ଭୁବନେଶ୍ୱର (ଓଡିଶା ତାଜାନ୍ୟୁଜ) ନି. ପ୍ର :- ସିଏସ୍ଆଇଆର୍–ଇନ୍ଷ୍ଟିଚ୍ୟୁଟ୍ ଅଫ୍ ମିନେରାଲ୍ସ ଆଣ୍ଡ ମ୍ୟାଟେରିଆଲ୍ସ ଟେକ୍ନୋଲୋଜି (ସିଏସ୍ଆଇଆର୍–ଆଇଏମ୍ଏମ୍ଟି), ଭୁବନେଶ୍ୱର, ୨୩ ଜୁଲାଇ ୨୦୨୬ରେ ଇଞ୍ଜିନିୟର୍ସ ଇଣ୍ଡିଆ ଲିମିଟେଡ୍ (ଇଆଇଏଲ୍) ଏବଂ ଲୋହମ୍ ସହ ଦୁଇଟି ବୁଝାମଣାପତ୍ର (ଏମ୍ଓୟୁ) ସ୍ୱାକ୍ଷର କରିଛି। ଏହି ଦୁଇଟି ରଣନୀତିକ ସହଯୋଗର ଲକ୍ଷ୍ୟ ହେଉଛି ଗୁରୁତ୍ୱପୂର୍ଣ୍ଣ ଖଣିଜ ପାଇଁ ସ୍ୱଦେଶୀ ପ୍ରଯୁକ୍ତିର ବିକାଶକୁ ଆଗକୁ ବଢ଼ାଇବା ଏବଂ ପରୀକ୍ଷାଗାରରେ ହେଉଥିବା ଗବେଷଣାକୁ ଶିଳ୍ପ କ୍ଷେତ୍ରରେ ପ୍ରୟୋଗ ଓ ବ୍ୟବହାର ଦିଗରେ ତ୍ୱରାନ୍ୱିତ କରିବା । ବିଦ୍ୟୁତ୍ଚାଳିତ ଯାନବାହନ, ଅକ୍ଷୟ ଶକ୍ତି, ଉନ୍ନତ ଉତ୍ପାଦନ, ଇଲେକ୍ଟ୍ରୋ ନିକ୍ସ ଏବଂ ରଣନୈତିକ କ୍ଷେତ୍ର ପାଇଁ ଗୁରୁତ୍ୱପୂର୍ଣ୍ଣ ଖଣିଜଗୁଡ଼ିକର ଗୁରୁତ୍ୱ ଦିନକୁ ଦିନ ବଢ଼ିବାରେ ଲାଗିଛି ।
ଭାରତ ଏହି କ୍ଷେତ୍ରଗୁଡ଼ିକରେ ନିଜସ୍ୱ ଘରୋଇ କ୍ଷମତାକୁ ବିସ୍ତାର କରୁଥିବା ବେଳେ, ଗୁରୁତ୍ୱପୂର୍ଣ୍ଣ ଖଣିଜର ଉତ୍ତୋଳନ, ବିଶୋଧନ, ଧାତୁ ଉତ୍ପାଦନ ଏବଂ ପୁନଃଚକ୍ରଣ ପାଇଁ ସ୍ୱଦେଶୀ ପ୍ରଯୁକ୍ତିର ବିକାଶ ଜାତୀୟ ଗୁରୁତ୍ୱ ହାସଲ କରିଛି। ସିଏସ୍ଆଇଆର୍–ଆଇଏମ୍ଏମ୍ଟି ପ୍ରାଥମିକ ସମ୍ପଦ, ଶିଳ୍ପ ବର୍ଜ୍ୟ ଏବଂ ଦ୍ୱିତୀୟକ ସମ୍ପଦରୁ ଗୁରୁତ୍ୱପୂର୍ଣ୍ଣ ଖଣିଜ ପ୍ରାପ୍ତି ପାଇଁ ବିଭିନ୍ନ ପ୍ରକ୍ରିୟା ବିକଶିତ କରି ଏହି ବୈଷୟିକ ପରିବେଶରେ ସକ୍ରିୟ ଭାବେ ଅବଦାନ ରଖିଆସୁଛି। ସାମ୍ପ୍ରତିକ ବର୍ଷଗୁଡ଼ିକରେ, ବିଶେଷକରି ରେୟାର ଆର୍ଥ ଏଲିମେଣ୍ଟ୍ସ (ଆର୍ଇଇ)ର ଉତ୍ତୋଳନ ଏବଂ ପ୍ରକ୍ରିୟାକରଣ ସମେତ ଗୁରୁତ୍ୱପୂର୍ଣ୍ଣ ଖଣିଜ ସମ୍ପର୍କିତ ପ୍ରଯୁକ୍ତିର ବୃହତ୍ ପରିମାଣରେ ବିକାଶ ଓ ପ୍ରୟୋଗ ପାଇଁ ସିଏସ୍ଆଇଆର୍–ଆଇଏମ୍ଏମ୍ଟି ପାଇଲଟ୍ ସ୍କେଲ୍ ଭିତ୍ତିଭୂମିରେ ନିବେଶ କରିଛି।
