୩୧୧ କୋଟି ଟଙ୍କାର ବଜେଟ୍ ଏବଂ ବ୍ୟାପକ ସ୍କ୍ରିନିଂ ସହିତ କର୍କଟ ଚିକିତ୍ସାକୁ ସୁଦୃଢ଼ କରିବା ପାଇଁ ଓଡ଼ିଶା ପ୍ରତିବଦ୍ଧ : ସ୍ୱାସ୍ଥ୍ୟ ମନ୍ତ୍ରୀ

ସ୍ଥାୟୀ ଆର୍ଥିକ ବ୍ୟବସ୍ଥା ମାଧ୍ୟମରେ ଓଡ଼ିଶାର କର୍କଟ ଚିକିତ୍ସା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ଫିକି (FICCI)ର ଜାତୀୟ ଆଲୋଚନାଚକ୍ର

ଭୁବନେଶ୍ୱର (ଓଡିଶା ତାଜାନ୍ୟୁଜ ) ନି. ପ୍ର :- ଓଡ଼ିଶାରେ କର୍କଟ ରୋଗର ଉନ୍ନତ ଚିକିତ୍ସା ବ୍ୟବସ୍ଥା ଉପରେ ଆଲୋଚନା କରିବା ପାଇଁ ଫିକି ପକ୍ଷରୁ ‘ଅନକୋଫାର୍ମା ୨୦୨୬’ (OncoPharma 2026) ଶୀର୍ଷକ ଏକ ଗୋଲଟେବୁଲ ବୈଠକ ଅନୁଷ୍ଠିତ ହୋଇଯାଇଛି । ଏଥିରେ ବରିଷ୍ଠ ସରକାରୀ ଅଧିକାରୀ, ଡାକ୍ତର, ହସ୍ପିଟାଲ ପ୍ରତିନିଧି, ଜନସ୍ୱାସ୍ଥ୍ୟ ବିଶେଷଜ୍ଞ ଏବଂ ଶିଳ୍ପ ଜଗତର ପ୍ରମୁଖ ବ୍ୟକ୍ତିମାନେ ଯୋଗ ଦେଇଥିଲେ । ଏହି କାର୍ଯ୍ୟକ୍ରମରେ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ. ମୁକେଶ ମହାଲିଙ୍ଗ କହିଛନ୍ତି ଯେ, ରାଜ୍ୟରେ ଏକ ସୁଦୃଢ଼ ଏବଂ ସହଜଲଭ୍ୟ କର୍କଟ ଚିକିତ୍ସା ବ୍ୟବସ୍ଥା ଗଠନ ପାଇଁ ସରକାର ପ୍ରତିବଦ୍ଧ ।

‘ମୁଖ୍ୟମନ୍ତ୍ରୀ କ୍ୟାନ୍ସର କେୟାର ଯୋଜନା’ ଅଧୀନରେ ୩୧୧ କୋଟି ଟଙ୍କାର ବଜେଟ୍ ବ୍ୟବସ୍ଥା କରାଯାଇଛି। ରାଜ୍ୟର ୩୨ଟି ଜିଲ୍ଲାରେ ଡେ-କେୟାର କେମୋଥେରାପି କେନ୍ଦ୍ର ଖୋଲାଯାଇ ସ୍ଥାନୀୟ ସ୍ତରରେ ଚିକିତ୍ସା ସୁବିଧା ଯୋଗାଇ ଦିଆଯାଉଛି, ଯେଉଁଥିରେ ନିକଟରେ ୩୫,୦୦୦ରୁ ଅଧିକ ଚିକିତ୍ସା ସାଇକେଲ ପ୍ରଦାନ କରାଯାଇଛି।
ସେ ଆହୁରି ମଧ୍ୟ କହିଛନ୍ତି ଯେ: ଗରିବ ପରିବାର ଉପରୁ ଆର୍ଥିକ ବୋଝ କମାଇବା ପାଇଁ ସ୍ୱାସ୍ଥ୍ୟ ଯୋଜନାରେ ୯୧ଟି ବିଶେଷ କର୍କଟ ପ୍ୟାକେଜ୍ ସାମିଲ କରାଯାଇଛି।

