ବାହୁଡିବେ ଚତୁର୍ଦ୍ଧାମୂର୍ତ୍ତି, ଅପେକ୍ଷାରେ ତିନି ରଥ, ସଜେଇ ହୋଇଛି ଶ୍ରୀମନ୍ଦିର

ପୁରୀ (ଓଡିଶା ତାଜାନ୍ୟୁଜ) (ନି. ପ୍ର) :- ବାହୁଡିବେ ଚତୁର୍ଦ୍ଧାମୂର୍ତ୍ତି । ଜନ୍ମବେଦୀରେ ମହାପ୍ରଭୁଙ୍କ ଲୀଳାଖେଳା ସରିଲା । ଏବେ ରତ୍ନବେଦୀକୁ ଫେରିବେ । ମହାପ୍ରଭୁ ଶ୍ରୀଜଗନ୍ନାଥ, ବଡ ଠାକୁର ବଳଭଦ୍ର, ଭଉଣୀ ସୁଭଦ୍ରା ଓ ଚକ୍ରରାଜ ସୁଦର୍ଶନ ବାହୁଡା ଯାତ୍ରାରେ ବାହୁଡିବେ । ଏଥିପାଇଁ ଚଳଚଞ୍ଚଳ ଶ୍ରୀକ୍ଷେତ୍ର । ଉତ୍ସବମୁଖର ଶରଧାବାଲି । ମହାପ୍ରଭୁଙ୍କ ଦର୍ଶନ ଲାଗି ଲୋକାରଣ୍ୟ ହେଲାଣି ଶ୍ରୀକ୍ଷେତ୍ର । ଚକ୍ରରାଜ ସୁଦର୍ଶନଙ୍କ ପହଣ୍ଡି ଆରମ୍ଭ ହୋଇଛି । ମଧ୍ୟାହ୍ନ ୧୨ଟାରୁ ୨ଟା ୩୦ ମଧ୍ୟରେ ବାହୁଡା ପହଣ୍ଡି ହେବ । ୨ଟା ୩୦ରୁ ୩ଟା ୩୦ ମଧ୍ୟରେ ଛେରା ପହଁରା ନୀତି ପରେ ଅପରାହ୍ଣ ୪ଟା ମଧ୍ୟରେ ଚାରମାଳ ଫିଟା ପରେ ଆରମ୍ଭ ହେବ ରଥଟଣା ।

ଅପେକ୍ଷାରେ ରହିଛି ଶୂନ୍ୟ ରଥ ତ୍ରୟ । ଶ୍ରୀକ୍ଷେତ୍ରରେ ଭକ୍ତ ବିଭୋର ହୋଇଛନ୍ତି । ଚକା ଆଖିକୁ ଦେଖିବା ଲାଗି ଶ୍ରଦ୍ଧାଳୁଙ୍କ ମନ ବ୍ୟାକୁଳ । ଅଶ୍ରୁଭରା ନେତ୍ରରେ ଚାହଁ ରଖିଛନ୍ତି ଠାକୁରଙ୍କୁ । ପ୍ରୀତିର ଭାବାବେଗରେ ନୃତ୍ୟ ପରିବେଷଣ କରୁଛନ୍ତି ନୃତ୍ୟଶିଳ୍ପୀ । ଆଡପ ମଣ୍ଡପରେ ଚାଲିଛି ପ୍ରଭୁଙ୍କ ନୀତିକାନ୍ତି । ତିନି ଠାକୁରଙ୍କୁ ପାଛୋଟି ନେବା ପାଇଁ ସୁସଜ୍ଜିତ ହୋଇଛି ସିଂହଦ୍ୱାର । ଫୁଲରେ ସଜେଇ ହୋଇଛି ଶ୍ରୀମନ୍ଦିର । ଅପେକ୍ଷା କରିଛି ମହାପ୍ରଭୁଙ୍କୁ । ଘଣ୍ଟଘଣ୍ଟା, ସଂକୀର୍ତ୍ତନରେ ପ୍ରକମ୍ପିତ ଶ୍ରୀକ୍ଷେତ୍ର । କଡା ସୁରକ୍ଷା ବଳୟରେ ରହିଛି ପୁରୀ ।ପୁରୀକୁ ଜଗିଛି ୪୩୦ରୁ ଅଧିକ କ୍ୟାମେରା । ଏପଟେ ସୁଗନ୍ଧିତ ପୁଷ୍ପରେ ସୁସଜ୍ଜିତ ହୋଇଛି ତିନି ରଥ, ଶ୍ରୀଗୁଣ୍ଡିଚା ମନ୍ଦିର । ଭକ୍ତଙ୍କ ଭିଡ ବଢିବାରେ ଲାଗିଛି ।