ଶ୍ରୀ ଲିଙ୍ଗରାଜ ମହାପ୍ରଭୁଙ୍କ ମନ୍ଦିରର ଶାନ୍ତ ଓ ସ୍ନିଗ୍ଧ ପରିବେଶ ମଧ୍ୟରେ ମହାପ୍ରଭୁଙ୍କ ଦର୍ଶନ କରି ମୁଁ ଦିବ୍ୟ ଆନନ୍ଦ ଲାଭ କରିଛି- ରାଷ୍ଟ୍ରପତି ପୂଜାର୍ଚ୍ଚନା କରି ଦେଶବାସୀଙ୍କ ସୁଖ, ସମୃଦ୍ଧି ତଥା ବିଶ୍ୱକଲ୍ୟାଣ ପାଇଁ କଲେ ପ୍ରାର୍ଥନା
ସେଠାରୁ ଆସିବା ପରେ ଶ୍ରୀ ଶ୍ରୀ ଲିଙ୍ଗରାଜ ମହାପ୍ରଭୁଙ୍କ ମନ୍ଦିର ଠାରେ ପହଁଚିବା କ୍ଷଣି ଉପସ୍ଥିତ ମନ୍ଦିର ବଡୁ ନିଯୋଗ, ବ୍ରାହ୍ମଣ ନିଯୋଗ ଏବଂ ପୂଜାପଣ୍ଡା ନିଯୋଗର କର୍ମକର୍ତ୍ତା ମାନେ ରାଷ୍ଟ୍ରପତି ମହୋଦୟାଙ୍କୁ ସ୍ୱାଗତ କରିଥିଲେ । ମାନ୍ୟବର ରାଷ୍ଟ୍ରପତି ମହୋଦୟାଙ୍କୁ ବଡୁ ନିଯୋଗର ସଂପାଦକ ପ୍ରଥମେ ସିଦ୍ଧ ଗଣେଶଙ୍କୁ ଦର୍ଶନ କରାଇ ସେଠାରେ ପୂଜାର୍ଚ୍ଚନା କରାଇଥିଲେ । ପୂଜକ ଶଶୀଭୂଷଣ ମକଦ୍ଦମ ସେଠାରେ ପୂଜା କରାଇଥିଲେ । ପରେ ପରେ ମାନ୍ୟବର ରାଷ୍ଟ୍ରପତି ମହୋଦୟା ମହାପ୍ରଭୁଙ୍କ ଗର୍ଭଗୃହରେ ଶ୍ରୀ ଶ୍ରୀ ଲିଙ୍ଗରାଜ ମହାପ୍ରଭୁଙ୍କୁ ଦର୍ଶନ କରିଥିଲେ । 
ବେଢାରେ ଥିବା ଲକ୍ଷ୍ମୀ ନାରାୟଣଙ୍କ ମୂର୍ତ୍ତି ଦର୍ଶନ କରିଥିଲେ । ପରେ ପରେ ମନ୍ଦିର ପତାକାକୁ ପ୍ରଣିପାତ କରି ଦର୍ଶନ ସମାପ୍ତ କରିଥିଲେ । ଏହା ପରେ ପୂର୍ବ ପ୍ରସ୍ତୁତି ଅନୁସାରେ ଗରୁଡସ୍ତମ୍ଭ ନିକଟରେ ମହାପ୍ରଭୁ ଶ୍ରୀ ଶ୍ରୀ ଲିଙ୍ଗରାଜ ମନ୍ଦିର ଟ୍ରଷ୍ଟବୋଡର ସଦସ୍ୟ, ବିଭିନ୍ନ ନିଯୋଗର କର୍ମକର୍ତ୍ତା ଏବଂ ସେବାୟତ ପ୍ରତିନିଧିଙ୍କ ସହିତ ଫଟୋ ଉଠାଇଥିଲେ । ଏହି ଅବସରରେ ବଡୁ ସେବାୟତଙ୍କ ତରଫରୁ ପ୍ରଦତ୍ତ ଶ୍ରୀ ଶ୍ରୀ ଲିଙ୍ଗରାଜ ମହାପ୍ରଭୁଙ୍କ ପବିତ୍ର କାର୍ତ୍ତିକ ମାସର ରାଇ ଦାମୋଦର ବେଶର ଏକ ଫଟୋ ମନ୍ଦିର ଜିଲ୍ଲାପାଳ ତଥା ମନ୍ଦିର ଟ୍ରଷ୍ଟବୋର୍ଡ ସଭାପତିଙ୍କ ଜରିଆରେ ମାନ୍ୟବର ରାଷ୍ଟ୍ରପତି ମହୋଦୟାଙ୍କୁ ପ୍ରଦାନ କରାଯାଇଥିଲା । 