ସିଏସ୍ଆଇଆର୍–ଆଇଏମ୍ଏମ୍ଟି ନ୍ୟାସନାଲ୍ ସେଣ୍ଟର୍ ଫର୍ ମିନେରାଲ୍ସ ଆଣ୍ଡ ମ୍ୟାଟେରିଆଲ୍ସ (ଏନ୍ସିଏମ୍ଏମ୍) ଅଧୀନରେ ଗୁରୁତ୍ୱପୂର୍ଣ୍ଣ ଖଣିଜ ଉପରେ ସେଣ୍ଟର୍ ଅଫ୍ ଏକ୍ସିଲେନ୍ସ ମଧ୍ୟ ପରିଚାଳନା କରୁଛି। ଏହି କେନ୍ଦ୍ର ସ୍ୱଦେଶୀ ପ୍ରଯୁକ୍ତିର ବୃହତ୍ ପରିମାଣରେ ବିକାଶ ଓ ପ୍ରୟୋଗ ପାଇଁ ଶିକ୍ଷାନୁଷ୍ଠାନ, ଗବେଷଣା ଓ ବିକାଶ ପରୀକ୍ଷାଗାର ଏବଂ ଶିଳ୍ପ କ୍ଷେତ୍ରକୁ ଏକତ୍ରିତ କରୁଛି । ସିଏସ୍ଆଇଆର୍–ଆଇଏମ୍ଏମ୍ଟି ଏବଂ ଇଆଇଏଲ୍ ମଧ୍ୟରେ ଇଆଇଏଲ୍ଠାରେ ବୁଝାମଣାପତ୍ର ସ୍ୱାକ୍ଷର, ନୂଆଦିଲ୍ଲୀ ଇଞ୍ଜିନିୟର୍ସ ଇଣ୍ଡିଆ ଲିମିଟେଡ୍ (ଇଆଇଏଲ୍) ସହ ହୋଇଥିବା ବୁଝାମଣାପତ୍ର ଏହି ପ୍ରୟାସକୁ ଆହୁରି ସୁଦୃଢ଼ କରିବା ସହ ପରୀକ୍ଷାଗାରରେ ବିକଶିତ ପ୍ରଯୁକ୍ତିଗୁଡ଼ିକୁ ଶିଳ୍ପ କ୍ଷେତ୍ରରେ ପ୍ରୟୋଗ ପାଇଁ ବୃହତ୍ ପରିମାଣରେ ବିକଶିତ କରିବା ଦିଗରେ ଏକ ଇଞ୍ଜିନିୟରିଂ ମାର୍ଗ ପ୍ରଦାନ କରିବ।
ନୂଆଦିଲ୍ଲୀସ୍ଥିତ ଇଆଇଏଲ୍ର ମୁଖ୍ୟ କାର୍ଯ୍ୟାଳୟରେ ଇଆଇଏଲ୍ର ନିର୍ଦ୍ଦେଶକ (ବୈଷୟିକ) ଶ୍ରୀ ରାଜୀବ ଅଗ୍ରୱାଲ ଏବଂ ସିଏସ୍ଆଇଆର୍–ଆଇଏମ୍ଏମ୍ଟିର ନିର୍ଦ୍ଦେଶକ ଡ. ରାମାନୁଜ ନାରାୟଣ ଏହି ବୁଝାମଣାପତ୍ରରେ ସ୍ୱାକ୍ଷର କରିଥିଲେ। ଏହି ଅବସରରେ ଇଆଇଏଲ୍ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ଶ୍ରୀ ଅତୁଲ ଗୁପ୍ତା, ସିଏସ୍ଆଇଆର୍–ଆଇଏମ୍ଏମ୍ଟିର ବ୍ୟବସାୟ ବିକାଶ ଏବଂ ସିଓଇ ମୁଖ୍ୟ ଡ. କାଳୀ ସଞ୍ଜୟଙ୍କ ସମେତ ଉଭୟ ସଂଗଠନର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଏହି ଚୁକ୍ତି ଅନୁଯାୟୀ, ଇଆଇଏଲ୍ ଏବଂ ସିଏସ୍ଆଇଆର୍–ଆଇଏମ୍ଏମ୍ଟି ଗୁରୁତ୍ୱପୂର୍ଣ୍ଣ ଏବଂ ରଣନୈତିକ ଖଣିଜ କ୍ଷେତ୍ରରେ ମିଳିତ ଭାବେ ଗବେଷଣା ଓ ବିକାଶମୂଳକ ପଦକ୍ଷେପ ଗ୍ରହଣ କରିବେ।
