ସାତଦିନ ହେଲାଣି ସବରେଜିଷ୍ଟର ରେକର୍ଡ ରୁମ ତାଲା

ଦିନ ମଜୁରିଆ ହାତରେ କୋଟି କୋଟି ଟଙ୍କାର ରେକର୍ଡ ରୁମ

ପୁରୀ (ଓଡିଶା ତାଜାନ୍ୟୁଜ) (ନି.ପ୍ର) :- ପୁରୀଜିଲ୍ଲା ସବରେଜିଷ୍ଟର ଅଫିସ ଏବେ ଅବ୍ଯବସ୍ଥା ମଧ୍ଯରେ ଗତି କରୁଛି । ଗତ ଏକ ସପ୍ତାହ ଧରି ରେକର୍ଡ ରୁମ ତାଲା ପଡିଥିବାରୁ ପ୍ରତିଦିନ ଶହ ଶହ ଲୋକ ରେକର୍ଡ ନପାଇ ଫେରୁଥିବା ଦେଖିବାକୁ ମିଳୁଛି । ଦୁଇ ଜଣ ଚାକିରି କରି ନଥିବା ବ୍ଯକ୍ତି ଦିନ ମଜୁରି ହିସାବରେ ରେକର୍ଡ ଖୋଜିବା ପାଇଁ ଦାୟୀତ୍ବରେ ରହିଥିଲେ । ଉକ୍ତ ଅଫିସରେ ପ୍ରତିଦିନ କୋଟି କୋଟି ଟଙ୍କାର ଆୟ ହେଉଥିଲେ ମଧ୍ଯ ବଡ ଜେରକ୍ସ ମେସିନ ନଥିବାରୁ ଗୁରୁତ୍ୱପୂର୍ଣ୍ଣ ବଡ ବଡ ରେଜିଷ୍ଟର ଗୁଡ଼ିକ କଚେରି ହତା ଡେଇଁ ବାହାରେ ଜେରକ୍ସ କରାଯାଉଥିବା ଦେଖିବାକୁ ମିଳୁଛି ।

ବହି ଗୁଡ଼ିକ ପୁରୁଣା ହୋଇଥିବାରୁ ବାରମ୍ବାର ଟେକା ପକା ଓ ବୋହିବା ଯୋଗୁ ବହିର ପୃଷ୍ଠା ଫାଟି ଏଣେତେଣେ ଉଡି ଯାଉଥିବା ଅଭିଯୋଗ ହେଉଛି । ଅଭିଭକ୍ତ ପୁରୀ ଜିଲ୍ଲାର ରେକର୍ଡ ବହି ଗୁଡ଼ିକ ଖୋଜିବା ପାଇଁ ସିଷ୍ଟମ ଠିକ୍ ନଥିବାରୁ ବହି ଗୁଡ଼ିକ ଏଣେତେଣେ ଥୁଆ ହେବା ଯୋଗୁ ଏହା ସମସ୍ଯା ସୃଷ୍ଟି କରୁଛି ବୋଲି ରେକର୍ଡ ଖୋଜୁଥିବା ବ୍ଯକ୍ତି କହୁଥିବା ଶୁଣାଯାଉଛି । ଦାୟୀତ୍ବରେ ଥିବା ଦୁଇ ଜଣ ବ୍ଯକ୍ତି ରେକର୍ଡ ଖୋଜିବା ପାଇଁ ହଜାର ହଜାର ଟଙ୍କା ନେଉଥିବା କଚେରିରେ ଆଲୋଚନା ହେଉଛି । ମାଲ ଦିଅ ରେକର୍ଡ କପି ନିଅ ନ୍ଯାୟରେ ରେକର୍ଡ ରୁମ ଚାଲିଥିବା କୁହାଯାଉଛି ।

ରେକର୍ଡ ରୁମ ଦାୟୀତ୍ବରେ ଥିବା କିରାଣି ଜ୍ବର ହେଉଥିବା କହି ଛୁଟିରେ ରହୁଥିବା ବେଳେ ଲୋକ ଗହଳି ଦେଖିଲେ ସିଟ୍ ରେ ବସୁନଥିବା ଦେଖିବାକୁ ମିଳୁଛି । ଜମି ଦଲିଲ ଓ ଅନ୍ଯାନ୍ଯ କାଗଜପତ୍ର ଗୁଡ଼ିକ ତାରିଖ ଅନୁସାରେ ଖାତାରେ ପଞ୍ଜିକରଣ ଓ ନମ୍ବରିଙ୍ଗ କରୁନଥିବାରୁ ତାହା ବାରମ୍ବାର ହଜି ଯାଉଥିବା କୁହାଯାଉଛି । ଏ ସମ୍ପର୍କରେ ସବରେଜିଷ୍ଟରଙ୍କୁ ପଚାରିବାରେ ଖୁବ ଶୀଘ୍ର ଏହାର ସମାଧାନ ହେବ ବୋଲି କହିଛନ୍ତି । ଏହି କାର୍ଯ୍ୟାଳୟରେ ଅନେକ ମହାଦୁର୍ନୀତି ରହିଥିବା ଓ ଆଗକୁ ପ୍ରକାଶିତ ହେବ ବୋଲି ଜଣେ ଆଇନଜୀବୀ ନାମ ଗୋପନ ରଖି କହିଛନ୍ତି ।