ବାଣପୁର ସବ୍-ରେଜିଷ୍ଟ୍ରାରଙ୍କ ବଦଳି କେବେ! କାର୍ଯ୍ୟକଳାପକୁ ନେଇ ବଢ଼ୁଛି ଜନଅସନ୍ତୋଷ, ଉଠୁଛି ବିଭିନ୍ନ ପ୍ରଶ୍ନ

ବାଣପୁର (ଓଡ଼ିଶା ତାଜା ନ୍ୟୁଜ) (ନିପ୍ର) :- ବାଣପୁର ସବ୍-ରେଜିଷ୍ଟ୍ରାର କାର୍ଯ୍ୟାଳୟକୁ ନେଇ ଏବେ ସ୍ଥାନୀୟ ଅଞ୍ଚଳରେ ବିଭିନ୍ନ ଚର୍ଚ୍ଚା ଜୋର ଧରିଛି। ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ୁଥିବା ବେଳେ, ସବ୍-ରେଜିଷ୍ଟ୍ରାରଙ୍କ ବଦଳି କେବେ ହେବ ବୋଲି ପ୍ରଶ୍ନ ଉଠୁଛି। ଅଭିଯୋଗ ଅନୁଯାୟୀ, ସମ୍ପୃକ୍ତ ଅଧିକାରୀ ପ୍ରାୟ ଛଅ ବର୍ଷ ଧରି ଏକାଧାରରେ ବାଣପୁରରେ କାର୍ଯ୍ୟରତ ଅଛନ୍ତି । ଏତେ ଦୀର୍ଘ ସମୟ ଧରି ଏକ ସ୍ଥାନରେ ରହିବାକୁ ନେଇ ଲୋକଙ୍କ ମଧ୍ୟରେ ବିଭିନ୍ନ ସନ୍ଦେହ ଓ ପ୍ରଶ୍ନ ସୃଷ୍ଟି ହୋଇଛି ।

କେତେକ ମହଳରେ ଏପରି ମଧ୍ୟ ଆଲୋଚନା ହେଉଛି ଯେ, ଉକ୍ତ ଅଧିକାରୀଙ୍କର ଉଚ୍ଚସ୍ତରରେ ପ୍ରଭାବଶାଳୀ ସମ୍ପର୍କ ରହିଥିବାରୁ ତାଙ୍କ ବଦଳି ହେଉନାହିଁ । ଏପରିକି ବଦଳି ରୋକିବା ପାଇଁ ବିପୁଳ ଅର୍ଥ କାରବାର ହୋଇଥିବା ନେଇ ମଧ୍ୟ କେତେକ ଅଭିଯୋଗ ସାମ୍ନାକୁ ଆସିଛି । ତେବେ ଏହି ସମସ୍ତ ଅଭିଯୋଗର ସତ୍ୟତା ସ୍ପଷ୍ଟ ହୋଇନାହିଁ।
ଅନ୍ୟପଟେ, ରାଜ୍ୟ ସରକାରଙ୍କ ରାଜସ୍ୱ ବିଭାଗ ପକ୍ଷରୁ ସବ୍-ପ୍ଲଟ୍ ପଞ୍ଜୀକରଣ ଉପରେ କଟକଣା ଲାଗିଥିବା ସମୟରେ ମଧ୍ୟ କେତେକ ପ୍ଲଟ୍ ପଞ୍ଜୀକରଣ ହୋଇଥିବା ନେଇ ଚର୍ଚ୍ଚା ଚାଲିଛି। ଏହି ପଞ୍ଜୀକରଣ ପ୍ରକ୍ରିୟାରେ ଅନିୟମିତତା ଓ ଅର୍ଥ କାରବାର ହୋଇଥିବା ଅଭିଯୋଗ ଉଠିଛି ।

ଯଦି ଏହି ଅଭିଯୋଗରେ ସତ୍ୟତା ରହିଥାଏ, ତେବେ ଏହାର ନିରପେକ୍ଷ ତଦନ୍ତ କରି ଦୋଷୀଙ୍କ ବିରୋଧରେ ଆଇନଗତ ପଦକ୍ଷେପ ନିଆଯିବା ଦରକାର ବୋଲି ସାଧାରଣରେ ଦାବି ହେଉଛି । ବାଣପୁର ଛାଡ଼ି ଯିବାକୁ ସମ୍ପୃକ୍ତ ଅଧିକାରୀ କାହିଁକି ଅନିଚ୍ଛୁକ, ଏହା ପଛରେ କୌଣସି ସ୍ୱାର୍ଥ ରହିଛି କି ନାହିଁ, ସେନେଇ ମଧ୍ୟ ଲୋକମାନଙ୍କ ମଧ୍ୟରେ ପ୍ରଶ୍ନ ଉଠୁଛି । ଏହି ସମସ୍ତ ବିଷୟରେ ସରକାର ଓ ସମ୍ପୃକ୍ତ ବିଭାଗ ସ୍ପଷ୍ଟୀକରଣ ଦେବା ସହ ଆବଶ୍ୟକ ହେଲେ ନିରପେକ୍ଷ ତଦନ୍ତ କରିବାକୁ ସାଧାରଣ ଲୋକ ଦାବି କରୁଛନ୍ତି । ଖୁବ ଶୀଘ୍ର ପରବର୍ତ୍ତୀ ପର୍ଯ୍ୟାୟରେ କେଉଁ କେଉଁ ପ୍ଲଟକୁ ସରକାରଙ୍କ ନିର୍ଦ୍ଧେଶକୁ ଖାତିର ନ କରି ଅର୍ଥ ଲୋଭରେ ପଞ୍ଜିକରଣ କରିଥିଲେ ତାହାର ଖୁଲାସା କରାଯିବ l