ସ୍ବର୍ଗଦ୍ବାର ଶ୍ମଶାନରେ ଶବକୁ ମହାଅପମାନ ଦୁର୍ନୀତିର ଦୁର୍ଗନ୍ଧ ଜଳଜଳ ଭିଆଇପିଙ୍କ ଶବ ପାଇଁ ପିଣ୍ଡି ସଂରକ୍ଷିତ

ପୁରୀ (ଓଡ଼ିଶା ତାଜା ନ୍ୟୁଜ୍) ନି. ପ୍ର :- ତୁଣ୍ଡରେ ଶେଷ ନାମ ଜଗନ୍ନାଥ । ଶେଷ ଦର୍ଶନ ପତିତପାବନ । ଶେଷ ଠିକଣା ସ୍ବର୍ଗଦ୍ବାର । ଶେଷ ଯାନ ଛଖଣ୍ଡି ବାଉଁଶ । ହିନ୍ଦୁ ମାନଙ୍କର ବିଶ୍ବାସ ରହିଛି ସ୍ବର୍ଗଦ୍ବାରରେ ଶବ ଦାହ କଲେ ଆତ୍ମା ସ୍ବର୍ଗକୁ ଯାଇଥାଏ । ସ୍ବର୍ଗର ଇନ୍ଦ୍ରଦେବ ମର୍ତ୍ତ୍ୟକୁ ଆସି ଶ୍ରୀଜଗନ୍ନାଥଙ୍କୁ ଦର୍ଶନ କରି ସମୁଦ୍ରକୂଳ ସେହି ବାଟେ ସ୍ବର୍ଗକୁ ଯାଇଥିବା କଥିତ ଅଛି । ପୁରୁଣା ସ୍ବର୍ଗଦ୍ବାର ଖୋଲା ଆକାଶ ତଳେ ଶବଦାହ କରାଯାଉଥିଲା । ଏବେ ଛାତତଳେ ଶବଦାହ କରାଯାଉଛି । ୨୪ ଘଣ୍ଟା ଭିତରେ ସ୍ବର୍ଗଦ୍ବାରକୁ ୧୫୦ରୁ ୨୦୦ ଶବଦାହ କରାଯାଉଛି ।

ଭିଆଇପିଙ୍କ ଶବ ପାଇଁ ସ୍ବତନ୍ତ୍ର ପିଣ୍ଡି ସଂରକ୍ଷିତ ରହିଛି । ଅନ୍ଯ ଶବ ଗୁଡିକ ମେଡିକାଲରେ ବେଡ ନମିଳିଲେ ରୋଗୀ ଯେପରି ତଳେ ଶୁଏ ସେହିପରି ପ୍ରତିଦିନ ଅଧିକାଂଶ ଶବ ତଳେ ପଡିରହୁଛି । ଶ୍ରୀମନ୍ଦିରରେ ନୀତି ବିଳମ୍ବ ପରି ସେଠାରେ ମଧ୍ଯ ଶବଦାହ ଟୋକନ କରିବାର ଦୁଇଘଣ୍ଟା ପରେ ସାମଗ୍ରୀ ନେବା ପାଇଁ ଡାକବାଜି ଯନ୍ତ୍ରରେ ଡକାଯାଉଛି । ଆଧ୍ୟାତ୍ମିକ କ୍ଷେତ୍ର ଶ୍ରୀକ୍ଷେତ୍ରର ସ୍ବର୍ଗଦ୍ବାରକୁ ଦକ୍ଷିଣ ଭାରତୀୟ ଢାଞ୍ଚାରେ ନିର୍ମାଣ କରାଯାଇଛି । ଯାହା ବୁଦ୍ଧିଜୀବୀଙ୍କୁ ବେଥିତ କରିଛି ।

ଶବଦାହ ପାଇଁ ୨୮ ଟି ପିଣ୍ଡି ରହିଛି । ଶବ ବାହକ , କାଠ ପରିବହନ ବାହକ ଏକଚାଟିଆ କାରବାର ଚଳାଇଥିବା ଶୁଣାଯାଉଛି । ଯାହାର ଶବସଂସ୍କାର ନିଜେ କରୁଛନ୍ତି ସେମାନଙ୍କୁ ଜାଣିଶୁଣି ଗଣ୍ଠିଆ,ବଙ୍କା, ମୋଟା, ପୋଲା ଓ ଚେରୁଆ ଝାଉଁକାଠ ଦିଆଯାଉଥିବା ଅଭିଯୋଗ ହେଉଛି । ଦିଆଯାଉଥିବା ସାମଗ୍ରୀ ମଧ୍ଯରେ ଯେତିକି ମୂଲ୍ଯ ସ୍ବର୍ଗଦ୍ବାର ପଡୁଛି ତାହା ବଜାର ଦର କମ ରହୁଛି । ଦୁଇଟି ଲୁହାକଣ୍ଟାକୁ ବଜାର ଦର ୧ଟଙ୍କା ହୋଇଥିବା ବେଳେ ସ୍ବର୍ଗଦ୍ବାରରେ ତାହାର ମୂଲ୍ଯ ୩ ଟଙ୍କା ରହିଛି ।

