ବେଡି ଉପରେ କୋରଡା ମାଡ଼ ,ବାତ୍ୟା ଦାନାର କ୍ଷୟକ୍ଷତି ପରେ , ଜଂଗଲି ବାର୍ହା ଉପଦ୍ରବ, ଶହଶହ ଏକର ଧାନ ଫସଲ ନଷ୍ଟ

୪ ନଭେମ୍ବର ୨୦୨୪ (ଓଡ଼ିଶା ତାଜା ନ୍ୟୁଜ୍ ) ଦଶପଲ୍ଲା :-> ବାତ୍ୟା ଜନିତ ଲଗାଣ ବର୍ଷା ସାଂଗକୁ ଜଂଗଲି ବାର୍ହା ଉପଦ୍ରବ ଯୋଗୁଁ ଦଶପଲ୍ଲା ପଶ୍ଚିମାଞ୍ଚଳରେ ବ୍ୟାପକ ଅମଳକ୍ଷମ ଧାନ ଫସଲ ସମ୍ପୁର୍ଣ୍ଣ ନଷ୍ଟ ହୋଇଯାଇଅଛି । ରାତ୍ରୀର ବିଳମ୍ବିତ ପ୍ରହରରେ ଜଂଗଲ ଅଂଚଳରୁ ଜଂଗଲି ବାର୍ହା ପଲ ଆସି ଅମଳକ୍ଷମ ଧାନ ଫସଲ ନଷ୍ଟ କରିବା ସଂଗେ ସଂଗେ ଦଳିମକଚି ନଷ୍ଟ କରୁଥିବା ଦେଖିବାକୁ ମିଳୁଛି ।

ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ୍ ର ବଣ ପାହାଡ ଘେରା ପଶ୍ଚିମାଞ୍ଚଳରେ ଶହଶହ ଏକର ଅମଳକ୍ଷମ ପାଚିଲା ଧାନ କ୍ଷେତ ବାରହାମାନେ ନଷ୍ଟ କରିଦେଇଛନ୍ତି । ଯଦି ଏହିପରି ସମସ୍ୟା ଲାଗିରହେ ତେବେ, ପରିବାର ଚଳାଇବା କାଠିକର ପାଠ ହେବ ବୋଲି ଆଦିବାସୀ, ହରିଜନ ଗରିବ ଚାଷୀମାନେ ଅଭିଯୋଗ କରିଛନ୍ତି ।

ଦଶପଲ୍ଲା ପଶ୍ଚିମାଞ୍ଚଳର ଟାକରା,ବୁଗୁଡା, କୁଲୁରୁକୁମ୍ପା, ବାଣିଗୋଛା, ଦୁଡା,ଚଢେୟାପଲ୍ଲୀ, ନୂଆଗାଁ ଗ୍ରାମପଞ୍ଚାୟତ ର ଶହଶହ ଏକର ଧାନଫସଲ ନଷ୍ଟ ହେଉଥିବାବେଳେ , ପ୍ରତିବର୍ଷ ଏହିଭଳି ଅନେକ ସଂଖ୍ୟକ ଚାଷୀ ମାନେ ବାରହା ଉପଦ୍ରବ ଯୋଗୁଁ ହଇରାଣ ହରକତ ହେଉଥିବା ହେଉଛନ୍ତି ।

ବନ୍ୟପ୍ରାଣୀ ବନବିଭାଗ ଉଣା ଅଧିକେ କ୍ଷତିପୂରଣ ପ୍ରଦାନ କରୁଥିଲେ ମଧ୍ୟ , ଦଶପଲ୍ଲା ବନାଚଂଳ ଟେରିଟୋରିଆଲ୍ ପକ୍ଷରୁ କୌଣସି ପଦକ୍ଷେପ ନିଆଯାଇନାହିଁ । ଏହି ସମସ୍ୟାର ସ୍ଥାୟୀ ପ୍ରତିକାର କରାନଗଲେ କ୍ଷତିଗ୍ରସ୍ତ ଚାଷୀମାନେ ଆନ୍ଦୋଳନ କରିବେ ବୋଲି ଧମକ୍ ଦେଇଛନ୍ତି ।