ବିଏମ୍ ସି ଓ ଜିନ୍ଦଲର ମିଳିତ ଉଦ୍ୟମରେ ଭ୍ରାମ୍ୟମାଣ ଶୌଚାଳୟ ଲୋକାର୍ପଣ

 ପରିମଳ ସେବାକୁ ଆଗେଇ ନେବାକୁ ବିଏମ୍ ସିର ଆଉ ଏକ ପଦକ୍ଷେପ

ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ସ୍ୱଚ୍ଛ ସର୍ବେକ୍ଷଣ ଅଭିଯାନରେ ଭୁବନେଶ୍ୱର ମହାରନଗର ନିଗମ (ବିଏମ୍ ସି)ର ଆଉ ଏକ ପଦକ୍ଷେପ । ଲୋକାର୍ପଣ ହେଲା ବିଏମ୍ ସିର ଟ୍ରକ ମାଉଁଣ୍ଟେଡ୍ ଆଧୁନିକ ଭ୍ରାମ୍ୟମାଣ ଶୌଚାଳୟ । ଜିନ୍ଦଲ ଷ୍ଟିଲର ସାମାଜିକ ସଂସ୍ଥା ଜିନ୍ଦଲ ଫାଉଣ୍ଡେସନ ଦ୍ବାରା 4 ସିଟ୍ ବିଶିଷ୍ଟ ଏକ ଭ୍ରାମ୍ୟମାଣ ଶୌଚାଳୟ ପ୍ରଦାନ କରାଯାଇଅଛି ।

ଆଜି ଭୁବନେଶ୍ୱର ମହାନଗର ନିଗମ ମୁଖ୍ୟାଳୟ ପରିସରରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ମାନନୀୟା ମେୟର ଶ୍ରୀମତୀ ସୁଲୋଚନା ଦାସ ମୁଖ୍ୟ ଅତିଥି ଭାବେ ଯୋଗଦେଇ ଏହି ଭ୍ରାମ୍ୟମାଣ ଶୌଚାଳୟର ଲୋକାର୍ପଣ କରିଛନ୍ତି । ଅନ୍ୟମାନଙ୍କ ମଧ୍ୟରେ ଡେପୁଟି ମେୟର ଶ୍ରୀମତୀ ମଂଜୁଲାତା କହଁର, ପରିମଳ ଷ୍ଟାଣ୍ଡିଂ କମିଟିର ଅଧ୍ୟକ୍ଷ ଶ୍ରୀ ବିରଞ୍ଚି ନାରାୟଣ ମହାସୂପକାର, ଅତିରିକ୍ତ କମିଶନର ଶ୍ରୀ କୈଳାସ ଚନ୍ଦ୍ର ଦାସ,

ଜିନ୍ଦଲ ଷ୍ଟିଲର ଅଧ୍ୟକ୍ଷ ଶ୍ରୀ ପ୍ରଶାନ୍ତ ହୋତା ମଂଚାସୀନ ଥିଲେ । ଭିଡିଓ କନଫରେନ୍ସିରେ ଜିନ୍ଦଲ ଫାଉଣ୍ଡେସନର ଅଧ୍ୟକ୍ଷା ଶ୍ରୀମତୀ ଶାଲୁ ଜିନ୍ଦଲ ଓ ବିଏମ୍ ସି କମିଶନର ଶ୍ରୀ ଚଞ୍ଚଳ ରାଣା ଉପସ୍ଥିତ ଥିଲେ । ଏହି ଅବସରରେ ଜିନ୍ଦଲ ଫାଉଣ୍ଡେସନ ସବୁ ସମୟରେ ବିଏମ୍ ସିକୁ ସହାୟତାର ହାତ ବଢାଇ ଆସିଛି, ଆଗାମୀ ଦିନରେ ଏହି ସହଭାଗିତା ଜାରି ରହିବ । ଆଉ ଦୁଇଗୋଟି ଏହିପରି ଟ୍ରକ୍ ମାଉଁଣ୍ଟେଡ୍ ଭ୍ରାମ୍ୟମାଣ ଶୌଚାଳୟ ଯୋଗାଇ ଦେବାକୁ ବିଏମ୍ ସି ପକ୍ଷରୁ ଅନୁରୋଧ କରାଯାଇଛି ।

