୨ଫେବୃଆରୀ ୨୦୨୩ (ଓଡ଼ିଶା ତାଜାନ୍ୟୁଜ ) ପାରଳାଖେମୁଣ୍ଡି :- ଗଜପତି ଜିଲ୍ଲା ମୋହନା ବ୍ଲକରେ ଅବସ୍ଥିତ ଜିଲ୍ଲାର ଏକମାତ୍ର ସ୍ୱତନ୍ତ୍ର ଦିବ୍ୟାଙ୍ଗ ଅନୁଷ୍ଠାନ ମହାରାଜା କୃଷ୍ଣ ଚନ୍ଦ୍ର ଗଜପତି ଦୃଷ୍ଟିହୀନ ଓ ବଧିର ଆବାସିକ ବିଦ୍ୟାଳୟ ସ୍ଥାନୀୟ କଣ୍ଟେଇକୋଳି ଗ୍ରାମରେ ରହିଛି। ଦୀର୍ଘ ୩୦ ବର୍ଷରୁ ଉର୍ଦ୍ଧ୍ବ ଏହି ଏକ ମାତ୍ର ପୁରାତନ ଅନୁଷ୍ଠାନ ଯାହା କି ମହାରାଜା କୃଷ୍ଣଚନ୍ଦ୍ର ଗଜପତି ଙ୍କ ନାମରେ ନାମିତ। ଏହି ଅନୁଷ୍ଠାନକୁ କନ୍ଧମାଳ, ଗଜପତି, ରାୟଗଡ଼ା, ଗଞ୍ଜାମ ଜିଲ୍ଲାର ବହୁ ଦିବ୍ୟାଙ୍ଗ ବିଦ୍ୟାର୍ଥୀ ନିର୍ଭର କରନ୍ତି। ଅବିଭାବକମାନେ ନିଜ ନିଜର ସନ୍ତାନ ସନ୍ତତି ମାନଙ୍କୁ ଏହି ଅନୁଷ୍ଠାନରେ ଶିକ୍ଷା ଗ୍ରହଣ ପାଇଁ ନିର୍ଭୟରେ ଛାଡୁଥିଲେ। ବର୍ତ୍ତମାନ ଏହି ଅନୁଷ୍ଠାନ ଦିନକୁ ଦିନ ବିଭିନ୍ନ ସମସ୍ୟା ଦେଇ ଗତି କରୁଛି।
କମିଟିର ଅଗୋଚରରେ କେନ୍ଦ୍ର ସରକାରଙ୍କ ଅନୁଦାନ ଅର୍ଥରାଶିକୁ ହରିଲୁଟ କରିବାରେ ଲାଗିଛନ୍ତି।ଯାହା ଦ୍ୱାରା ଛାତ୍ର ଛାତ୍ରୀ ମାନେ ଏହି ଅନୁଷ୍ଠାନରେ ପାଠ ପଢିବାକୁ ଇଛା ପ୍ରକାଶ କରୁନାହାନ୍ତି। ଏହି ଅନୁଷ୍ଠାନରେ ଛାତ୍ର ଛାତ୍ରୀଙ୍କ ସଂଖ୍ୟା ୩୦ରୁ ୩୫ ଜଣ ଥିବା ବେଳେ ବର୍ତ୍ତମାନ ଅଧିକ ସଂଖ୍ୟକ ବିଦ୍ୟାର୍ଥୀ ପାଠ ପଢୁଥିବା ଉଲ୍ଲେଖ କରାଯାଇ ପ୍ରଶାସନର ଦୃଷ୍ଠି ଆକର୍ଷଣ କରାଯାଉଛି। ପୂର୍ବତନ ଶିକ୍ଷକ ଶିକ୍ଷୟିତ୍ରୀମାନେ ଏହାର ତଦନ୍ତ ପାଇଁ ବହୁ ବାର ଜିଲ୍ଲା ପ୍ରଶାସନକୁ ଅଭିଯୋଗ କରିଛନ୍ତି କିନ୍ତୁ କୌଣସି ସୁଫଳ ନ ମିଳିବାରୁ ଉଚ୍ଚ ନ୍ୟାୟାଳୟର ଦ୍ୱାରସ୍ଥ ମଧ୍ୟ ହୋଇଛନ୍ତି। ଆଉ ଯାହା ଦ୍ୱାରା କେନ୍ଦ୍ର ସରକାରଙ୍କ ଅନୁଦାନ ଏବେ ବନ୍ଦ ହେବାରେ ଲାଗିଛି। ଆଉ କିଛି ଦିନ ପରେ ଏହି ଅନୁଷ୍ଠାନ ବନ୍ଦ ହୋଇଯିବ ଜାଣିବା ପରେ ଅଞ୍ଚଳବାସୀ ଅଣ୍ଟା ଭିଡ଼ିଲେଣି ଉକ୍ତ ଅନୁଷ୍ଠାନରୁ ସଭାପତି, ସମ୍ପାଦକ ଓ ଅନ୍ୟ କମିଟି ସଦସ୍ୟମାନଙ୍କୁ ବାହାର କରି ନୂତନ କମିଟି ଗଠନ ପାଇଁ ଦାବି କରିଛନ୍ତି। ସମ୍ପାଦକଙ୍କ ଏକଚାଟିଆ ମନୋବୃତିକୁ ବିରୋଧ କରିବା ସହ ଯଦି ପୂର୍ବ କମିଟି ଏହି ଅନୁଷ୍ଠାନରୁ ନ ବାହାରନ୍ତି ଅଳ୍ପ ଦିନ ମଧ୍ଯରେ ଆନ୍ଦୋଳନ ତୀବ୍ରତର ହେବ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି।
ଏହି ଖବର ସମାଜରେ ପ୍ରକାଶନ ପରେ ଜିଲ୍ଲାପାଳଙ୍କ ନିର୍ଦ୍ଦେଶରେ ବିଦ୍ୟାଳୟର ପହଞ୍ଚିଛନ୍ତି ଜିଲ୍ଲାସ୍ତରୀୟ ୫ ଜଣିଆ ଟିମ । ସେମାନଙ୍କ ମଧ୍ୟରେ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ସନ୍ତୋଷ କୁମାର ନାୟକ, ଜିଲ୍ଲା ସମାଜ ମଙ୍ଗଳ ଅଧିକାରୀଣି ମିନତି ଦେଇ, ଶିଶୁ ସୁରକ୍ଷା ଅଧିକାରୀ ଅରୁଣ କୁମାର ତ୍ରିପାଠୀଙ୍କ ସମେତ ଅନ୍ୟ ୨ଜଣ କର୍ମଚାରୀ ବିଦ୍ୟାଳୟରେ ପହଞ୍ଚି କାର୍ଯ୍ୟାଳୟର ଆବଶ୍ୟକୀୟ ସମସ୍ତ ନଥିପତ୍ର ଯାଞ୍ଚ କରିଥିଲେ। ଆଵଶ୍ଯକୀୟ ନଥିପତ୍ରରେ ଜାଲ ଦତଖସ୍ତ, କାଗଜପତ୍ରରେ ଜାଲିଆତି, ବାରମ୍ଵାର କର୍ମଚାରୀ ନିଯୁକ୍ତି ଓ ମନୋନୟନ ପକ୍ରିୟାକୁ ପସନ୍ଦ କରିନଥିଲେ। ବିଦ୍ୟାଳୟର ଅନିୟମିତତାକୁ ନେଇ ଅସନ୍ତୋଷ ପ୍ରକାଶ କରିଥିଲେ। ଦୀର୍ଘ ବର୍ଷ ଧରି ସଭାପତି ବିଦ୍ୟାଳୟକୁ ସଭାପତି ନ ଆସିବା ଓ ସରକାରୀ କିଛି କାଗଜପତ୍ରରେ ପ୍ରଧାନଶିକ୍ଷକଙ୍କ ଦତଖସ୍ତ ରହିବା ସ୍ଥାନରେ ସମ୍ପାଦକ ଦତଖସ୍ତ କରି କାମ ଚଳାଉଥିବା ଦେଖିବାକୁ ମିଳିଛି।
ଅଧିକାରୀମାନେ ନଥିପତ୍ର ଯାଞ୍ଚ କରିବା ସହିତ କିଛି ଆବଶ୍ୟକୀୟ ନଥିପତ୍ର ସାଥିରେ ନେଇ ପାରଳାଖେମୁଣ୍ଡି ଯାଇଛନ୍ତି।ସେଠାରେ ଟିକିନିଖି ଯାଞ୍ଚ କରିବେ ବୋଲି ଅଧିକାରୀମାନେ କହିଛନ୍ତି। ଯାଞ୍ଚ ପରେ ଜିଲ୍ଳାପାଳଙ୍କୁ ରିପୋର୍ଟ ପ୍ରଦାନ କରିବେ ବୋଲି କହିଛନ୍ତି।ଏହାର ସଠିକ ତଦନ୍ତ କରି ବିଦ୍ୟାଳୟର ସମ୍ପାଦକଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି। ଜିଲ୍ଲାରୁ ତଦନ୍ତ ଅଧିକାରୀ ଆସୁଥିବା ଜାଣିଶୁଣି ପ୍ରଧାନଶିକ୍ଷକ ବିଦ୍ୟାଳୟକୁ ନଆସି ମୋହନାରେ ରହିଥିବା ଜଣାପଡିଛି।
