ଆଦିବାସୀଙ୍କ ୯୫୦ ଏକର ଜମିକୁ ବେଆଇନ୍ ଭାବେ ଡାଲମିଆ କମ୍ପାନୀ ଓ ପ୍ରଶାସନ କରିଥିବା ଚଞ୍ଚକତାକୁ ଦୃଢ଼ ନିନ୍ଦା – ଆପ୍ ସାଂସଦ ଶ୍ରୀ ସଞ୍ଜୟ ସିଂ

ଆଦିବାସୀଙ୍କ ୯୫୦ ଏକର ଜମିକୁ ବେଆଇନ୍ ଭାବେ ଡାଲମିଆ କମ୍ପାନୀ ହାତକୁ ଟେକି ଦେଇଥିବାରୁ ଆପ୍ ସାଂସଦ ଶ୍ରୀ ସଞ୍ଜୟ ସିଂ ଓ ରାଜ୍ୟ ସଭାପତି ଶ୍ରୀ ନିଶିକାନ୍ତ ମହାପାତ୍ର ଆଦିବାସୀଙ୍କ ହିତର ସୁରକ୍ଷା ପାଇଁ ଦାବି ଜଣାଇଲେ

ସୁନ୍ଦରଗଡ଼ ଜିଲ୍ଲା (ଓଡ଼ିଶା ତାଜା ନ୍ୟୁଜ) (ନିପ୍ର) :- ସୁନ୍ଦରଗଡ଼ ଜିଲ୍ଲା ଅନ୍ତର୍ଗତ ରାଜଗାଙ୍ଗପୁର ଓ କୁତ୍ରା ବ୍ଲକର ୫ ଗୋଟି ପଞ୍ଚାୟତର ଆଦିବାସୀଙ୍କ ଜମିକୁ ରାଜ୍ୟ ସରକାର ଯେଉଁଭଳି ସମସ୍ତ ନିୟମକୁ ବେଖାତିର କରି ଡାଲମିଆ ସିମେଣ୍ଟ କମ୍ପାନୀକୁ ଖଣି ଏବଂ କାରଖାନା ସମ୍ପ୍ରସାରଣ ପାଇଁ ପ୍ରାୟ ୯୫୦ ଏକର ଜମି ଟେକି ଦେଇଛନ୍ତି ଆପ୍ ସାଂସଦ ଶ୍ରୀ ସଞ୍ଜୟ ସିଂ ଓ ରାଜ୍ୟ ସଭାପତି ଶ୍ରୀ ନିଶିକାନ୍ତ ମହାପାତ୍ର ଗଭୀର ଉଦବେଗ ପ୍ରକାଶ କରିବା ସହ ଆଦିବାସୀଙ୍କ ସ୍ୱାର୍ଥରର ସୁରକ୍ଷା ନିମନ୍ତେ ସରକାରଙ୍କ ନିକଟରେ ଦାବୀ ଜଣାଇଛନ୍ତି ।

ଦିଲ୍ଲୀରେ ଅବସ୍ଥିତ ଆମ୍ ଆଦମୀ ପାର୍ଟି କେନ୍ଦ୍ରୀୟ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ରାଜ୍ୟ ସରକାର ଗ୍ରାମ ସଭାର ବିନା ଅନୁମତିରେ ରାତି ଅଧିଆ ପୋଲିସ ପଠାଇ ନିରୀହ ଆଦିବାସୀଙ୍କର ଜମିକୁ ବଳପୂର୍ବକ ଅଧିଗ୍ରହଣ କାର୍ଯ୍ୟକୁ କଠୋର ସମାଲୋଚନା କରିଛନ୍ତି ରାଜ୍ୟସଭା ସାଂସଦ ଶ୍ରୀ ସଞ୍ଜୟ ସିଂ । ରାଜଗାଙ୍ଗପୁର ବ୍ଲକ ଅନ୍ତର୍ଗତ କୁକୁଡ଼ା, ଆଲନ୍ଦା, କେଶ୍ରାମାଲ, ଝାଗରପୁର ଏବଂ କୁତ୍ରା ବ୍ଲକର କେତାଙ୍ଗ ପଞ୍ଚାୟତର ହଜାର ହଜାର ଆଦିବାସୀଙ୍କର ଜମିକୁ ପେସା (PESA) ଆଇନ ଏବଂ ଜଙ୍ଗଲ ଅଧିକାର ଆଇନକୁ ଉଲ୍ଲଂଘନ କରି ଗ୍ରାମସଭାର ବିନା ସହମତିରେ

