ଓଡ଼ିଶା ତାଜା ନ୍ୟୁଜ (୨୨ ସେପ୍ଟେମ୍ବର ମଙ୍ଗଳବାର) ହିଞ୍ଜିଳିକାଟୁ :– ମହାମାରୀ କରୋନା ଭୁତାଣୁ ସଂକ୍ରମଣ ବ୍ୟାପିଥିବାରୁ ଦୀଘଁ ସାଢେ ୫ମାସରୁ ଉର୍ଦ୍ଧ୍ୱ ସମୟ ଧରି ରୋଜଗାର ହରାଇ ବସିଥିବା ରେଡ଼ିମେଡ଼ି ପୋଷାକର ପୁଟଫାଥ୍ ବ୍ୟବସାୟୀ ମାନେ ପାର୍ବଣ ସମୟରେ ଆର୍ଥୀକ ସ୍ଥିତି ସୁଧାରିବାକୁ ମନରେ ଆଶା ସଂଚାର କରିଛନ୍ତି । ରୋଜଗାର ହରାଇ ଭୋକ ଉପବାସରେ ଦିନ କାଟୁଥିବା ଫୁଟଫାଥ୍ ବ୍ୟବସାୟୀ ମାନେ ପୁଣି ଥରେ ଆର୍ଥୀକ ସ୍ଥିତି ମଜବୁତ କରିବା ସକାଶେ ଉଦ୍ୟମ ଆରମ୍ଭ କରିଛନ୍ତି । ଗଞ୍ଜାମ ଜିଲ୍ଲାର ୨ୟ ବୃହତମ ସହର ଭାବେ ପରିଗଣିତ ହିଞ୍ଜିଳିକାଟୁ ପୌରାଂଚଳର ବିଭିନ୍ନ ସ୍ଥାନରେ ରାଜ୍ୟ ଓ ଜିଲ୍ଲା ବାହାରୁ ଆସିଥିବା ରେଡ଼ିମେଡ଼ି ପୋଷାକର ଫୁଟଫାଥ୍ ବ୍ୟବସାୟୀ ମାନେ ଗତ କିଛି ଦିନ ଧରି ସ୍ଥାନୀୟ ଅଂଚଳରେ ନିଜର ପସରା ମେଲାଇଛନ୍ତି । ପ୍ରତିଦିନ ରାସ୍ତା କଡ଼ରେ ବସି କମ୍ ମୂଲ୍ୟରେ ରେଡ଼ିମେଡ଼ି ପୋଷାକ ବିକ୍ରି କରୁଥିବା ଏଭଳି ବେପାରୀ ମାନଙ୍କ କରୋନା କଟକଣା ଯୋଗୁଁ ଜୀବିକା ସମ୍ପୁର୍ଣ୍ଣ ଠପ୍ ହୋଇ ଯାଇଥିଲା ।
ସେପ୍ଟମ୍ବର ପହିଲାରୁ ରାଜ୍ୟରେ ଅନଲକ-୪ କାର୍ଯ୍ୟକାରୀ କରାଯିବା ସହ କରୋନା କଟକଣାକୁ କୋହଳ କରାଯାଇଥିଲା । ଆର୍ଥୀକ ସ୍ଥିତିକୁ ସୁଦୃଢ ଓ ଜନସାଧାରଣଙ୍କ ଜୀବନ ଜୀବିକାକୁ ସ୍ୱାଭାବିକ କରିବା ଲାଗି ସରକାର ବ୍ୟବସାୟିକ ପ୍ରତିଷ୍ଠାନ ଗୁଡ଼ିକ ଖୋଲିବା ଲାଗି ଅନୁମତି ପ୍ରଦାନ କରିଛନ୍ତି । ଫଳରେ ରାସ୍ତା କଡ଼ରେ ବ୍ୟବସାୟ କରି ପରିବାର ପ୍ରତିପୋଷଣ କରୁଥିବା ଏଭଳି ବ୍ୟବସାୟୀ ମାନେ ଗତ କିଛି ଦିନ ଧରି ପୁଣି ଥରେ ସେମାନଙ୍କର ବ୍ୟବସାୟ ଆରମ୍ଭ କରିଛନ୍ତି । ଆଗକୁ ପାର୍ବଣ ଋତୁ ପାଖେଇ ଆସୁଥିବାରୁ ଭଲ ବ୍ୟବସାୟ ହେବା ସହ ଭଲ ୨ ପଇସା ରୋଜଗାର ହେବାରେ ଆଶା ରଖିଛନ୍ତି । ହିଞ୍ଜିଳିକାଟୁ ସହର ଗଞ୍ଜାମ ଜିଲ୍ଲାର ୨ୟ ବୃହତମ ସହର ହୋଇଥିବାରୁ ସ୍ଥାନୀୟ ପୌରାଂଚଳ ସମେତ ନିକଟବର୍ତି ୪୦ରୁ ଉର୍ଦ୍ଧ୍ୱ ଗ୍ରାମାଂଚଳର ଜନ ସାଧାରଣ ବାଣିଜ କାରବାର ସକାଶେ ସ୍ଥାନୀୟ ସହର ଉପରେ ନିର୍ଭରଶୀଳ । ଏପରିକି ସୁଲଭ ମୁଲ୍ୟରେ ରେଡ଼ିମେଡ଼ି ପୋଷାକ କିଣିବା ସକାଶେ ସ୍ଥାନୀୟ ସହରକୁ ଆସିଥାନ୍ତି । ଏହାକୁ ଆଖି ଆଗରେ ରଖି ବାହାର ରାଜ୍ୟ ଓ ନିକଟସ୍ଥ ଜିଲ୍ଲାରୁ ବହୁ ଫୁଟଫାଥ୍ ବ୍ୟବସାୟୀ ସ୍ଥାନୀୟ ସହରକୁ ଆସି ନିଜ ନିଜର ପସରା ମେଲାଇ ଦେଇଥାନ୍ତି । କମ୍ ମୂଲ୍ୟରେ ଶିଶୁଙ୍କ ଠାରୁ ଆରମ୍ଭ କରି ଯୁବକ, ଯୁବତୀ ସମେତ ସମସ୍ତ ବୟସର ଲୋକଙ୍କ ସକାଶେ ରେଡ଼ିମେଡ଼ି ପୋଷାକ ବିକ୍ରି କରିଥାନ୍ତି । ଚଳିତ ବର୍ଷ ମହାମାରୀ କରୋନା ବ୍ୟାପିବା ଯୋଗୁଁ କଟକଣା ଲାଗୁ କରାଯାଇଥିଲା ।
କଟକଣା କୋହଳ ପରେ ପୂଜା ବଜାରକୁ ଲକ୍ଷ୍ୟ ରଖି କଟକ, ପୂରୀ ଜିଲ୍ଲା ସମେତ ପଡ଼ୋଶୀ ରାଜ୍ୟ ପଶ୍ଚିମବଙ୍ଗ ଓ ଛତିଶିଗଡ଼ ଅଂଚଳର କିଛି ଫୁଟପାଥ ବ୍ୟବସାୟୀ ଆସି ପସରା ମେଲାଇ ଦେବା ସହ ବେପାର ଜମାଇଛନ୍ତି । ସ୍ଥାନୀୟ ସହରର ୫୯ ନଂ ଜାତୀୟ ରାଜପଥର ଉଭୟ ପ୍ୱାଶ୍ୱର୍ ସମେତ ଘୋଡ଼ାହାଡ଼ ସେତୁ ନିକଟସ୍ଥ ଅଂଚଳ, ଖଣ୍ଡରା ଛକ, କଲେଜ ଛକ, ପେଟ୍ରୋଲ ପମ୍ପ ନିକଟସ୍ଥ ଅଂଚଳରେ ଫୁଟପାଥ ବ୍ୟବସାୟୀ ମାନେ ପସରା ମେଲାଇଛନ୍ତି । ୧ଶହ ଟଙ୍କାରୁ ଆରମ୍ଭ କରି ୫ଶହ ଟଙ୍କା ମଧ୍ୟରେ ବିଭିନ୍ନ ରକମର ପୋଷାକ ବିକ୍ରି କରାଯାଉଥିବା ଜଣାପଡ଼ିଛି । ବିଶେଷ କରି ନିକଟସ୍ଥ ଗ୍ରାମାଂଚଳର ଲୋକେ ଏଭଳି ପୋଷାକୁ କିଣି ନେଉଥିବା ନଜିର ରହିଛି । ପ୍ରତି ବର୍ଷ ଭଲ ବ୍ୟବସାୟ ହେଉଥିଲା । କିନ୍ତୁ ଚଳିତ ବର୍ଷ କରୋନା ଯୋଗୁଁ ମାର୍ଚ୍ଚ ମାସ ଠାରୁ ବ୍ୟବସାୟ ସମ୍ପୁର୍ଣ୍ଣ ବନ୍ଦ ରହିଥିଲା । ପୂଜା ବଜାରରରେ ଭଲ ଦୁଇ ପଇସା ରୋଜଗାର ହେବ ବୋଲୀ ଫୁଟପାଥ ବ୍ୟବସାୟୀ ମାନେ ଆଶ ରଖିଛନ୍ତି । ଭଲ ବ୍ୟବସାୟ ହେଲେ ଲକଡ଼ାଉନ ସମୟରେ ହୋଇଥିବା ଖର୍ଚ୍ଚ ଭରଣାରେ କିଛିଟା ସହାୟକ ହୋଇ ପାରିବ ବୋଲି ସ୍ଥାନୀୟ ଅଂଚଳକୁ ଆସିଥିବା ୧୦ରୁ ଉର୍ଦ୍ଧ୍ୱ ଫୁଟପାଥ ବ୍ୟବସାୟୀ କହିଛନ୍ତି । (ହିଞ୍ଜିଳିକାଟୁ/ଶୁସାନ୍ତ ପ୍ରଧାନ)