ଏହି ମହତ କାର୍ଯ୍ୟ ପାଇଁ ଜିନ୍ଦଲ ଫାଉଣ୍ଡେସନର ସମସ୍ତ କର୍ମକର୍ତ୍ତା ତଥା ଏହାର ଅଧ୍ୟକ୍ଷା ଶ୍ରୀମତୀ ସାଲୁ ଜିନ୍ଦଲଙ୍କୁ ସାଧୁବାଦ ଜଣାଇଛନ୍ତି ମାନନୀୟା ମେୟର ଶ୍ରୀମତୀ ଦାସ । ଆମର ଅନୁରୋଧ ରକ୍ଷାକରି ଜିନ୍ଦଲ ଫାଉଣ୍ଡେସନ ଏହି ଭ୍ରାମ୍ୟମାଣ ଶୌଚାଳୟ ପ୍ରଧାନ କରିଥିବାରୁ ସଂପୃକ୍ତ ସଂସ୍ଥା, ଏହାର ଅଧ୍ୟକ୍ଷା ଓ କର୍ମକର୍ତ୍ତାଙ୍କୁ ଧନ୍ୟବାଦ ଜଣାଇବା ସହ ଆଗାମୀ ଦିନରେ ଜିନ୍ଦଲ ଫାଣ୍ଡେସନର ସହାୟତା ଜାରି ରହିବ ବୋଲି ଆଶାବ୍ୟକ୍ତ କରିଛନ୍ତି ବିଏମ୍ ସି କମିଶନର ଶ୍ରୀ ରାଣା ।

ସ୍ୱଚ୍ଛ ଭାରତ ମିଶନ ନେଇ ଜିନ୍ଦଲ ଫାଉଣ୍ଡେସନ କାର୍ଯ୍ୟ କରୁଛି । ଭୁବନେଶ୍ୱରର ସ୍ୱଚ୍ଛାତାକୁ ଅଗ୍ରଗଣ୍ୟ କରିବାରେ ଆମର ସହଯୋଗ ଜାରି ରହିବ । ଆଗାମୀ ଦିନରେ ଏହି ଧାରା ଜାରି ରହିବ । ଏହା ଆମର ସାମାଜିକ ଦାୟିତ୍ୱ କର୍ତ୍ତବ୍ୟ ବୋଲି କହିଛନ୍ତି ଶ୍ରୀମତୀ ଜିନ୍ଦଲ । ସୂଚନା ଯୋଗ୍ୟକି , ଭୁବନେଶ୍ୱର ମହାନଗର ନିଗମ ଅଞ୍ଚଳରେ ସମୁଦାୟ ୧୦୯ ଗୋଟି ସାମୁହିକ ଶୌଚାଳୟ, ୫୬ ଗୋଟି ଗୋଷ୍ଠୀ ଶୌଚାଳୟ (ବସ୍ତି ଅଞ୍ଚଳରେ ),୧୮ ଗୋଟି ଈ-ଟୟଲେଟ ରହିଛି ।

ଏହା ସାଙ୍ଗକୁ ୧୦ ରୁ ଉର୍ଦ୍ଧ୍ୱ ପରିସ୍ରାଗାର ରହିଛି । ସମୁଦାୟ ୧୭୦୦ ଗୋଟି ପାଇଖାନା ସିଟରେ ଦିନକୁ ୬୦ ହଜାରରୁ ଅଧିକ ନାଗରିକ ଶୌଚ ହେବାର ସୁବିଧା ରହିଛି । ଭ୍ରାମ୍ୟମାଣ ଶୌଚାଳୟ ପାଇଁ ଦ୍ଵିପାକ୍ଷିକ ଉଦ୍ୟମରେ ଆଜି ଏହି ସେବାର ଶୁଭାରମ୍ଭ କରାଯାଇଅଛି ।  

