୨୩ ଜାନୁଆରୀ ସୋମବାର ,୨୦୨୩ (ଓଡ଼ିଶା ତାଜାନ୍ୟୁଜ ) ନୟାଗଡ଼ :- ନୟାଗଡ଼ ରୋଟାରୀ ଭବନରେ ପୂଜ୍ଯପୂଜା କମିଟି ଓ ରୋଟାରୀ କ୍ଳବ୍ ନୟାଗଡ଼ର ମିଳିତ ଆନୁକୂଲ୍ୟରେ ନେତାଜୀ ସୁବାଷ ଚନ୍ଦ୍ର ବୋଷଙ୍କ ୧୨୬ ତମ ଜନ୍ମ ଜୟନ୍ତୀ ପାଳିତ ହୋଇ ଯାଇଛି । ନୟାଗଡ଼ ବିଜ୍ଞାପିତ ଅଞ୍ଚଳ ପରିଷଦର ପ୍ରାକ୍ତନ ଚେୟାରମ୍ୟାନ୍ ତଥା ବରିଷ୍ଠ ରୋଟାରୀଆନ ସୁବୋଧ ଚନ୍ଦ୍ର ପଟ୍ଟନାୟକ ନେତାଜୀଙ୍କ ପ୍ରତିଛବିରେ ପୁଷ୍ପମାଲ୍ୟ ଅର୍ପଣ କରିବି ସହ ନେତାଜୀ ଙ୍କ ସ୍ମୃତିଚାରଣ କରିଥିଲେ । ସମାଜସେବୀ ରୋଟାରୀଆନ୍ ଶ୍ରୀଧର ସାହୁ ନେତାଜୀଙ୍କ ସଂଗ୍ରାମୀ ଜୀବନ ବିଷୟରେ ଆଲୋଚନା କରିଥିଲେ । ଭାରତୀୟ ସ୍ବାଧୀନତା ସଂଗ୍ରାମକୁ ନେତାଜୀଙ୍କ ଅବଦାନ ଅନସ୍ବୀକାର୍ଯ୍ଯ । ଆଜାଦ ହିନ୍ଦ୍ ଫୌଜର ପ୍ରତିଷ୍ଠାତା ନେତାଜୀ ସୁଭାଷ ଚନ୍ଦ୍ର ବୋଷ ଭାରତ ବର୍ଷକୁ ସ୍ବାଧୀନ କରିବା ପାଇଁ ନିଜର ସମସ୍ତ ଶକ୍ତି ଲଗାଇ ଦେଇଥିଲେ । ନେତାଜୀ ମହାପ୍ରଭୁ ଶ୍ରୀଜଗନ୍ନାଥଙ୍କୁ ପ୍ରଗାଢ ଭକ୍ତି କରୁଥିଲେ ।
ସେ କହୁଥିଲେ, ‘ ମୁଁ ଜଣେ ଓଡ଼ିଆ । ଓଡ଼ିଶାର ପାଣି ପବନ ରେ ମୋର କୈଶୋର ଜୀବନ ଅତିବାହିତ ହୋଇଛି । କେବଳ ମୋର ନୁହେଁ, ମୋ ପରିବାରର ଆରାଧ୍ୟ ଦେବତା ହେଉଛନ୍ତି ଶ୍ରୀଜଗନ୍ନାଥ । ଓଡ଼ିଆ ରକ୍ତ ମୋ ଧମନୀରେ ପ୍ରବାହିତ, ଓଡିଆଙ୍କ ପଇସାରେ ବାପା ମୋତେ ପାଠ ପଢାଇଛନ୍ତି । ରେଙ୍ଗୁନ୍ ରେ ନେତାଜୀ ଥିଲାବେଳେ ଓଡିଆ ରେଜିମେଣ୍ଟ ଶିବିରକୁ ଯାଇ ଶ୍ରୀଜଗନ୍ନାଥଙ୍କ ଭଜନ ଶୁଣୁଥିଲେ । ଓଡିଆ ଭାଷା ସାହିତ୍ୟ, ସଂସ୍କୃତିକୁ ଭଲ ପାଉଥିବା ନେତାଜୀ ଓଡିଶାକୁ ଭାଷା ଭିତ୍ତିକ ରାଜ୍ଯ ଭାବେ ଗଠନ କରିବା ପାଇଁ ପ୍ରବଳ ଉଦ୍ଯମ କରିଥିଲେ । ଆଜାଦ ହିନ୍ଦ୍ ଫୌଜରେ ଆମ ରାଜ୍ଯର ଅବିଭକ୍ତ ଗଞ୍ଜାମ ଓ ଅବିଭକ୍ତ ପୁରୀ ଜିଲ୍ଲାର ବହୁ ଓଡିଆ ସାମିଲ୍ ହୋଇ ଥିଲେ । ୫୫ ଜଣ ଓଡିଆ ସୈନ୍ଯ ରେଙ୍ଗୁନ୍ ଜେଲରେ ମଧ୍ଯ ବନ୍ଦୀ ହୋଇଥିଲେ ।
ଆଜାଦ ହିନ୍ଦ୍ ଫୌଜର ନାରୀସେନା ଝାନସି ରେଜିମେଣ୍ଟ ରେ ୨୦ ହଜାର ରୁ ଉର୍ଦ୍ଧ୍ବ ମହିଳା ଯୋଗଦେଇଥିଲେ । ଏ ସବୁ ଘଟଣା ରୁ ଜଣା ପଡେ ନେତାଜୀଙ୍କ ମହିଳା ସଶକ୍ତିକରଣ ଓ ଓଡିଶା ପ୍ରେମର ଦ୍ରୁଷ୍ଟାନ୍ତ । ଏହି ଆଲୋଚନାରେ ରୋଟାରୀ କ୍ଳବ୍ ର ସଂପାଦକ ବାସୁଦେବ ସାହୁ, ରୋଟାରୀଆନ ଆରିଫ୍ ଖାଁ, ରଶ୍ମୀରଂଜନ ପାତ୍ର, ପ୍ରକାଶ ଚନ୍ଦ୍ର ପଟ୍ଟନାୟକ ଓ ମିହିର ରଂଜନ ନାୟକ ଯୋଗଦେଇଥିଲା ବେଳେ ପୂଜ୍ୟପୂଜା କମିଟି ର ଯୁଗ୍ମ ସଂପାଦକ ଧୀରେନ୍ଦ୍ର କୁମାର ପଟ୍ଟନାୟକ ଧନ୍ଯବାଦ ଅର୍ପଣ କରିଥିଲେ ।
