ମଦ୍ୟପଙ୍କ ଠେଙ୍ଗା ମାଡ଼ରେ ଦମ୍ପତି ଗୁରୁତର

ଓଡ଼ିଶା ତାଜା ନ୍ୟୁଜ୍ ( ୨୦ ଏପ୍ରିଲ , ମଙ୍ଗଳବାର ) ହିଞ୍ଜିଳିକାଟୁ :- ହିଞ୍ଜିଳି ଥାନା କଂଚୁରୁ ଗ୍ରାମରେ ଏକ ଅଭାବନୀୟ ଘଟଣଶ ଘଟିଛି । ମଦ ନିଶାରେ ଚୂର ହୋଇ ଜୈନିକ ମଦ୍ୟପର ଠେଙ୍ଗା ମାଡ଼ରେ ସ୍ୱାମୀ-ସ୍ତ୍ରୀ ଗୁରୁତର ଆହତ ହୋଇଛନ୍ତି । ଆହତ ମାନେ ହେଲେ ଗୋବିନ୍ଦ ସେଠି (୫୮) ଓ ତାଙ୍କ ସ୍ତ୍ରୀ ପାର୍ବତି ସେଠି (୫୦) । ଏ ନେଇ ହିଞ୍ଜିଳି ଥାନାରେ ୧୭୯/୨୧ରେ ଏକ ମାମଲା ରୁଜୁ କରି ପୁଲିସ ଘଟଣାର ତଦନ୍ତ ଚଳାଇଛି । ପ୍ରକାଶ ଯେ, ସୋମବାର ସକାଳେ ହିଞ୍ଜିଳି ଥାନା କଂଚୁରୁ ଗ୍ରାମର ମହିଳା ଜଣକ ଘର ବାରଣ୍ଡାରେ ଠିଆ ହୋଇଥିବା ବେଳେ ସେହି ଗ୍ରାମର ବସନ୍ତ ନାୟକ ମଦ୍ୟପାନ କରି ମହିଳାଙ୍କୁ ଅସଭ୍ୟ ଭାଷାରେ ଗାଳି ଗୁଲଜ କରିଥିଲା । ମହିଳା ଜଣକ ପ୍ରତିବାଦ କରିବାରୁ ଯୁବକ ଜଣକ ଉତ୍ୟକ୍ତ ହୋଇ ଧରିଥିବା ଏକ ଠେଙ୍ଗା ସାହାର୍ଯ୍ୟରେ ମହିଳାଙ୍କୁ ଆକ୍ରମଣ କରିଥିଲେ । ମହିଳା ଜଣକଙ୍କ ଚିତ୍କାର ଶୁଣି ଘରେ ଥିବା ମହିଳାଙ୍କ ସ୍ୱାମୀ ପ୍ରତିବାଦ କରିବାରୁ ତାଙ୍କୁ ମଧ୍ୟ ଆକ୍ରମଣ କରିଥିଲା । ଆକ୍ରମଣରେ ସ୍ୱାମୀ-ସ୍ତ୍ରୀ ଆହତ ହୋଇଥିଲେ । ସ୍ଥାନୀୟ ଲୋକେ ଆହତଙ୍କୁ ଉଦ୍ଧାର କରି ଚିକିତ୍ସା ସକାଶେ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତି କରିଥିଲେ । ଘଟଣା ନେଇ ଗୋବିନ୍ଦ ହିଞ୍ଜିଳି ଥାନାରେ ଅଭିଯୋଗ କରିଥିଲେ ।