ସ୍ବର୍ଗଦ୍ବାର ଶଶ୍ମାନ ମହାଦୁର୍ନୀତିର ମହାଖଳା ପାଲଟିଥିବା ଆଲୋଚନା ହେଉଛି । ମୁଖାଗ୍ନି ସାମଗ୍ରୀରେ ଦିଆଯାଉଥିବା ଶୁଦ୍ଧ ଘିଅ ୩ଶହ ଗ୍ରାମକୁ ୨୧୦ ଟଙ୍କା ଥିବାବଳେ କେଜି ୭ଶହ ଟଙ୍କା ପଡୁଛି । ଶବ ସହ ଆସିଥିବା ସମ୍ପର୍କୀୟ ମାନେ କାଉଣ୍ଟରର ଯଦି କିଣିକରି ଏକକିଲୋ ଘିଅ ନେଉଛନ୍ତି ତେବେ ସେମାନଙ୍କୁ ୧୨ଶହ ଟଙ୍କା ପଡୁଛି । ଯାହାର କମ୍ପ୍ୟୁଟର ରସିଦ ଦିଆଯାଉନାହିଁ । ଏସମ୍ପର୍କରେ ଆମ ଆଦମୀ ପାର୍ଟିର (ଆପ)ର ପୁରୀଜିଲ୍ଲା ସଭାପତି ସଞ୍ଜିବ ମହାନ୍ତି କହିଛନ୍ତି ସ୍ବର୍ଗଦ୍ବାର ଘିଅ ଦୁର୍ନୀତି ସମ୍ପର୍କରେ ପୂର୍ବରୁ ଖୋଲାସା କରିଥିଲୁ ।

କିନ୍ତୁ ଜିଲ୍ଲା ପ୍ରଶାସନ ଓ ନଗର ଉନ୍ନୟନ ବିଭାଗ ଘିଅ ମୋହମନ୍ତ୍ର ସମ୍ପର୍କରେ କୌଣସି ସୁରାକ ଦେଉନାହାନ୍ତି । ଶବ ଦାହ ପିଣ୍ଡି ପାଖରେ ରଖାଯିବା ପରେ ନିଆଁରେ ପାଣି ପଡୁନାହିଁ କି ସଫା କରାଯାଉନଥିବାରୁ ବେତିବ୍ଯସ୍ତ ହେଉଛନ୍ତି ଶବଦାହ ସମ୍ପର୍କୀୟ ମାନେ । ପୋଡିବା ପାଇଁ ଶବ ସଂସ୍କାରକ ମାନେ ଅଧିକ ଅର୍ଥ ଦାବି କରି ବହୁଥର ପାଟିତୁଣ୍ଡ ଓ କଥାକଟି ହେଉଥିବା ଅଭିଯୋଗ ହେଉଛି । କାଉଣ୍ଟରରେ ବସୁଥିବା କର୍ମଚାରୀ ମାନେ ନିଜକୁ କ୍ଲାସ ୱାନ ଅଫିସର ଭାବି ଶବ ସମ୍ପର୍କୀୟଙ୍କୁ ରୁକ୍ଷ ବ୍ଯବହାର କରୁଥିବା ଅଭିଯୋଗ ହେଉଛି ।

ସ୍ବର୍ଗଦ୍ବାରକୁ ଅଧିକ ଶବ ଆସୁଥିବାରୁ ଶବ ରଖିବା ପିଣ୍ଡି ଓ ଶବଦାହ ପିଣ୍ଡି ବଢାଇବା ପାଇଁ ଆଲୋଚନା ହେଉଛି । ସ୍ବର୍ଗଦ୍ବାର ସମ୍ମୁଖ ରାସ୍ତା ଅଣଓସାରିଆ ହୋଇଥିବାରୁ ସ୍ବର୍ଗରଥ ଓ ଆମ୍ବୁଲାନ୍ସ ଗାଡି ରଖିବା ପାଇଁ ସୁବିଧା ବ୍ଯବସ୍ଥା ନାହିଁ । ସ୍ବର୍ଗଦ୍ବାର ପୂର୍ବ ଓ ପଶ୍ଚିମ ପଟ ଆଉ ୧ଶହ ମିଟର ବଢାଇବାକୁ ଶବ ସଂସ୍କାରବାଦୀ ବ୍ଯକ୍ତି ସାଧାରଣରେ ଆଲୋଚନା କରୁଛନ୍ତି ।