ଚଇତିରେ ଜନ ପ୍ରତିନିଧିଙ୍କୁ ଅପମାନ ।
ଆମନ୍ତ୍ରିତ ହୋଇନାହାନ୍ତି ଜିଲ୍ଲାର ବହୁ ଜନ ପ୍ରତିନିଧି ।
ମଞ୍ଚ ଛାଡ଼ିବାକୁ କହି ପୁଣି କ୍ଷମା ମାଗୁଛନ୍ତି ଅଧିକାରୀ ।
ଜନସାଧାରଣ ଏବଂ ବୁଦ୍ଧିଜୀବୀଙ୍କ ମତାମତ ପାଇଁ ୨୦୨୨ ଡିସେମ୍ବର ୧୭ ତାରିଖରେ ହୋଇଥିବା ପବ୍ଲିକ ମିଟିଂ ରୁ କାହିଁକି ରାଗିକି ଚାଲିଗଲେ ଜିଲ୍ଲାପାଳ । ଚଇତି ପ୍ରଥମ ଦିନରେ ଜନ ପ୍ରତିନିଧିଙ୍କୁ କାହିଁକି ମଂଚରୁ ଚାଲିଯିବା ଭଳି ଅପମାନିତ ହେବାକୁ ପଡ଼ିଲା । ପ୍ରଥମ ଦିନରେ ମୁଖ୍ୟ ଅତିଥି ଏବଂ ବିଶିଷ୍ଟ ଅତିଥି ନଥିବା ବେଳେ ସମ୍ମାନିତ ଅତିଥି ମୁହଁ ଦେଖାଇ କାହିଁକି ଚାଲିଗଲେ । ପୂର୍ବ ବର୍ଷ ଭଳି ଆଦିବାସୀ ଲୋକକଳା ସଂଶ୍ଲିଷ୍ଟ ମଂଚ ନିର୍ମାଣ ହୋଇନି କାହିଁକି । ପ୍ରଥମ ଦିନର ଶୁଭ ଉଦଘାଟନୀରେ ମା ମଝିଘରିଆଣି ମନ୍ଦିରରୁ ଆଜ୍ଞାମାଳ ନେବା ସମୟରେ ଜିଲ୍ଲାପାଳ ଏବଂ ଏସପି କାହିଁକି ନଥିଲେ । ଏହିଭଳି ନାନା ପ୍ରଶ୍ନ ଜନତାଙ୍କ ମନରେ ଉଙ୍କି ମାରୁଛି । ହେଲେ ଉତର ଦେବ କିଏ । ପ୍ରଥମ ଏବଂ ଦ୍ୱିତୀୟ ଦିନର ମୁଖ୍ୟ ଅତିଥି ନଆସିବା ଜିଲା ସଂସ୍କୃତି ପରିଷଦର କାର୍ଯ୍ୟ ଦକ୍ଷତା ଉପରେ ପ୍ରଶ୍ନ ଚିହ୍ନ ଲଗାଇଛି ।
ଜିଲ୍ଲାର ଲୋକ ମହୋତ୍ସବ ଚଇତି ଜିଲ୍ଲାର ଲୋକକଳା , ନୃତ୍ୟ, ସାଂସ୍କୃତିକ କାର୍ଯ୍ୟକ୍ରମ, ଆଦିବାସୀ ପରମ୍ପରା ଆଦିର ମାଧ୍ୟମ ହୋଇଥିବା ବେଳେ ଚଳିତ ଚଇତି ୨୦୨୨ରେ ଚଇତି ମଂଚରେ ଏସବୁ ସ୍ଥାନ ପାଇନାହିଁ । ନିର୍ମାଣ ହୋଇଥିବା ମଂଚରେ କେବଳ ଏଲଇଡ଼ି ଖଞ୍ଜା ଯାଇଛି । ଯାହା କେବଳ ସଂଧ୍ୟା ସମୟରେ ଲୋକଙ୍କ ରଙ୍ଗବେରଙ୍ଗ ଭିଜୁଆଲ ଦେଖାଉଛି । ଉକ୍ତ ମଂଚରେ ପୂର୍ବ ବର୍ଷ ଭଳି ଆଦିବାସୀ ଓ ଡଙ୍ଗରିଆର ପରମ୍ପରାର କୌଣସି କାରୁକାର୍ଯ୍ୟ ହୋଇନାହିଁ । ସେହିଭଳି ଚଳିତ ଚଇତିରେ ବିଭିନ୍ନ ଅବ୍ୟବସ୍ଥା ଦେଖିବାକୁ ମିଳିଛି । ଜିଲାର ୧୧ଟି ବ୍ଲକ ଅଧ୍ୟକ୍ଷ ରହିଥିବା ବେଳେ କେଉଁ କାରଣରୁ କାଶୀପୁର ବ୍ଲକ ଅଧ୍ୟକ୍ଷଙ୍କୁ ଆମନ୍ତ୍ରିତ କରାଯାଇନଥିଲା । ଏନେଇ କାଶୀପୁର ବ୍ଲକ ବାସିନ୍ଦା ରାଜରାସ୍ତାକୁ ଓହ୍ଲାଇ ପ୍ରତିବାଦ କରିବା ପରେ ତାଙ୍କୁ ଆମନ୍ତ୍ରିତ କରାଗଲା ।
କାହା ଇଙ୍ଗିତରେ ଏସବୁ କରାଯାଉଛି ବୋଲି ସାଧାରଣରେ ପ୍ରଶ୍ନବାଚୀ । ସେହିଭଳି ମଂଚକୁ ଆମନ୍ତ୍ରିତ ହୋଇଥିବା ଅତିଥିଙ୍କୁ ମଂଚ ଛାଡ଼ିବାକୁ କୁହାଯାଉଛି । ପରେ ପୁଣି ସେମାନଙ୍କୁ କ୍ଷମା ମାଗି ମଂଚକୁ ଅଣାଯାଉଛି । ଏହିଭଳି ବ୍ୟତିକ୍ରମ ଦେଖିବାକୁ ମିଳିଛି ଚଇତିର ପ୍ରଥମ ଦିନରେ । ମଂଚ ଉପରେ ଆମନ୍ତ୍ରିତ ହୋଇ ବସିଥିବା ରାୟଗଡ଼ା ବ୍ଲକ ଅଧ୍ୟକ୍ଷା ଟୁନି ହୁଇକାଙ୍କୁ ମଂଚ ଛାଡ଼ି ଚାଲିଯିବାକୁ କୁହାଯାଇଥିଲା । ଟୁନିଙ୍କ କହିବାନୁଯାୟୀ, ସେ ଚଇତି ନିମନ୍ତ୍ରଣ ପାଇ ଚଇତି ମଂଚରେ ବସିଥିଲେ । ହେଲେ ଜଣେ ଭଲ୍ୟୁଂଟର ତାଙ୍କୁ ଆପଣଙ୍କ ନିକଟରେ କାର୍ଡ଼ ନାହିଁ, ଆପଣ ଏଠାରୁ ଉଠିଯାନ୍ତୁ ବୋଲି କହିଥିଲେ । ଫଳରେ ଏଭଳି ଅପମାନିତ ହୋଇ ଟୁନି ସେଠାରୁ ଚାଲିଯାଇଥିଲେ । ପରବର୍ତି ସମୟରେ ପ୍ରଶାସନିକ ଅଧିକାରୀ ତାଙ୍କ ପଛେ ପଛେ ଯାଇ ତାଙ୍କୁ କ୍ଷମା ମାଗିବା ସହିତ ପୁଣି ଡାକି ଆଣି ମଂଚରେ ବସାଇଥିଲେ ।
ତେବେ ଟୁନିଙ୍କ କହିବା କଥା ହେଲା କୌଣସି ପଦପଦବୀରେ ନଥାଇ କିଛି ବ୍ୟକ୍ତିବିଶେଷ ମଂଚ ଉପରେ ବସିପାରୁଥବା ବେଳ ନିର୍ବାଚିତ ଜନ ପ୍ରତିନିଧିଙ୍କୁ ଜନତାଙ୍କ ସମ୍ମୁଖରେ କାହା ଇଙ୍ଗିତରେ ଅପମାନିତ କରାଯାଉଛି । ସେହିଭଳି ଚଳିତ ଥର ଚଇତିରେ ଆଦିବାସୀ ପରମ୍ପରାକୁ ନେଇ ମଂଚ ସେମିତି ବିଶେଷ ନିର୍ମାଣ ହୋଇନାହିଁ । କେବଳ ଏଲଇଡ଼ି ଲଗାଇ କାମ ସାରିଦେଇଛନ୍ତି ଆୟୋଜକ ବୋଲି କହିଛନ୍ତି ଟୁନି । ଏଥର ଏମିତି ଆୟୋଜନ ହୋଇଛି ଯେ, କାହାକୁ ଡାକିବେ କାହାକୁ ଡାକିବେନି ଯେମିତ ଆଗରୁ ନିଷ୍ପତି ହୋଇଛି । ସ୍ୱତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ, ଜିଲା ପରିଷଦ ଅଧ୍ୟକ୍ଷ ଆମନ୍ତ୍ରିତ ଥିବା ବେଳେ ସେହି ପରିଷଦର ଉପାଧ୍ୟକ୍ଷଙ୍କୁ ଭୁଲି ଯାଇଛି ଜିଲ୍ଲା ସଂସ୍କୃତି ପରିଷଦ ଏବଂ ଜିଲା ପ୍ରଶାସନ ।
ଜିଲ୍ଲା ପରିଷଦ ଉପାଧ୍ୟକ୍ଷ ସନ୍ତୋଷ ସୁନା ଏବଂ ସ୍ୱତନ୍ତ୍ର ଉନ୍ନୟନ ପରିଷଦ ଉପାଧ୍ୟକ୍ଷ ବନମାଳୀ କାଡ୍ରାକାଙ୍କୁ ନିମନ୍ତ୍ରଣ ହୋଇନାହିଁ । ଏହିସବୁ ଅବ୍ୟବସ୍ଥାକୁ ନେଇ ରାଜନୈତିକ ଦଳ, ସରକାରୀ କର୍ମଚାରି ଟୁପୁରୁଟାପୁରୁ କରୁଥିଲେ ମଧ୍ୟ ମୁହଁ ଖୋଲୁନଥିବା ଦେଖିବାକୁ ମିଳିଛି । ସରକାରୀ କର୍ମଚାରୀଙ୍କୁ ଚାକିରି ଭୟତ ରାଜନୈତିକ କର୍ମୀଙ୍କୁ ଦଳରୁ ନିଲମ୍ବନ ଭୟ । ଯାହା ଚାଲୁଛି ଚାଲୁ, ଅବ୍ୟବସ୍ଥା ଯାହା ହେଉଛି ହେଉ, ଦେଖି ଚାଲିବା କଥା ବୋଲି କିଛି ସରକାରୀ କର୍ମଚାରୀ ପ୍ରକାଶ କରିଛନ୍ତି । ପ୍ରଥମ ଦିନର ସମ୍ମାନିତ ଅତିଥି ଥିଲେ ଯୋଜନା ଓ ସମନ୍ୱୟ ମନ୍ତ୍ରୀ ରାଜେନ୍ଦ୍ର ଢ଼ୋଲକିଆ ମୁହଁ ଦେଖାଇ ଚାଲିଗଲେ । ହେଲେ ଆୟୋଜକଙ୍କୁ ଅପମାନରୁ ରକ୍ଷା କରିଦେଇଛନ୍ତି ଅନୁସୂଚିତ ଜାତି ଓ ଜନଜାତି କଲ୍ୟାଣ ମନ୍ତ୍ରୀ ଜଗନ୍ନାଥ ସାରକା ।
ସଂଧ୍ୟା ୬ଟା ସମୟରେ କାର୍ଯ୍ୟ ଶୁଭାରମ୍ଭ ହୋଇଥିବା ବେଳେ ମନ୍ତ୍ରୀ ରାଜେନ୍ଦ୍ର ଢ଼ୋଲକିଆ ପହଂଚିଥିଲେ ରାତି ପ୍ରାୟ ୧୦.୩୦ ସମୟରେ । ମଂଚକୁ ଆସି ବିଳମ୍ବ ଯୋଗୁଁ କ୍ଷମା ପ୍ରାର୍ଥନା କରି ଅଭିଭାଷଣ ଦେଇ ସର୍କିଟ ହାଉସକୁ ଚାଲିଯାଇଥିଲେ । ସେ ସମୟରେ କେବଳ ହାତଗଣତି ଲୋକ ଚଇତି ପଡ଼ିଆରେ ଥିଲେ । ଯଦି ରାୟଗଡ଼ା ଜିଲ୍ଲାର ଜଣେ ବିଧାୟକ ତଥା ମନ୍ତ୍ରୀ ଜଗନ୍ନାଥ ସାରକା ଆରମ୍ଭରୁ ଶେଷ ପର୍ଯ୍ୟନ୍ତ ରହିନଥାନ୍ତେ ତେବେ ଜିଲ୍ଲାର ପ୍ରସିଦ୍ଧ ଲୋକ ମହୋତ୍ସବ ଚଇତି ଅବସ୍ଥା କଣ ହୋଇଥାନ୍ତା ଏବଂ କିଭଳି ଜନ ଅସନ୍ତୋଷ ଦେଖିବାକୁ ମିଳିଥାନ୍ତା ବୋଲି ଜିଲାସ୍ତରୀୟ ଅଧିକାରୀ ମାନେ ଆଲୋଚନା କରୁଛନ୍ତି । ସେଥିପାଇଁ ମନ୍ତ୍ରୀ ଜଗନ୍ନାଥ ସାରକାଙ୍କୁ ମନେ ମନେ ଧନ୍ୟବାଦ ଦେଇଛନ୍ତି ଆୟୋଜନ କରୁଥିବା ଅଧିକାରୀ ।
