No Result
View All Result
ଓଡ଼ିଶା ତାଜା ନ୍ୟୁଜ (୧୬ ମଇ ରବିବାର ) ଭୁବନେଶ୍ୱର :- ଭୁବନେଶ୍ୱର ସ୍ମାର୍ଟ ସିଟି ଲିମିଟେଡ୍ର ସବୁଠୁ ବଡ଼ ଆଖିଦୃଶିଆ ପ୍ରକଳ୍ପ ହେଉଛି ସ୍ମାର୍ଟ ଜନପଥ । ଶିଶୁଭବନ ଛକରୁ ବାଣୀବିହାର ପର୍ଯ୍ୟନ୍ତ ୫.୮କିମି ରାସ୍ତାକୁ ଏକ ନୂଆ ରୂପ ଦିଆଯାଉଥିବା ବେଳେ ଏମିତି କାମ ହେଉଛି ଯେ ସାଢ଼େ ତିନି ବର୍ଷ ହେଲା ସରୁନି । ଦୁଇ ବର୍ଷରେ ସରିବାକୁ ଥିବା ସ୍ମାର୍ଟ ଜନପଥ ପ୍ରକଳ୍ପର ଅବଧି ବାରମ୍ବାର ବଢ଼ିବା ପରେ ବିଏସ୍ସିଏଲ୍ର ପୂର୍ବତନ ସିଇଓ ପ୍ରେମଚନ୍ଦ୍ର ଚୌଧରୀ, ପୂର୍ବତନ ମହାପ୍ରବନ୍ଧକ (ଇଞ୍ଜିନିୟରିଂ) ଅଶ୍ବିନୀ ବିଶ୍ବାଳ ସେତେବେଳେ କହିଥିଲେ ଯେ ମେ’ ୨୦୨୧ରେ ସ୍ମାର୍ଟ ଜନପଥ କାର୍ଯ୍ୟ ନିହାତି ସରିବ। ଏପରିକି ଏହି ରାସ୍ତା ନେଇ ଦିନକୁ ଦିନ ଅସନ୍ତୋଷ ବଢ଼ୁଥିବାରୁ ଦୁଇ ଅଧିକାରୀ ବିଏସ୍ସିଏଲ୍ର ବୋର୍ଡ ବୈଠକରେ ବୋର୍ଡର ଅଧ୍ୟକ୍ଷ ଓ ସଦସ୍ୟମାନଙ୍କୁ ସମୟସୀମା ମଧ୍ୟରେ ସାରିବାକୁ ନିର୍ଭର ପ୍ରତିଶ୍ରୁତି ଦେଇଥିଲେ ।
ଯେଉଁଥିପାଇଁ ବିଏସ୍ସିଏଲ୍ ବୋର୍ଡ ବିଭିନ୍ନ ପ୍ରକଳ୍ପର ଅବଧି ଡିସେମ୍ବର ମାସରେ ୬ ମାସ ବଢ଼ାଇଥିଲା। ଏହା ଅନୁଯାୟୀ ସ୍ମାର୍ଟ ଜନପଥ ଏବଂ ରାଜମହଲ, ସହିଦନଗର ବହୁତଳ କାର୍ ପାର୍କିଂ ନିର୍ମାଣ କାମ ଚଳିତ ମାସରେ ସରିବା କଥା। ହେଲେ ଏହି ସବୁ ପ୍ରକଳ୍ପର ସ୍ଥିତି, ଏବେ ସରିବା ଭଲି ଲାଗୁ ନାହିଁ। ଆହୁରି ୬ମାସରୁ ଅଧିକ ସମୟ ଲାଗିପାରେ ବୋଲି ଜଳଜଳ ଦିଶୁଛି। ତେଣୁ ବାବୁମାନେ ଏବେ ପୁଣି କରୋନାକୁ ଢାଲ କରିବାକୁ ସଜବାଜ ହେଲେଣି। କିନ୍ତୁ କରୋନା କାୟା ମେଲାଇବା ପୂର୍ବରୁ ଯେଉଁ କାମ ସରିବାର ଥିଲା, ସେ କାମ କାହିଁକି କରୋନା ପାଇଁ ପ୍ରଭାବିତ ହେବ ବୋଲି କିଏ ପଚାରିବ..?
ଏ ସଂପର୍କରେ ବିଏସ୍ସିଏଲ୍ର ମହାପ୍ରବନ୍ଧକ (ଇଞ୍ଜିନିୟରିଂ) ସରୋଜ ରଂଜନ ଦାସଙ୍କୁ ପଚାରିବାରୁ ସେ କହିଛନ୍ତି ଯେ କରୋନା ପାଇଁ ବାହାରକୁ ବାହାରି ହେଉନି । କେଉଁ ପ୍ରକଳ୍ପ କ’ଣ ହେଲା, ଏବେ କହି ହେବନି । ମୁଁ ନୂଆ ଆସିଛି ମୁଁ ଜାଣିନି । ବିଏସ୍ସିଏଲ୍ର ଇଞ୍ଜିନିୟରିଂ ମୁଖ୍ୟ ଏପରି ଉତ୍ତର ଦେଲେ ଯେ ସେ ପ୍ରକଳ୍ପ ବିଷୟରେ କେତେ ଜାଣିଛନ୍ତି, ତାହା ଜଣାପଡ଼ିଗଲା । ଅକ୍ଟୋବର ୨୦୧୭ରେ ଏହି ସ୍ମାର୍ଟ ଜନପଥ କାମ ଆରମ୍ଭ ହୋଇଥିବା ବେଳେ ଦୁଇ ବର୍ଷରେ ଅର୍ଥାତ୍ ଅକ୍ଟୋବର ୨୦୧୯ରେ ଶେଷ ହେବାର ଥିଲା । କିନ୍ତୁ ସରିଲାନି।
ଏହାପରେ ପ୍ରକଳ୍ପ ଅବଧି ତିନିଥର ବଢ଼ିବା ପରେ ଏହା ମେ’ ମାସକୁ ଧାର୍ଯ୍ୟ ହୋଇଥିଲା। ହେଲେ ସରିଲାନି, ବରଂ ବିଏସ୍ସିଏଲ୍ କର୍ତ୍ତୃପକ୍ଷ ବିଭିନ୍ନ ସମୟରେ ବାତ୍ୟା, ସାଧାରଣ ନିର୍ବାଚନ, କରୋନା ଲକ୍ଡାଉନ୍, ଶ୍ରମିକ ଧର୍ମଘଟ, ଗେଲ୍ ଓ ଓପିଟିସିଏଲ୍ର କାମ ବିଳମ୍ବ ଭଳି ବାହନା ଦେଖାଇ ୨ ବର୍ଷର ପ୍ରକଳ୍ପକୁ ସାଢ଼େ ତିନି ବର୍ଷ ଅତିକ୍ରମ କରାଇଦେଲେଣି। ତଥାପି ବି କାମ ସରିଲାନି। ଫଳରେ ନିର୍ମାଣ ଖର୍ଚ୍ଚ ୭୯.୫୬ଲକ୍ଷରୁ ୮୨.୫୬ଲକ୍ଷକୁ ବଢ଼ିଗଲା। ଏବେ ବହୁ ସ୍ଥାନରେ ଫୁଟପାଥ୍ରେ ଟାଇଲ୍ ପଡ଼ିବା ବାକି ଥିବା ବେଳେ ଡ୍ରେନ୍ କାମ ବି ବାକି ଅଛି। ସୌନ୍ଦର୍ଯ୍ୟୀକରଣ କାମ ବି ହେବ। ଏହାପରେ ରାସ୍ତା ହେବ। ଯେତିକି କାମ ଅଛି, ସେତକ ସରିବାକୁ ଅତି କମ୍ରେ ଆଉ ୬ ମାସ ଲାଗିବ। ଅପେକ୍ଷା ଏଥିପାଇଁ ବିଏସ୍ସିଏଲ୍ କର୍ତ୍ତୃପକ୍ଷ ନୂଆ ଡେଟ୍ଲାଇନ୍ କ’ଣ ରଖୁଛନ୍ତି।
୧୨ ମାସରେ ସରିବାର ଥିଲା, ୪୨ ମାସରେ ବି ସରିନିସହିଦନଗର, ରୁପାଲି ଆଦି ଅଞ୍ଚଳରେ ଯେପରି ପାର୍କିଂ ସମସ୍ୟା ରହିବନି, ସେଥିପାଇଁ ସହିଦନଗରରେ ଥିବା ନନ୍ଦନକାନନ ଅଫିସ୍ ନିକଟରେ ୦.୭୩୪ ଏକର ଜମିରେ ବହୁତଳ ଏକ କାର୍ ପାର୍କିଂସ୍ଥଳୀ ନିର୍ମାଣ ହେଉଛି। ନଭେମ୍ବର, ୨୦୧୭ରେ ଆରମ୍ଭ ହୋଇଥିବା ଏହି ପ୍ରକଳ୍ପ ବର୍ଷକରେ ଅର୍ଥାତ୍ ନଭେମ୍ବର, ୨୦୧୮ରେ ଶେଷ ହୋଇଥା’ନ୍ତା। ହେଲେ ଧାର୍ଯ୍ୟ ସମୟ ପରେ ଅଢ଼େଇ ବର୍ଷ ବିତିଗଲାଣି। ୧୨ମାସରେ ସରିବାକୁ ଥିବା ପ୍ରକଳ୍ପ ୪୨ମାସ ଅତିକ୍ରମ କରିସାରିଲାଣି। କିନ୍ତୁ କେବେ ସରିବ, ବିଏସ୍ସିଏଲ୍ କର୍ତ୍ତୃପକ୍ଷଙ୍କ ନିକଟରେ ଉତ୍ତର ନାହିଁ। ୭ ମହଲା ବିଶିଷ୍ଟ ଏହି ବହୁତଳ କାର୍ ପାର୍କିଂସ୍ଥଳୀରେ ବେସ୍ମେଣ୍ଟରେ ଅର୍ଥାତ୍ ମାଟି ତଳେ ଦୁଇଟି ମହଲା ରହିବ ଓ ଉପରେ ୫ଟି ମହଲା ରହିବ।
