ସହରକୁ ସ୍ବଚ୍ଛ ରଖିବା ନିମନ୍ତେ ପୌରସଂସ୍ଥା ପକ୍ଷରୁ ଅଭିଯାନ – ପୁରୀ

ଓଡ଼ିଶା ତାଜା ନ୍ୟୁଜ (୧ ଜାନୁଆରୀ ଶୁକ୍ରବାର) ପୁରୀ :- ସହରକୁ ସ୍ବଚ୍ଛ ରଖିବା ନିମନ୍ତେ ପୌରସଂସ୍ଥା ପକ୍ଷରୁ ଅଭିଯାନ ଜାରି ରହିଛି । ଇଂରାଜୀ ନବବର୍ଷକୁ ଭିନ୍ନ ଢଙ୍ଗରେ ପାଳନ କରିବା ନିମନ୍ତେ ଆଜି ବଡଦାଣ୍ଡ ସେବା କରାଯାଇଛି । ବଡଦାଣ୍ଡର ୬ଟି ସ୍ଥାନ ଶ୍ରୀ ଜଗନ୍ନାଥ ମନ୍ଦିର କାର୍ଯ୍ୟାଳୟ, ମର୍ଚ୍ଚିକୋଟ, ମାର୍କେଟଛକ, ଡାକ୍ତରଖାନା ଛକ, ବଡଶଙ୍ଖ ଓ ଗୁଣ୍ଡିଚା ମନ୍ଦିର ନିକଟରେ ସଫେଇ କାର୍ଯ୍ୟକ୍ରମ କରାଯାଇଛି । ପ୍ରଥମେ ଶ୍ରୀ ମନ୍ଦିର କାର୍ଯ୍ୟାଳୟରୁ ଏହି ଅଭିଯାନ ଆରମ୍ଭ ହୋଇଥିଲା ।

ଏହି ଅବସରରେ ସଫେଇ ସଚେତନତା ରଥ ବଡଦାଣ୍ଡର ଏହି ୬ଟି ସ୍ଥାନରେ ବୁଲିବା ସହ ସ୍ବଚ୍ଛତା ବାର୍ତ୍ତା ବଣ୍ଟନ କରିଥିଲେ । ଏହି ଅବସରରେ ସବୁ ସ୍ଥାନରେ ସମବେତ ପ୍ରାର୍ଥନା କରାଯାଇଥିଲା । ବଡଦାଣ୍ଡର ଉଭୟ ପାର୍ଶ୍ବରେ ଥିବା ବାସିନ୍ଦା, ଦୋକାନୀ, ଉଠା ଦୋକାନୀ, ହୋଟେଲ ବ୍ୟବସାୟୀ ପ୍ରମୁଖ ସ୍ବଚ୍ଛ ସବାରୀରେ ଆବର୍ଜନା ପକାଇବା ସହ ବଡଦାଣ୍ଡକୁ ସଫା ରଖିବା ନିମନ୍ତେ ଶପଥ ନେଇଥିଲେ ।

ଏଥିସହ ସଫେଇ କର୍ମଚାରୀଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଛି । ବିଧାୟକ ଜୟନ୍ତ କୁମାର ଷଡଙ୍ଗୀ, ଜିଲ୍ଲାପାଳ ବଲୱନ୍ତ ସିଂହଁ , ପୌର ସଂସ୍ଥା ନିର୍ବାହୀ ଅଧିକାରୀ ବିଜୟ କୁମାର ଦାଶଙ୍କ ସମେତ ବରିଷ୍ଠ ଅଧିକାରୀ ଓ କର୍ମଚାରୀ ଉପସ୍ଥିତ ରହି ଜନସାଧାରଣ ଓ ସଫେଇ କର୍ମଚାରୀଙ୍କୁ ଉତ୍ସାହିତ କରିଥିଲେ ।