ଘଟଣା ପରେ ଆକ୍ରମଣକାରୀ ଯୁବକ ଫେରାର ହୋଇ ଯାଇଥିଲେ । ପିକ୍‌ଅପ ଭ୍ୟାନ୍ ସହ ବାଇକ ମୁହାଁମୁହିଁ : ଜଣେ ମୃତ, ୨ ଗୁରୁତର ହିଞ୍ଜିଳିକାଟୁ, ୨୦ା୪ (ଓଡ଼ିଶା ତାଜା ନ୍ୟୁଜ, ଶୁସାନ୍ତ ପ୍ରଧାନ): ମଙ୍ଗଳବାର ଅପରାହ୍ନରେ ହିଞ୍ଜିଳି ଥାନା ନିମିଗାଁ ଛକ ନିକଟରେ ଏକ ପିକଅପ୍ ଭ୍ୟାନ ସହ ମୋଟର ସାଇକେଲର ମୁହାଁମୁହିଁ ଧକ୍କା ଘଟିବାରୁ ଜଣଙ୍କର ମୃତ୍ୟୁ ଘଟିଥିବା ବେଳେ ୨ଜଣ ଗୁରୁତର ଆହତ ହୋଇ ବ୍ରହ୍ମପୁର ବଡ଼ ଡ଼ାକ୍ତରଖାନାରେ ଚିକିତ୍ସିତ ହେଉଥିବା ଜଣାପଡ଼ିଛି । ମୃତକ ଜଣକ ହିଞ୍ଜିଳି ଥାନା ରାଳବ ଗ୍ରାମର ଶିବରାମ ପାଣ୍ଡି (୧୭) ଓ ଆହତ ମାନେ ସେହି ଗ୍ରାମର ମନୋଜ କୁମାର ପ୍ରଧାନ (୨୦) ଓ ଜିତୁ ପୃଷ୍ଟି (୨୩) । ପ୍ରକାଶ ଯେ, ରାଳବ ଗ୍ରାମର ୩ ବନ୍ଧୁ କୌଣସି କାମରେ ବାଇକ ଯୋଗେ ନିମିଗାଁ ଅଭିମୂଖେ ଯାଉଥିବା ବେଳେ ବିପରୀତ ଦିଗରୁ ଆସୁଥିବା ଏକ ପିକଅପ୍ ଭ୍ୟାନ ସହ ମୁହାଁମୁହିଁ ଧକ୍କା ଘଟିଥିଲା । ଦୂର୍ଘଟଣାରେ ୩ ଗୁରୁତର ଆହତ ହୋଇଥିଲେ । ସ୍ଥାନୀୟ ଗ୍ରାମବାସୀ ଆହତଙ୍କୁ ଉଦ୍ଧାର କରି ଚିକିତ୍ସା ସକାଶେ ୧୦୮ ଆମ୍ବୁଲାନ୍ସ ଯୋଗେ ବ୍ରହ୍ମପୁର ବଡ଼ ଡ଼ାକ୍ତରଖାନାରେ ଭର୍ତି କରିଥିଲେ । ସେଠାରେ ଶିବରାମଙ୍କୁ, ଡ଼ାକ୍ତର ମୃତ ଘୋଷଣା କରିଥିଲେ । ଅନ୍ୟ ୨ଜଣ ଗୁରୁତର ଆହତ ଖବର ଲେଖା ହେବା ସୁଦ୍ଧା ଚିକିତ୍ସିତ ହେଉଥିବା ଜଣାପଡ଼ିଛି । ଦୂର୍ଘଟଣା ପରେ ଭ୍ୟାନ ଚାଳକ ଘଟଣା ସ୍ଥଳରୁ ଫେରାର ହୋଇଯିବାରେ ସକ୍ଷମ ହୋଇଛି । ଖବର ଲେଖା ହେବା ସୁଦ୍ଧା ଏ ନେଇ ହିଞ୍ଜିଳି ଥାନାରେ କୌଣସି ମାମଲା ରୁଜୁ ହୋଇନଥିବା ଥାନା ଭାରପ୍ରାପ୍ତ ଅଧିକାରୀ ଅଭିମନ୍ୟୁ ଦାସ କହିଛନ୍ତି ।    ( ରିପୋର୍ଟ ଶୁସାନ୍ତ ପ୍ରଧାନ )