ନଟିଆରେ ନଟବରଙ୍କର ଜନ୍ମାଷ୍ଟମୀ ଓ ନନ୍ଦ ଉତ୍ସବ ପାଳିତ

୨୭ ଅଗଷ୍ଟ,୨୦୨୪ (ଓଡ଼ିଶା ତାଜା ନ୍ୟୁଜ୍ ) ପୁରୀ :-> ନନ୍ଦନନ୍ଦନ, ଯଶୋଦା ସନ୍ତାନ,ଗୋପୀବଲ୍ଲଭ ,ଗୋପ ଚୂଡ଼ାମଣି ଶ୍ରୀ ଗୋପାଳ ମହାପ୍ରଭୁ ଶ୍ରୀକୃଷ୍ଣ ଭଗବାନ ହେଉଛନ୍ତି ଗୋପାଳ ଜାତିର ଇଷ୍ଟଦେବତା।ସେ ବିଶ୍ବ ଚିନ୍ତା ମଣି ବିଶ୍ୱ ନାୟକ।ସେ ଭାବ, ଭକ୍ତି, ବିଶ୍ୱାସ ଓ ପ୍ରେମର ଠାକୁର।

ପବିତ୍ର ଜନ୍ମାଷ୍ଟମୀ ତିଥି ହେଉଛି ପ୍ରଭୁ ଶ୍ରୀକୃଷ୍ଣଙ୍କର ଜନ୍ମ୍ ଦିବସ। ପୁରୀ ଜିଲ୍ଲା ଅନ୍ତର୍ଗତ ଐତିହାସିକ ବୀରଭୂମି ବ୍ରହ୍ମଗିରି ବ୍ଳକ୍ ର ଭୁବନପୁର ଗ୍ରାମ ପଞ୍ଚାୟତ ଅଧୀନ ନଟିଆ ଗ୍ରାମରେ ଯାଦବ ସଂଘ ତରଫରୁ ଜନ୍ମାଷ୍ଟମୀ ଓ ନନ୍ଦ ଉତ୍ସବ ମହା ସମାରୋହରେ ପାଳନ କରାଯାଇଛି ।

ଏହି ଅବସରରେ ଗ୍ରାମବାସୀଙ୍କ ତରଫରୁ ଜନ୍ମାଷ୍ଟମୀ ଦିନ ଠାକୁରଙ୍କ ପ୍ରାଣ ପ୍ରତିଷ୍ଠା ଓ ପୂଜାର୍ଚ୍ଚନା କରାଯାଇଥିଲା। ଜନ୍ମାଷ୍ଟମୀ ପରଦିନ ଠାକୁରଙ୍କୁ ଦୋଳରେ ବସାଇ ନଗର ପରିକ୍ରମା କରାଯାଇ ଥିଲା।ଛୋଟ ଛୋଟ ଶିଶୁମାନେ କୃଷ୍ଣ, ବଳରାମ,ସୁଦାମା,ସୁବଳ,ନନ୍ଦ,ଯଶୋଦା ,

ଭାଲୁ ଆଦି ବେଶରେ ସୁସଜ୍ଜିତ ହୋଇ ଏଥିରେ ସାମିଲ ହୋଇଥିଲେ।ଲଉଡି ଖେଳର ତାଳେ ତାଳେ ଗୋପାଳ ମାନେ ମହା ଆନନ୍ଦରେ ନାଚି ନାଚି ସେମାନଙ୍କ ର ଅପୂର୍ବ ଭାବ ଭକ୍ତି ର ପ୍ରଦର୍ଶନ କରିଥିଲେ। ପୃଥିବୀରେ ଶାନ୍ତି, ଭାଇଚାରା ଓ ଏକତାର ବାର୍ତ୍ତା ବାଣ୍ଟିବା ଉଦ୍ଦେଶ୍ୟରେ

ଏହି ମହୋତ୍ସବ ଚାରି ବର୍ଷ ଧରି ଅନୁଷ୍ଠିତ ହୋଇ ଆସୁଅଛି ବୋଲି ଗ୍ରାମର ମୁରବି ଅର୍ଜୁନ ପଢିଆରୀ,ରବି ନାରାୟଣ ବେହେରା,ହରି ପଢିଆରି,ଅବୁ ପଢିଆରୀ,ପୂର୍ଣ ପଢିଆରୀ ପ୍ରମୁଖ କହିଛନ୍ତି। ଜନ୍ମାଷ୍ଟମୀ ଗୋପାଳ ସଂସ୍କୃତି ର ପରିଚୟ ।

ଏହି ସଂସ୍କୃତି ର ସୁରକ୍ଷା ଓ ସଂରକ୍ଷଣ ପାଇଁ ସରକାରଙ୍କ ତରଫରୁ ସାହାଯ୍ୟ ସହଯୋଗ ଯୋଗାଇ ଦିଆଗଲେ ଏହା ଆହୁରି ଦୀର୍ଘ ସ୍ଥାୟୀ ହୋଇ ପାରିବ ଏବଂ ଲଉଡି ଖେଳର ପୁନଋଧ୍ଧାର ହୋଇ ପାରିବ ବୋଲି ବିଶିଷ୍ଟ ସାମାଜିକ କର୍ମୀ ଆଇନଜୀବୀ ଦିଗମ୍ବର ବେହେରା କହିଛନ୍ତି ।