ଏଥିରେ ଇଞ୍ଜିନିୟରିଂ ଏବଂ ପ୍ରଯୁକ୍ତିର ବୃହତ୍ ପରିମାଣରେ ବିକାଶ ଉପରେ ବିଶେଷ ଗୁରୁତ୍ୱ ଦିଆଯିବ । ଏହି ସହଯୋଗ ମାଧ୍ୟମରେ ବୈଷୟିକ ଦକ୍ଷତାର ଆଦାନପ୍ରଦାନ, ଦକ୍ଷତା ବିକାଶ କାର୍ଯ୍ୟକ୍ରମ ଏବଂ ପାଇଲଟ୍-ସ୍କେଲ୍ ଓ ବାଣିଜ୍ୟିକ ସ୍ତରରେ ପ୍ରଯୁକ୍ତି ପ୍ରୟୋଗ ପ୍ରକଳ୍ପଗୁଡ଼ିକର କାର୍ଯ୍ୟାନ୍ୱୟନକୁ ମଧ୍ୟ ସୁଗମ କରାଯିବ ସିଏସ୍ଆଇଆର୍–ଆଇଏମ୍ଏମ୍ଟି ଏବଂ ଲୋହମ୍ ମଧ୍ୟରେ ବୁଝାମଣାପତ୍ର ସ୍ୱାକ୍ଷର, ନୂଆଦିଲ୍ଲୀ ଲୋହମ୍ ସହ ସ୍ୱାକ୍ଷରିତ ବୁଝାମଣାପତ୍ରର ଲକ୍ଷ୍ୟ ହେଉଛି ଉଚ୍ଚ କାର୍ଯ୍ୟଦକ୍ଷତାସମ୍ପନ୍ନ ସ୍ଥାୟୀ ଚୁମ୍ବକ ଉତ୍ପାଦନରେ ବ୍ୟବହୃତ ଗୁରୁତ୍ୱପୂର୍ଣ୍ଣ ବିରଳ ମୃତ୍ତିକା ଉପାଦାନ (ରେୟାର ଆର୍ଥ ମ୍ୟାଟେରିଆଲ୍ସ) ଉତ୍ପାଦନ ପାଇଁ ସ୍ୱଦେଶୀ ପ୍ରଯୁକ୍ତିର ବିକାଶକୁ ଆଗକୁ ବଢ଼ାଇବା ।
ଖଣିଜ ଏବଂ ସାମଗ୍ରୀ ପ୍ରଯୁକ୍ତି କ୍ଷେତ୍ରରେ ସିଏସ୍ଆଇଆର୍–ଆଇଏମ୍ଏମ୍ଟିର ବିଶେଷଜ୍ଞତାକୁ ବ୍ୟାଟେରୀ ସାମଗ୍ରୀ ଏବଂ ସମ୍ପଦ ପୁନରୁଦ୍ଧାର କ୍ଷେତ୍ରରେ ଲୋହମ୍ର ଶିଳ୍ପ କ୍ଷମତା ସହ ମିଶ୍ରଣ କରି ଏହି ସହଭାଗିତା ମେଟାଲାଇଜ୍ଡ ନିଓଡିମିୟମ୍-ପ୍ରାସିଓଡିମିୟମ୍ ପାଇଁ ପ୍ରଯୁକ୍ତିର ବିକାଶ, ବୈଧତା ନିର୍ଦ୍ଧାରଣ ଏବଂ ବାଣିଜ୍ୟୀକରଣକୁ ତ୍ୱରାନ୍ୱିତ କରିବ। ଉଚ୍ଚ କାର୍ଯ୍ୟଦକ୍ଷତାସମ୍ପନ୍ନ ବିରଳ ମୃତ୍ତିକା ସ୍ଥାୟୀ ଚୁମ୍ବକ ଉତ୍ପାଦନ ପାଇଁ ଏହା ଏକ ପ୍ରମୁଖ କଞ୍ଚାମାଲ। ଏହି ସହଯୋଗ ଭାରତର ଘରୋଇ ବିରଳ ମୃତ୍ତିକା ମୂଲ୍ୟ ଶୃଙ୍ଖଳକୁ ସୁଦୃଢ଼ କରିବା,