ଏଥିରେ ରହିଥିବା ସୁବିଧା ଗୁଡିକ ହେଲା –

 ପୁରୁଷଙ୍କ ପାଇଁ – କମୋଟ ୧ ଗୋଟି, ଇଣ୍ଡିଆନ ପାଇଖାନା ୧ ଗୋଟି , ପରିଶ୍ରାଗାର ୨ ଗୋଟି

 ମହିଳାଙ୍କ ପାଇଁ – ଇଣ୍ଡିଆନ ପାଇଖାନା ୨ଗୋଟି, କମୋଟ ୧ ଗୋଟି

 ଏକଜର୍ଟ ଫ୍ୟାନ ୬ ଗୋଟି

 ହ୍ୟାଣ୍ଡ ୱାସ ବେସିନ ୨ ଗୋଟି ରହିଅଛି ।

ରାଜଧାନୀ ଭୁବନେଶ୍ୱରରେ ଅଧିକାଂଶ ସମୟରେ ଭିଭିଆଇପିଙ୍କ ସଭା, ଶୋଭାଯାତ୍ରା, ସମାବେଶ ଆଦି ଅନୁଷ୍ଠିତ ହୋଇଥାଏ । ସେଥିରେ ଯୋଗଦେବାକୁ ଆସୁଥିବା ଲୋକମାନେ ଖାସ୍ କରି ମହିଳାମାନେ ମଳମୂତ୍ର ତ୍ୟାଗ କରିବାକୁ ବହୁ ଅସୁବିଧାର ସମ୍ମୁଖିନ ହୋଇଥାନ୍ତି । ସେହି ଅଭାବକୁ ପୂର୍ଣ୍ଣ କରିବା ସହ ବାହ୍ୟ ମଳମୂତ୍ର ମୁକ୍ତ ସହରର ମର୍ଯ୍ୟାଦାକୁ ଅକ୍ଷୁର୍ଣ୍ଣ ରଖିବାରେ ଏହି ଭ୍ରାମ୍ୟମାଣ ଶୌଚାଳୟ ଯେ ବିଶେଷ ଭାବେ ସହାୟକ ହେବ, ଏଥିରେ ସନ୍ଦେହ ନାହିଁ ।

ଜିନ୍ଦଲ ଫାଉଣ୍ଡେସନ ଏହି ଟ୍ରକ ମାଉଁଣ୍ଟେଡ୍ ଶୌଚାଳୟଟିକୁ ବିଏମ୍ ସିକୁ ଦେଇଥିବା ବେଳେ ଏହାର ସମ୍ପୂର୍ଣ ପରିଚାଳନା ଦାୟିତ୍ୱରେ ରହିବ ବିଏମ୍‌ସି ।
ଅତିରିକ୍ତ କମିଶନର ଶ୍ରୀ କୈଳାସ ଚନ୍ଦ୍ର ଦାସ ସ୍ୱାଗତ ଅଭିଭାଷଣ ପ୍ରଦାନ କରିଥିବା ବେଳେ ଜିନ୍ଦଲ ଫାଉଣ୍ଡେସନ ସାମାଜିକ ଉନ୍ନୟନ ପାଣ୍ଠିର ଉପାଧ୍ୟକ୍ଷ ଶ୍ରୀ ଋଷି ପଠାନିଆ ଧନ୍ୟବାଦ ଅର୍ପଣ କରିଥିଲେ । ଏହି ସମସ୍ତ କାର୍ଯ୍ୟକ୍ରମର ସଂଯୋଜନା କରିଥିଲେ, ଜିନ୍ଦଲ ଷ୍ଟିଲର ଅଧ୍ୟକ୍ଷ ଶ୍ରୀ ପ୍ରଶାନ୍ତ ହୋତା l