କିଶୋରୀମାନଙ୍କ ପାଇଁ ଜାତୀୟ ଏଚ୍.ପି.ଭି.  ଟୀକାକରଣ ଅଭିଯାନ ଜାରି ରହିଛି। ‘ସୁସ୍ଥ ନାରୀ, ସଶକ୍ତ ପରିବାର’ କାର୍ଯ୍ୟକ୍ରମ ଅଧୀନରେ ୧.୫ କୋଟିରୁ ଅଧିକ ମହିଳାଙ୍କର ସ୍ତନ, ଗର୍ଭାଶୟ ଏବଂ ମୁଖ ଗହ୍ୱର କର୍କଟ ପାଇଁ ସ୍କ୍ରିନିଂ (ପରୀକ୍ଷା) କରାଯାଇଛି। ଗ୍ରାମାଞ୍ଚଳରେ ଉନ୍ନତ ରୋଗ ନିରୂପଣ ଓ ପରୀକ୍ଷା ସୁବିଧା ପହଞ୍ଚାଇବା ପାଇଁ ସେ ଘରୋଇ ସଂସ୍ଥା ଏବଂ କର୍ପୋରେଟ୍ ହାଉସଗୁଡ଼ିକୁ ସେମାନଙ୍କ ସି.ଏସ.ଆର. ପାଣ୍ଠି ମାଧ୍ୟମରେ ମୋବାଇଲ୍ ଭ୍ୟାନ୍ ନିୟୋଜିତ କରିବାକୁ ଆହ୍ୱାନ ଦେଇଛନ୍ତି।

ଫିକି ଓଡ଼ିଶା ରାଜ୍ୟ କାଉନସିଲର ଅଧ୍ୟକ୍ଷ ଶ୍ରୀ ଜଗନ୍ନାଥ ପି. ନାୟକ କହିଛନ୍ତି ଯେ, କର୍କଟ ଚିକିତ୍ସା କ୍ଷେତ୍ରରେ ହେଉଥିବା ନୂତନ ଅଗ୍ରଗତି ଯେପରି ଗ୍ରାମାଞ୍ଚଳ ସମେତ ପ୍ରତ୍ୟେକ ଆବଶ୍ୟକୀୟ ଲୋକଙ୍କ ପାଖରେ ପହଞ୍ଚିପାରିବ ତାହା ସୁନିଶ୍ଚିତ କରିବା ଜରୁରୀ। ସରକାର, ଡାକ୍ତର ଏବଂ ଶିଳ୍ପ ସଂସ୍ଥା ମିଳିତ ଭାବେ କାର୍ଯ୍ୟ କଲେ ଏକ ସୁଲଭ ଓ ସୁଦୃଢ଼ ଚିକିତ୍ସା ବ୍ୟବସ୍ଥା ଗଠନ ହୋଇପାରିବ।

ଡିଏମଇଟି  ନିର୍ଦ୍ଦେଶକ ଡ. ଦୁର୍ଗା ମାଧବ ଶତପଥୀ ରୋଗର ପ୍ରାଥମିକ ଚିହ୍ନଟ  ଉପରେ ଗୁରୁତ୍ୱ ଦେଇ କହିଥିଲେ ଯେ, ପ୍ରାରମ୍ଭିକ ପର୍ଯ୍ୟାୟରେ ରୋଗ ଧରାପଡ଼ିଲେ ଚିକିତ୍ସା ଅଧିକ ଫଳପ୍ରଦ ହୋଇଥାଏ। ତେଣୁ ଦୂରଦୂରାନ୍ତ ଅଞ୍ଚଳରେ ନିୟମିତ ସ୍କ୍ରିନିଂ ହେବା ଆବଶ୍ୟକ। ଡ୍ରଗ୍ କଣ୍ଟ୍ରୋଲର ମମିନା ପଟ୍ଟନାୟକ ତମାଖୁ ଓ ଇ-ସିଗାରେଟ୍ ଭଳି ନିକୋଟିନ୍ ଦ୍ରବ୍ୟର ବ୍ୟବହାର ଦ୍ୱାରା ବଢ଼ୁଥିବା ବିପଦ ସମ୍ପର୍କରେ ସତର୍କ କରାଇବା ସହ ରୋଗ ପ୍ରତିରୋଧକ ବ୍ୟବସ୍ଥା ଉପରେ ଗୁରୁତ୍ୱାରୋପ କରିଥିଲେ।

ଏହି ସମ୍ମିଳନୀରେ ସଠିକ୍ ସମୟରେ ରୋଗ ଚିହ୍ନଟ, ସୁଲଭ ଚିକିତ୍ସା ଏବଂ ସ୍ଥାୟୀ ଆର୍ଥିକ ବ୍ୟବସ୍ଥା ଉପରେ ଗୁରୁତ୍ୱ ଦିଆଯାଇଥିଲା, ଯାହାଦ୍ୱାରା କର୍କଟ ଜନିତ ମୃତ୍ୟୁହାର କମାଯାଇପାରିବ। ଏହି କାର୍ଯ୍ୟକ୍ରମରେ ଇୱାଇ  ନଲେଜ୍ ପାର୍ଟନର ଏବଂ ଆଷ୍ଟ୍ରାଜେନେକା, ଜନସନ ଆଣ୍ଡ ଜନସନ ଓ ନୋଭାର୍ଟିସ୍ ଇଣ୍ଡିଆ ଇଣ୍ଡଷ୍ଟ୍ରି ପାର୍ଟନର ଭାବେ ସହଯୋଗ କରିଥିଲେ।