ସ୍ଥାୟୀ ଚୁମ୍ବକ ଉତ୍ପାଦନ ପାଇଁ ଏକ ସମନ୍ୱିତ ପରିବେଶର ବିକାଶକୁ ସମର୍ଥନ କରିବା ଏବଂ ଆମଦାନୀ ହେଉଥିବା ପ୍ରଯୁକ୍ତି ଓ ସାମଗ୍ରୀ ଉପରେ ନିର୍ଭରଶୀଳତା କମାଇବା ଦିଗରେ ଏକ ଗୁରୁତ୍ୱପୂର୍ଣ୍ଣ ଶିଳ୍ପ–ସରକାରୀ ପଦକ୍ଷେପ । ଏହା ଗୁରୁତ୍ୱପୂର୍ଣ୍ଣ ଖଣିଜ ଏବଂ ଉନ୍ନତ ଉତ୍ପାଦନ କ୍ଷେତ୍ର ପାଇଁ ଭାରତ ସରକାରଙ୍କ ରଣନୈତିକ ପ୍ରାଥମିକତା ସହ ସମନ୍ୱିତ । ସିଏସ୍ଆଇଆର୍–ଆଇଏମ୍ଏମ୍ଟିର ବ୍ୟବସାୟ ବିକାଶ ଏବଂ ସିଓଇ ମୁଖ୍ୟ ଡ. କାଳୀ ସଞ୍ଜୟଙ୍କ ସମନ୍ୱୟରେ ଲୋହମ୍ର ନିର୍ଦ୍ଦେଶକ ତରୁଣ ସିଙ୍ଗଲ ଏବଂ ସିଏସ୍ଆଇଆର୍–ଆଇଏମ୍ଏମ୍ଟିର ନିର୍ଦ୍ଦେଶକ ଡ. ରାମାନୁଜ ନାରାୟଣ ଏହି ବୁଝାମଣାପତ୍ରରେ ସ୍ୱାକ୍ଷର କରିଥିଲେ। ଏହି ଅବସରରେ ଉଭୟ ସଂଗଠନର ବରିଷ୍ଠ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ ।
ଏହି ସହଯୋଗଗୁଡ଼ିକର ମୁଖ୍ୟ ଲକ୍ଷ୍ୟ ହେଉଛି ଶିଳ୍ପ କ୍ଷେତ୍ରରେ ପ୍ରୟୋଗ ପାଇଁ ଆବଶ୍ୟକ ବୈଷୟିକ-ବାଣିଜ୍ୟିକ ଏବଂ ଇଞ୍ଜିନିୟରିଂ ଦିଗଗୁଡ଼ିକର ସମାଧାନ କରି ପରୀକ୍ଷାଗାରରେ ବିକଶିତ ପ୍ରକ୍ରିୟାଗୁଡ଼ିକୁ ବୃହତ୍ ପରିମାଣରେ ବିକଶିତ କରିବା । ଏହି ସହଯୋଗଗୁଡ଼ିକ ଗୁରୁତ୍ୱପୂର୍ଣ୍ଣ ଏବଂ ରଣନୈତିକ ଖଣିଜ ପାଇଁ ପ୍ରଯୁକ୍ତିର ବାଣିଜ୍ୟୀକରଣ କ୍ଷେତ୍ରରେ ସିଏସ୍ଆଇଆର୍–ଆଇଏମ୍ଏମ୍ଟିର ବ୍ୟାପକ ଅଭିଜ୍ଞତା ଉପରେ ଆଧାରିତ ଏବଂ ଭାରତ ସରକାରଙ୍କ ‘ଆତ୍ମନିର୍ଭର ଭାରତ’ ପଦକ୍ଷେପ, ଜାତୀୟ ଗୁରୁତ୍ୱପୂର୍ଣ୍ଣ ଖଣିଜ ମିଶନ ଏବଂ ‘ମେକ୍ ଇନ୍ ଇଣ୍ଡିଆ’ କାର୍ଯ୍ୟକ୍ରମକୁ ସମର୍ଥନ କରି ସ୍ୱଦେଶୀ ପ୍ରଯୁକ୍ତି ବିକାଶ ପାଇଁ ଅନୁଷ୍ଠାନର ଚାଲୁଥିବା ପ୍ରୟାସକୁ ଆହୁରି ସୁଦୃଢ଼ କରୁଛି । ଏହାର ଲକ୍ଷ୍ୟ ହେଉଛି ଗୁରୁତ୍ୱପୂର୍ଣ୍ଣ ଖଣିଜ ଏବଂ ସବୁଜ ପ୍ରଯୁକ୍ତି ମୂଲ୍ୟ ଶୃଙ୍ଖଳରେ ଆତ୍ମନିର୍ଭରଶୀଳତାକୁ ସୁଦୃଢ଼ କରିବା ।