ବେସ୍ମେଣ୍ଟର ଦୁଇ ମହଲା ଏବଂ ଗ୍ରାଉଣ୍ଡଫ୍ଲୋର୍ରେ ୨୫୦ଟି କାର୍ ପାର୍କିଂ ବ୍ୟବସ୍ଥା ରହିବ। ବାକି ୪ ମହଲା ବ୍ୟାବସାୟିକ ଉଦ୍ଦେଶ୍ୟରେ ବ୍ୟବହାର ହେବ। ଏଠାରେ ବିଭିନ୍ନ ଅଫିସ୍, ଦୋକାନ ଓ ରେସ୍ତୋରାଁ ପାଇଁ ସ୍ଥାନ ରହିବ। ପ୍ରାୟ ୩୮ ହଜାର ବର୍ଗଫୁଟର ଅଞ୍ଚଳ ଏଥିପାଇଁ ରହିବ। ଏହାକୁ ଭଡ଼ାସୂତ୍ରରେ ଦିଆଯିବ କିମ୍ବା ବିକ୍ରି କରାଯିବ। ସେହିପରି ୟୁନିଟ-୧ ହାଟ, ୟୁନିଟ-୨ ମାର୍କେଟ୍ ବିଲଡିଂ ଅଞ୍ଚଳର ପାର୍କିଂ ସମସ୍ୟାର ସମାଧାନ ପାଇଁ ଏଜିରୁ ରାଜମହଲ ଛକ ମଝିରେ ଏହି ବହୁତଳ ପାର୍କିଂସ୍ଥଳୀ ନିର୍ମାଣ ହେଉଛି। ଏଠାରେ ବି ସହିଦନଗର ବହୁତଳ ପାର୍କିଂସ୍ଥଳୀ ବି ସୁବିଧା ରହିବ। କିନ୍ତୁ ୪୫୦ଟି କାର୍ ପାର୍କିଂ ବ୍ୟବସ୍ଥା ରହିବ। ଏକ ଏକରରୁ ଅଧିକ ଜାଗାରେ ନିର୍ମାଣ ହେଉଥିବା ଏହି ପାର୍କିଂସ୍ଥଳୀ ୭ମହଲା ବିଶିଷ୍ଟ ହେଉଛି। ବେସ୍ମେଣ୍ଟର ଦୁଇ ମହଲା ଓ ଗ୍ରାଉଣ୍ଡଫ୍ଲୋର୍ରେ ୪୫୦ଟି କାର୍ ପାର୍କିଂ ବ୍ୟବସ୍ଥା ରହିବ।
ଏହାବାଦ୍ ବିଭିନ୍ନ ବ୍ୟାବସାୟିକ ବ୍ୟବହାର ପାଇଁ ୫୭ ହଜାର ବର୍ଗଫୁଟ୍ ଅଞ୍ଚଳ ରହିବ। ଏଠାରେ ଦୋକାନ, ଅଫିସ୍, ରେସ୍ତୋରାଁ, କାଫେଟେରିଆ ପାଇଁ ସ୍ବତନ୍ତ୍ର ଜାଗା ରହିବ। ସହିଦନଗରରେ ବହୁତଳ ପାର୍କିଂସ୍ଥଳୀ ନିର୍ମାଣ କରୁଥିବା ସଂସ୍ଥା ବି ଏହାକୁ ନିର୍ମାଣ କରୁଛି। ସେଠାରେ ଯେପରି ବିଳମ୍ବ କରୁଛି, ଏଠାରେ ବି ସେମିତି ବିଳମ୍ବ ହୋଇ ଚାଲିଛି। ନଭେମ୍ବର, ୨୦୧୭ରେ ଆରମ୍ଭ ହୋଇଥିବା ଏହି ପ୍ରକଳ୍ପ ଏପ୍ରିଲ, ୨୦୧୯ରେ ସରିବାର ଥିଲା। ହେଲେ ୪୨ ମାସ ପରେ ବି ସରିଲାନି। ଏହି ଦୁଇଟି ବହୁତଳ କାର୍ ପାର୍କିଂ ମେ’ ସୁଦ୍ଧା ସରିବାର ଥିଲା। ଏବେ ତ ସରିଲାନି, ନିକଟ ଭବିଷ୍ୟତରେ ସରିବା ଭଳି ଦେଖାଯାଉନି (ରିପୋର୍ଟ ଭଞ୍ଜ ବିହାରୀ ମହାନ୍ତି )
No Result
View All Result
