିବା ସହ ପଲିଥିନରେ ବନ୍ଧା ଯାଇଥିବା ଏକ ମୃତଦେହ ପରିବାରକୁ ହସ୍ତାନ୍ତର କରାଯାଇଥିଲା ।

ତେବେ ଶବ ସତ୍କାର କରିବା ସହ ପରିବାର ପକ୍ଷରୁ ୧ଜୁନ୍‌ରେ ଏକ ଶୋକସଭାର ଆୟୋଜନ ମଧ୍ୟ କରାଯାଇଥିଲା । ହେଲେ ଏହା ପରଦିନ ଅର୍ଥାତ୍ ୨ ତାରିଖରେ ଗିରିଜାମ୍ମା ଘରକୁ ଫେରି ଆସିଥିଲେ । କରୋନରୁ ସୁସ୍ଥ ହେବା ପରେ ପରିବାର ଲୋକେ ତାଙ୍କୁ କେହି ଆଣିବାକୁ ଯାଇ ନଥିବାରୁ ହସ୍ପିଟାଲ ପକ୍ଷରୁ ତାଙ୍କୁ ବାଟ ଖର୍ଚ୍ଚ ପାଇଁ ୩ହଜାର ଟଙ୍କା ଯାଇଥିଲା ବୋଲି ବୃଦ୍ଧାଜଣକ କହିଛନ୍ତି । ପରିବାର ଲୋକଙ୍କ କହିବା କଥା ଯେ, ହସ୍ପିଟାଲ ପକ୍ଷରୁ ଯେଉଁ ମୃତଦେହ ଦିଆଯାଇଥିଲା, ସେମାନେ ତାକୁ ନଖୋଲି କବର ଦେଇଦେଇଥିଲେ । ତେବେ ଏ ଯାଏଁ ହସ୍ପିଟାଲ ବିରୋଧରେ କୌଣସି ଅଭିଯୋଗ କରାଯାଇ ନଥିବା ଜଣାପଡ଼ିଛି ।