ଦୀର୍ଘ ୧୦ ବର୍ଷ ପରେ କେନ୍ଦ୍ରାପଡା ଆଶ୍ରମ ଫେରିବେ : ସାରଥୀ ଓରଫ ସନ୍ତୋଷ ରାଉଳ

୦୮ ମାର୍ଚ୍ଚ ୨୦୨୫ (ଓଡ଼ିଶା ତାଜା ନ୍ୟୁଜ୍) କେନ୍ଦ୍ରାପଡ଼ା :-> ପୂର୍ବରୁ ୨୦୨୨ ମସିହାରେ ଆଶ୍ରମ ଭିତରେ ଭକ୍ତଙ୍କ ସତସଙ୍ଗ କାର୍ଯ୍ୟକ୍ରମ ଆରମ୍ଭ କରିଥିବା ବେଳେ ଯାହାକୁ ନେଇ ଜିଲ୍ଲାରେ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଥିଲା । ତେବେ ଗତକାଲି ଓଡ଼ିଶା ହାଇକୋର୍ଟ ସାରଥୀଙ୍କୁ କେନ୍ଦ୍ରାପଡା ଫେରିବା ପାଇଁ ସର୍ତ୍ତମୂଳକ ଅନୁମତି ଦେବା ପରେ ଜିଲ୍ଲାରେ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଛି ।
ସାରଥୀଙ୍କୁ ନେଇ ହାଇକୋର୍ଟଙ୍କର ଗତ ବୁଧବାର ଆସିଥିଲା ଗୁରୁତ୍ୱପୂର୍ଣ୍ଣ ରାୟ । କେନ୍ଦ୍ରାପଡା ଆସିବା ପାଇଁ ବାବା ସାରଥୀ ହାଇକୋର୍ଟଙ୍କ ନିକଟରେ ପ୍ରାର୍ଥନା କରିଥିଲେ । ଯେଉଁଥିରେ ନିଜ ଅସୁସ୍ଥ ଭାଇଙ୍କୁ ଦେଖିବା କଥା ସେ ଦର୍ଶାଇ ଥିଲେ ।

ତେବେ ସାରଥୀଙ୍କ ଆବେଦନକୁ ବିଚାର କରି ଉଚ୍ଚ ନ୍ୟାୟାଳୟ କେତେକ ସର୍ତ୍ତ ରଖି ସାରଥୀଙ୍କୁ କେନ୍ଦ୍ରାପଡା ଯିବାକୁ ଅନୁମତି ପ୍ରଦାନ କରିଛନ୍ତି । ୨୦୨୨ ମସିହାରେ ଦିଆ ଯାଇଥିବା ନିର୍ଦ୍ଦେଶର ପୁନଃବିଚାର ପାଇଁ ସାରଥୀ ପକ୍ଷରୁ ହାଇକୋର୍ଟରେ ଆବେଦନ କରାଯାଇଥିଲା । ତାଙ୍କ ପାସପୋର୍ଟ ଫେରାଇବା ସହିତ ସର୍ବ ସାଧାରଣରେ ପ୍ରବଚନ ଦେବାକୁ ଅନୁମତି ଲୋଡ଼ିଥିଲେ ସାରଥୀ କିନ୍ତୁ ଉକ୍ତ ଆବେଦନକୁ ଖାରଜ କରିଛନ୍ତି ହାଇକୋର୍ଟ ।

ତେବେ କିଛି ସର୍ତ୍ତ ଆଧାରରେ ସାରଥିଙ୍କୁ କେନ୍ଦ୍ରାପଡା ଆସିବା ପାଇଁ ଅନୁମତି ମିଳିଛି । ସେଗୁଡିକ ହେଲା ୨ ମାସରେ ଥରେ ସାରଥୀ କେନ୍ଦ୍ରାପଡା ଯାଇପାରିବେ । ସକାଳ ସାଢେ ୫ଟାରୁ ସନ୍ଧ୍ୟା ସାଢେ ୫ ଟା ଯାଏଁ ସେ କେନ୍ଦ୍ରାପଡ଼ାରେ ରହିପାରିବେ ହେଲେ କୌଣସି ପରିସ୍ଥିତିରେ ସେ ବାରିମୂଳ ଆଶ୍ରମ ଯାଇପାରିବେ ନାହିଁ । କେନ୍ଦ୍ରାପଡା ଯିବାଲାଗି ତାଙ୍କୁ ୭ଦିନ ଆଗରୁ କୋର୍ଟଙ୍କୁ ଜଣାଇବାକୁ ପଡିବ । କେନ୍ଦ୍ରାପଡା ଥାନା ଏବଂ ନିଜେ ରହୁଥିବା ଥାନା ଅଞ୍ଚଳର ଅଧିକାରୀଙ୍କୁ ମଧ୍ୟ କେନ୍ଦ୍ରାପଡ଼ା ଗସ୍ତର ୭ ଦିନ ଆଗରୁ ଜଣାଇବେ ସାରଥୀ ।