ପ୍ରାକୃତିକ ସୌନ୍ଦର୍ଯ୍ୟ ଭରା ଜଳପ୍ରପାତ “ଡଙ୍ଗାସିଲ”

୨୩ ଜାନୁଆରୀ ସୋମବାର ,୨୦୨୩ (ଓଡ଼ିଶା ତାଜାନ୍ୟୁଜ ) ଆର. ଉଦୟଗିରି :- ପ୍ରାକୃତିକ ସୌନ୍ଦର୍ଯ୍ୟ ଭରା ଗଜପତିର ଅନ୍ୟ ଏକ ଜଳପ୍ରପାତ ହେଉଛି ଡଙ୍ଗାସିଲ୍ । ଏହା ଦୁଇଟି ପାହାଡ କୋଳରେ କୁଳୁକୁଳୁ ନାଦରେ ନିଃଶବ୍ଦ ଜଙ୍ଗଲ ପରିବେଶକୁ ଏକପ୍ରକାର ଚଳ ଚଞ୍ଚଳର ଭ୍ରମ ସୃଷ୍ଟି କରି ରହିଛି । ଏହା ଲୁକାଇତ ଭାବେ ରହିଅଛି । ଏଠାକୁ ସ୍ଥାନୀୟ ଗ୍ରାମାଞ୍ଚଳର ଲୋକେ ଏଠାକୁ ବଣ ଭୋଜି କରିବାକୁ ଯାଆନ୍ତି ଏବଂ ଏହାର ମଜା ଉଠନ୍ତି । ଗଜପତି ଜିଲ୍ଲା ବଡ଼ପଦା ଠାରୁ ପାରଳାଖେମୁଣ୍ଡି ଯିବା ରାସ୍ତାରେ ମାତ୍ର ଦୁଇ କିଲୋମିଟର ଦୂରରେ ଅବସ୍ଥିତ ଏହି ଜଳପ୍ରପାତ । ଏହାର ପ୍ରାକୃତିକ ଶୋଭା ପର୍ଯ୍ୟଟକଙ୍କ ମନମୁଗ୍ଧକର ଓ ଜୀବନର ସମସ୍ତ ମାନସିକ ଭାରାକ୍ରାନ୍ତ ଦୂର କରିବା ପାଇଁ ବେଶ ଉପଯୋଗୀ ପରିବେଶ ସୃଷ୍ଟି କରୁଛି । ଯିଏ ଏଠାକୁ ଆସୁଛି ଏଠାରେ କିଛି ସମୟ ଏହାର ପରିବେଶରେ ନିଜକୁ ହଜାଇ ଦେଇଛି । ଝରଣିର ସ୍ୱଚ୍ଛ ଜଳ ଗଛଲତାର ସବୁଜିମା, ପଥର ମୟ ପାହାଡ଼ର ଅପରୂପ ଶୋଭା ମନକୁ ଆନମନା କରିବାରେ କିଛି କମ୍ ନୁହେଁ । ଶୀତୁଆ ସକାଳରେ ଏଠାରେ ଥିବା ଜଳ କୁଣ୍ଡରେ ଗାଧୋଇବା ମଜା ଅତୀବ ନିଆରା ହୋଇଥିବା ବେଳେ । ପର୍ଯ୍ୟଟନ ରୁତୁରେ ଏଠାରେ ପିକନିକ କରିବା ପ୍ରକୃତରେ ଆନନ୍ଦଦାୟକ । ଆଜି ବି ଏହି ଜଳପ୍ରପାତ ଲୋକଲୋଚନର ଆଢ଼ୁଆଳରେ ଲୁଚି ରହିଛି । କେବଳ ପାଖାପାଖି ଅଞ୍ଚଳର ଲୋକେ ଏହାର ଉପଭଗ କରୁଛନ୍ତି । ଏଠାକୁ ଗମନାଗମନ ବ୍ୟବସ୍ଥା କରିବା ପାଇଁ ରାସ୍ତା ନିର୍ମାଣ ସହ ପର୍ଯ୍ୟଟନ ବିଭାଗ ଏହାର ବିକାଶ ପ୍ରଚାର ପ୍ରାସାର କଲେ ପ୍ରକୃତି ପ୍ରେମୀଙ୍କ ସୁଅ ଛୁଟିବା ଆଶା କରାଯାଉଛି ।