ରଣପୁର ବିଧାୟିକା ସୁରମା ପାଢ଼ୀ ସପ୍ତଦଶ ବିଧାନସଭାର ବାଚସ୍ପତି ହୋଇଛନ୍ତି

୨୦ ଜୁନ୍,୨୦୨୪ (ଓଡ଼ିଶା ତାଜା ନ୍ୟୁଜ୍ ) ଭୁବନେଶ୍ୱର :-> ପୂର୍ବତନ ମନ୍ତ୍ରୀ ତଥା ବିଜେପିର ରଣପୁର ବିଧାୟିକା ସୁରମା ପାଢ଼ୀ ସପ୍ତଦଶ ବିଧାନସଭାର ବାଚସ୍ପତି ହୋଇଛନ୍ତି । ବାଚସ୍ପତି ପଦ ଲାଗି ଗତକାଲି ସେ ନାମାଙ୍କନ ପତ୍ର ଦାଖଲ କରିଥିଲେ । ମାତ୍ର ଅନ୍ୟ କୌଣସି ସଦସ୍ୟ ନାମାଙ୍କନ ଦାଖଲ କରି ନ ଥିବାରୁ ସେ ନିଦ୍ୱର୍ନ୍ଦରେ ନିର୍ବାଚିତ ହୋଇଛନ୍ତି । ଆଜି ବିଧାନସଭାରେ ମୁଖ୍ୟମନ୍ତ୍ରୀ ମୋହନ ମାଝୀ ଏ ନେଇ ଏକ ପ୍ରସ୍ତାବ ଆଗତ କରିଥିଲେ । ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ ଏହାକୁ ସମର୍ଥନ କରିଥିଲେ । ପ୍ରସ୍ତାବଟି ଗୃହରେ ସର୍ବସମ୍ମତିକ୍ରମେ ପାରିତ ହୋଇଥିଲା । ଏହାପରେ କାମଚଳା ବାଚସ୍ପତ୍ତି ରଣେନ୍ଦ୍ର ପ୍ରତାପ ସ୍ୱାଇଁ ଶ୍ରୀମତୀ ସୁରମା ପାଢ଼ୀଙ୍କୁ ବିଧାନସଭାର ବାଚସ୍ପତି ଭାବେ ଘୋଷଣା କରିଥିଲେ ।ମୁଖ୍ୟମନ୍ତ୍ରୀ ଶ୍ରୀ ମାଝୀ, ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ଏବଂ ଶ୍ରୀମତୀ ପ୍ରଭାତୀ ପରିଡ଼ା, ବିରୋଧୀ ଦଳ ନେତା ନବୀନ ପଟ୍ଟନାୟକ, ଉପନେତା ପ୍ରସନ୍ନ ଆଚାର୍ଯ୍ୟ, ଉପମୁଖ୍ୟ ସଚେତକ ପ୍ରତାପ ଦେବ, କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ପ୍ରମୁଖ ନୂଆ ବାଚସ୍ପତି ଶ୍ରୀମତୀ ପାଢ଼ୀଙ୍କୁ ଅଭିନନ୍ଦନ ଜଣାଇ ତାଙ୍କ ଆସନ ପର୍ଯ୍ୟନ୍ତ ପାଛୋଟି ନେଇଥିଲେ । କାମଚଳା ବାଚସ୍ପତି ଶ୍ରୀ ସ୍ୱାଇଁ ତାଙ୍କୁ ଦାୟିତ୍ୱ ହସ୍ତାନ୍ତର କରି ଆସନ ଛାଡ଼ିଥିଲେ । ପରେ ନୂଆ ବାଚସ୍ପତିଙ୍କୁ ଉଭୟ ଶାସକ ଓ ବିରୋଧୀ ଦଳ ପକ୍ଷରୁ ସ୍ୱାଗତ ଜଣାଯାଇଥିଲା । ବାଚସ୍ପତି ଦାୟିତ୍ୱ ପାଇଲା ପରେ ଶ୍ରୀମତୀ ପାଢ଼ୀ ଅତ୍ୟନ୍ତ ଭାବବିହ୍ୱଳ ହୋଇପଡ଼ିଥିଲେ ।ସମସ୍ତଙ୍କୁ କୃତଜ୍ଞତା ଜଣାଇବା ସହ ଗୃହର ଗାରିମା ଓ ପଦମର୍ଯ୍ୟାଦା ରକ୍ଷା ପାଇଁ ସହଯୋଗ କାମନା କରିଥିଲେ । ସୂଚନାଥାଉକି, ବିଜେପିର ବରିଷ୍ଠ ନେତ୍ରୀ ହେଉଛନ୍ତି ସୁରମା ପାଢ଼ୀ । ୧୯୯୮ ମସିହାରେ ବିଜେପି ରାଜ୍ୟ ମହିଳା ମୋର୍ଚ୍ଚାର ସଭାନେତ୍ରୀ ଭାବେ କାର୍ଯ୍ୟ କରିଥିଲେ । ୨୦୦୦ ମସିହାରେ ଦୁଇ ବର୍ଷ ପାଇଁ ବିଜେପିର ଜାତୀୟ ମହିଳା ମୋର୍ଚ୍ଚାର ସଭାନେତ୍ରୀ ଥିଲେ । ରଣପୁର ବିଧାନସଭା ଆସନରୁ ୨୦୦୪ ମସିହାରେ ପ୍ରଥମ ଥର ବିଧାନସଭାକୁ ନିର୍ବାଚିତ ହୋଇଥିଲେ । ବିଜେପି-ବିଜେଡି ମେଣ୍ଟ ସରକାରରେ ସେ ମନ୍ତ୍ରୀ ହୋଇଥିଲେ । ତାଙ୍କୁ ସମବାୟ ବିଭାଗ ମିଳିଥିଲା । ଦୀର୍ଘ ୧୪ ବର୍ଷ ପରେ ରଣପୁର ଆସନରୁ ସେ ପୁଣି ବିଧାନସଭାକୁ ଆସିଛନ୍ତି ।ଶ୍ରୀମତୀ ସୁରମା ପାଢୀ ମାନ୍ୟବର ବାଚସ୍ପତି ଓଡ଼ିଶା , ରଣପୁର ବାସି ଙ୍କ ତରଫରୁ ହାର୍ଦ୍ଧିକ ଅଭିନନ୍ଦନ, ରଣପୁର ବାସି ଆପଣଙ୍କ ପାଇଁ ଗର୍ବିତ, ଆପଣଙ୍କ ନାମ ଇତିହାସରେ ସବୁଦିନ ପାଇଁ ଲିପିବଦ୍ଧ ହୋଇ ରହିବ, ରାଣୀ ବସନ୍ତ ମଞ୍ଜରୀ ଙ୍କ ପରେ ରଣପୁର ର ନାମ ଆପଣ ଉଚ୍ଚା କରିଛନ୍ତି, ପ୍ରଭୁ ଶ୍ରୀ ଜଗନ୍ନାଥ, ମା ମଣିନାଗ ଠାକୁରାଣୀ ଓ ପ୍ରଭୂ ଲଡୁ ବାବା ଙ୍କ ଆର୍ଶୀବାଦ ଆପଣ ଉପରେ ସଦା ସର୍ବଦା ରହୁ, ଓଡ଼ିଶା ସହ ରଣପୁର ର ବିକାଶ ହେଉ ଏହାହିଁ ପ୍ରଭୁଙ୍କ ନିକଟରେ ପ୍ରାର୍ଥନା .