ଡାଲମିଆ କମ୍ପାନୀ ଓ ପ୍ରଶାସନ କରିଥିବା ଚଞ୍ଚକତାକୁ ଦୃଢ଼ ନିନ୍ଦା କରିବା ସହ ଆଦିବାସୀଙ୍କ ହକକୁ ଆମ୍ ଆଦମୀ ପାର୍ଟି ତରଫରୁ ସଂସଦରେ ଉପସ୍ଥାପିତ କରିବା ପାଇଁ ନିର୍ଭର ପ୍ରତିଶୃତି ଦେଇଛନ୍ତି ସାଂସଦ ସଞ୍ଜୟ ସିଂ।ସେ ଅଭିଯୋଗ କରିଛନ୍ତି ପୁଞ୍ଜିପତିଙ୍କୁ ଲାଭ ପହଞ୍ଚାଇବା ପାଇଁ ଗରିବ ଲୋକଙ୍କ ଉପରେ ଲାଠି ଓ ଗୁଳି ମାଡ କରିବାକୁ ପଛାଉ ନାହିଁ ଡବଲ ଇଞ୍ଜିନ ସରକାର । ଗତ ୨୬ ଜାନୁଆରୀ ୨୦୨୦ ମସିହାରେ ମେସର୍ସ ଓସିଏଲ୍ ( ଡିବିସିଏଲ୍) ଦ୍ବାରା ଜମି ଅଧିଗ୍ରହଣ ଆବେଦନକୁ ଗ୍ରାମସଭା ଦ୍ବାରା ଅଗ୍ରାହ୍ୟ କରାଯାଇଥିଲେ ସୁଦ୍ଧା ଜିଲ୍ଲା ପ୍ରଶାସନ ଦ୍ବାରା ଜମି ଅଧିଗ୍ରହଣ କାର୍ଯ୍ୟ ତ୍ବରାନ୍ବିତ କରାଯିବା ଅତ୍ୟନ୍ତ ଦୁଃଖର ବିଷୟ ।

ସମ୍ବଲପୁର ରାଜସ୍ବ କମିଶନର ଏବଂ ସିଏଜିଙ୍କର ଏହି ସଂକ୍ରାନ୍ତୀୟ ଅନୁଧ୍ୟାନ ରିପୋର୍ଟରେ ଗ୍ରାମସଭାର ସହମତି ନ ଥିବା ସ୍ପଷ୍ଟ ଉଲ୍ଲେଖ ରହିଥିଲାବେଳେ ଜମି ଅଧିଗ୍ରହଣ କାର୍ଯ୍ୟ କିଭଳି ଚାଲିଥିଲା ତାହା ବଡ ପ୍ରଶ୍ନବାଚୀ ଭାବେ ଉଭା ହୋଇଛି । ଜମି ଓ ଜଙ୍ଗଲ ଆଦିବାସୀଙ୍କ ପାଇଁ କେବଳ ଜୀବନଜୀବିକା ନୁହେଁ, ବରଂ ସେମାନଙ୍କ ସଂସ୍କୃତି ଏବଂ ପରିଚୟ ଆଜି ସଙ୍କଟରେ ପଡ଼ିଛି ବୋଲି ଜନୈକ ଜମି ମାଲିକ ଶ୍ରୀ ରାକେଶ କୁମାର ଡୁଙ୍ଗଡୁଙ୍ଗ ଉଦବେଗ ପ୍ରକାଶ କରିଛନ୍ତି । ପ୍ରସ୍ତାବିତ ପ୍ରକଳ୍ପ ଦ୍ୱାରା ଶହ ଶହ ପରିବାର ବିସ୍ଥାପିତ ହେବା ଆଶଙ୍କା ଥିବା ସହିତ ପୂର୍ବ ପ୍ରତିଶ୍ରୁତି ପୂରଣ ହୋଇନଥିବା ବେଳେ ହଜାର ହଜାର ଆଦିବାସୀ ‘ଫୋରମ୍ ଫର ଗ୍ରାମସଭା କମିଟି’ର ନେତୃତ୍ବରେ ନ୍ୟାୟ ଅପେକ୍ଷାରେ ରହିଛନ୍ତି ବୋଲି ଶ୍ରୀ ଡୁଙ୍ଗଡୁଙ୍ଗ କ୍ଷୋଭ ପ୍ରକାଶ କରିଛନ୍ତି ।

