ଫସଲ ନଷ୍ଟ କଲେ ହାତୀପଲ , ଜଗିଛି ଜଙ୍ଗଲ ବିଭାଗ

ଓଡ଼ିଶା ତାଜା ନ୍ୟୁଜ (୧୫ ଜାନୁଆରୀ ଶୁକ୍ରବାର ) ହିଞ୍ଜିଳିକାଟୁ :–  ଗତ ସୋମବାର ଠାରୁ ୩ ଦିନ ଧରି ଏକ ୧୪ ଜଣିଆ ହାତୀପଲ ହିଞ୍ଜିଳି ବନ ବିଭାଗ ଅନ୍ତର୍ଗତ ରଂଗୁଣୀପଲ୍ଲୀ ଓ ପଲ୍ଲୀପଦ୍ମନାଭପୁର ସମେତ ଆଖ ପାଖରେ ପ୍ରବେଶ କରି ବ୍ୟାପକ ଫସଲ ନଷ୍ଟ କରିଥିବା ଜଣାପଡିଛି । ଚାଷ ଜମିରେ ଗଛିତ ଥିବା ଧାନ ଫସଲ ସହ ଅନ୍ୟାନ୍ୟ ଫସଲ ଜାତୀୟ ଶସ୍ୟ ସବୁ ନଷ୍ଟ କରିଥିବା ନେଇ ଅଞ୍ଚଳର ବହୁ ଚାଷୀ ସ୍ଥାନୀୟ ବନ ବିଭାଗକୁ ଖବର ଦେଇଥିଲେ । ପରେ ବ୍ରହ୍ମପୁର ବନଖଣ୍ଡ ବିଭାଗର ମୁଖ୍ୟ ଅଧିକାରୀ ଅମ୍ଳାନ ନାୟକଙ୍କ ନିର୍ଦ୍ଦେଶ କ୍ରମେ ଦିଗପହଣ୍ଡି ଓ ବ୍ରହ୍ମପୁର ବନାଞ୍ଚଳର ମୋବାଇଲ ଷ୍ଟାଫ ସମେତ ସ୍ଥାନୀୟ ବନ ବିଭାଗର ଏକ ୨୫ ଜଣିଆ କର୍ମଚାରୀ ହାତୀ ପଲଙ୍କୁ ଘଉଡାଇବା ଏବଂ ସ୍ଥାନୀୟ ଲୋକଙ୍କ ଧନ ଜୀବନ ସୁରକ୍ଷା ବ୍ୟବସ୍ଥା ପ୍ରତି ଦୃଷ୍ଟି ଦେଇଥିବା ଜଣାପଡ଼ିଛି । ହାତୀପଲ ମଧ୍ୟରେ ୭ ମାଈ ହାତୀ , ୫ଟି ମଝିଲା ହାତୀ ଓ ୨ ଟି ଛୁଆ ହାତୀ ଥିବା ସୂଚନା ମିଳିଛି ।ରାତ୍ରୀ ସମୟରେ ହାତୀପଲ ଗାଁ ମୁହାଁ ଆଶଙ୍କା ଥିବାରୁ ବଡ଼ଖଣ୍ଡି ଫିଡର ଅଧିନ ଗାଁ ଗୁଡିକର ବିଦ୍ୟୁତ ସରବରାହ ବ୍ୟାହତ ହୋଇଛି ।

ଫଳରେ ସମରଝୋଳ, ବଡ଼ଖଣ୍ଡି, ମକରଝୋଳ , ଭେଙ୍କେଟରାୟ ପଲ୍ଲୀ , ବଳରାମପୁର, ପୋଚିଲିମ୍ମା, ପଲ୍ଲୀ ପଦ୍ମନାଭପୁର ସମେତ ବହୁ ଗ୍ରାମ ରାତ୍ର ୯ ଘଣ୍ଟା ଠାରୁ ପରଦିନ ସକାଳ ୭ ଟା ପର୍ଯ୍ୟନ୍ତ ବିଦ୍ୟୁତ ସରବରାହ ବନ୍ଦ ହୋଇଥିବା ସାଉଥକୋର ସହକାରୀ ନିର୍ବାହୀ ଯନ୍ତ୍ରୀ ଇଂସତ୍ୟ ନାରାୟଣ ଦାଶ ସୂଚନା ଦେଇଛନ୍ତି । ହାତୀପଲଙ୍କ ଅବସ୍ଥିତି ସମ୍ପର୍କରେ ସ୍ଥାନୀୟ ବନ ବିଭାଗର ବନପାଳ ବାଲାଜି ରେଡ୍ଡୀଙ୍କ ସହ ଯୋଗାଯୋଗ ବେଳେ ସମ୍ପ୍ରତି ହାତୀପଲ ନିକଟସ୍ଥ ଜଙ୍ଗଲ ମଧ୍ୟକୁ ଚାଲି ଯାଇଛନ୍ତି । ପୁଣି ସନ୍ଧ୍ୟା ସମୟରେ ଖାଦ୍ୟ ଅନ୍ବେଷଣ ସକାଶେ ଗାଁ ମୁହାଁ ହେବା ଆଶଙ୍କା ଥିବାରୁ ସମସ୍ତ କର୍ମଚାରୀ ସଜାଗ ଅଛନ୍ତି ବୋଲି ସେ ସୂଚନା ଦେଇଛନ୍ତି । ହିଞ୍ଜିଳିବ୍ଲକର ସମ୍ପୃକ୍ତ ଗ୍ରାମ ଗୁଡ଼ିକରେ ବାରମ୍ବାର ହାତୀପଲ ପ୍ରବେଶ କରି ଅଞ୍ଚଳର ବ୍ୟାପକ ଫସଲ ନଷ୍ଟ କରୁଥିବା ବେଳେ ଧନ ଜୀବନ ପ୍ରଭାବିତ ହେବାରେ ଲାଗିଛି । କ୍ଷତିଗ୍ରସ୍ତଙ୍କୁ ବିଭାଗୀୟ ସହାୟତା ପ୍ରଦାନ ନିମନ୍ତେ ଉଚ୍ଚ କତ୍ତୁର୍ପକ୍ଷଙ୍କ ଦୃଷ୍ଟି ଆକର୍ଷଣ କରିଥିବା ଜଣାପଡ଼ିଛି । ( ରିପୋର୍ଟ ଶୁସାନ୍ତ ପ୍ରଧାନ )