ପ୍ରଶାସନ ତରଫରୁ କୌଣସି SIA ସାମାଜିକ ଆକଳନ ପ୍ରଭାବ)ର ଅଧ୍ୟୟନ ନ କରି ସଦସ୍ୟ ମାନଙ୍କର ଏ ସଂକ୍ରାନ୍ତରେ ଜାଲ୍ ଦସ୍ତଖତ କରାଯାଇ ଥିବାର ଗ୍ରାମସଭାର ସଦସ୍ୟ ମାନେ ବାରମ୍ବାର ଗୁରୁତର ଅଭିଯୋଗ ଆଣିଥିଲେ ସୁଦ୍ଧା ପ୍ରଶାସନ ଏ ସଂକ୍ରାନ୍ତରେ ନୀରବ ଦ୍ରଷ୍ଟା ସାଜିଥିବାର ସାମ୍ବାଦିକ ସମ୍ମିଳନୀରେ ଉଲ୍ଲେଖ କରିଛନ୍ତି । ଦୁଃଖ ଓ ପରିତାପର ବିଷୟ ଏହା ଯେ ଗତ ୨୭ ଅକ୍ଟୋବର ୨୦୨୫ରେ ସୁନ୍ଦରଗଡ଼ ଜିଲ୍ଲା ପୋଲିସ ଅଧୀକ୍ଷକ ଆଇଆଇସି ଏବଂ ଏସଡିପିଓଙ୍କୁ ସିମେଣ୍ଟ କମ୍ପାନୀକୁ ଜମି ଅଧିଗ୍ରହଣ ପାଇଁ ପୋଲିସ ମୁତୟନ କରିବା ନିମନ୍ତେ ପତ୍ର ମାଧ୍ୟମରେ ନିର୍ଦ୍ଦେଶ ଦେଇଥିଲେ ।

ସେହିଦିନ ଅଧିକ ସଂଖ୍ୟାରେ ଗ୍ରାମବାସୀ ଉପସ୍ଥିତ ଥିବାରୁ ପୋଲିସ୍ ଅଧିଗ୍ରହଣ କାର୍ଯ୍ୟରେ ସଫଳ ହୋଇ ପାରି ନଥିଲା। କିନ୍ତୁ ୧୭ ଡିସେମ୍ବର ୨୦୨୫ ଭୋର ପ୍ରାୟ ୩ଟା ସମୟରେ ମାତ୍ରାଧିକ ସଂଖ୍ୟାରେ ପୋଲିସ ମୁତୟନ କରି ସମସ୍ତ ଗ୍ରାମବାସୀ ଶୋଇଥିବା ସମୟରେ ବଳପୂର୍ବକ ଜମି ଅଧିଗ୍ରହଣ କାର୍ଯ୍ୟକୁ ସମ୍ପୂର୍ଣ୍ଣ କରିଥିଲେ । ଜମି ମାଲିକ ଶ୍ରୀ ରାକେଶ କୁମାର ତାଙ୍କର ଜମିରେ ଡାଲି ଫସଲ ହୋଇଥିଲାବେଳେ ସରକାର ଡ୍ରୋଜର୍ ଲଗାଇ ଫସଲ ନଷ୍ଟ କରିବା ସହ ପ୍ରାୟ ୨୦୦ ଫୁଟର ଗଭୀର ଗର୍ତ୍ତ କରି ମାଇନିଁ କାମ ଆରମ୍ଭ କରିଥିବାର ଅଭିଯୋଗ କରିଛନ୍ତି ।

ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ସଭାପତି ଶ୍ରୀ ନିଶିକାନ୍ତ ମହାପାତ୍ର ଆନ୍ଦୋଳନକାରୀଙ୍କୁ ଗିରଫ କରିବା ସହିତ ସରକାରଙ୍କ ଏଭଳି ଅନ୍ୟାୟପୂର୍ଣ୍ଣ ଅଚରଣକୁ ତୀବ୍ର ନିନ୍ଦା କରିଛନ୍ତି । ଆଗାମୀ ଦିନରେ ବିସ୍ଥାପିତଙ୍କ ସହିତ ଆମ୍ ଆଦମୀ ପାର୍ଟି ଦୃଢତାର ସହ ଛିଡା ହୋଇ ରହିବ ବୋଲି ଶ୍ରୀ ମହାପାତ୍ର ପ୍ରକାଶ କରିଛନ୍ତି । ଏହି କଳା କାନୁନକୁ ତୁରନ୍ତ ଫେରେଇ ନେବାକୁ ସରକାରଙ୍କ ନିକଟରେ ଦୃଢ଼ ଦାବୀ ଜଣାଇଛନ୍ତି ରାଜ୍ୟ ସଭାପତି ଶ୍ରୀ ମହାପାତ୍ର ।ଫୋରମ୍ ଫର୍ ଗ୍ରାମସଭା କମିଟିର କଥାକୁ ସହୃଦୟତା ପୂର୍ବକ ଶୁଣିବା ସହ ତୁରନ୍ତ ଏଭଳି ଅବେବେକୀ ଓ ବେଆଇନ୍ ଜମି ଅଧିଗ୍ରହଣ କାର୍ଯ୍ୟକୁ ବନ୍ଦ କରିବା ପାଇଁ ଶ୍ରୀ ନିଶିକାନ୍ତ ମହାପାତ୍ର ରାଜ୍ୟ ସରକାରଙ୍କୁ ଆହ୍ଵାନ ଜଣାଇଛନ୍ତି ।