ଚଇତି ଓ ପଲ୍ଲୀଶ୍ରୀ ମେଳାରେ ପ୍ରତିବର୍ଷ ଭଳି ପୁସ୍ତକ ମେଳା ଆୟୋଜନ ହୋଇଛି । ହେଲେ ମେଳାରେ ପବ୍ଲିକେଶନଙ୍କୁ ମିଳିଥିବା ଷ୍ଟଲରେ ପୁସ୍ତକ ସଜାଇବାକୁ ସ୍ଥାନ କମ ପଡ଼ୁଛି ବୋଲି କଟକରୁ ଆସିଥିବା ଏକ ପବ୍ଲିକେଶନ କର୍ମଚାରୀ କହିଛନ୍ତି । ଦାୟିତ୍ୱରେ ଥିବା ଶିକ୍ଷା ବିଭାଗର ଦୂରଦୃଷ୍ଟି ଅଭାବ କାରଣରୁ ଏଥର ପୁସ୍ତକ ମେଳାରେ ନିଜ ପସନ୍ଦର ବହି ପାଇପାରୁନାହାନ୍ତି କବି, ଲେଖକ ଏବଂ ଛାତ୍ରୀଛାତ୍ର । ସମସ୍ତେ ନିରାଶ । ପୂର୍ବ ବର୍ଷଗୁଡ଼ିକର ଚଇତିକୁ ଦେଖିଲେ ଚଳିତ ବର୍ଷର ଚଇତି ଫିକା ପଡ଼ିଯାଇଥିବା ନେଇ ଜନସାଧାରଣଙ୍କ ମନକୁ ଦୁଃଖ ଦେଇଥିବା ଦେଖିବାକୁ ମିଳିଛି । ସେହିଭଳି ଚଇତି ପାଇଁ ବିଭିନ୍ନ ସ୍ଥାନରେ ଜଗିଥିବା ପୁଲିସ ଜନସାଧାରଣଙ୍କୁ ଦୁର୍ବ୍ୟବହାର କରୁଥିବା ଅଭିଯୋଗ ହୋଇଛି ।
ରାୟଗଡ଼ା ଜିଲ୍ଲା ଲୋକ ମହୋତ୍ସବ ଚଇତି ପାଳନ ପାଇଁ ପୁଲିସ ଅଧିକାକାରୀ ସୁରକ୍ଷା ନାମରେ ଲୋକଙ୍କୁ ଦୁର୍ବ୍ୟବହାର ପ୍ରଦର୍ଶନ କରୁଥିବା ଜନସାଧାରଣଙ୍କ ମହଲରେ ଅସନ୍ତୋଷ ଅଭିଯୋଗ ହୋଇଛି। ବରିଷ୍ଠ ନାଗରିକ ଓ ପୂର୍ବତନ ସୈନିକ ପୁଲିସ ନାଲି ଆଖିରୁ ବାଦ୍ ପଡିନାହାନ୍ତି। ଯାହାକୁ ସାଧାରଣରେ ନିନ୍ଦା କରାଯାଇଛି। ପୂର୍ବରୁ ଟ୍ରାଫିକ ନିୟନ୍ତ୍ରଣ ଓ ପାର୍କିଂ ପାଇଁ ନାନା ବ୍ୟବସ୍ଥା କରିଥିବା ସୂଚନା ପୁଲିସ ତରଫରୁ ଦିଆଯାଇଥିଲା। ହେଲେ ବାସ୍ତବତା କିନ୍ତୁ ସମ୍ପୂର୍ଣ୍ଣ ଭିନ୍ନ। ଲୋକଙ୍କ ସୁରକ୍ଷା ଅପେକ୍ଷା ସରକାରୀ ବାବୁ ମାନଙ୍କ ପାଇଁ ୯ ପ୍ଲାଟୁନ ଫୋର୍ସ ମୁତୟନ କରାଯାଇଛି। ୮ ଜଣ ଡିଏସପି ଓ ୧୩ ଜଣ ଇନ୍ସପେକ୍ଟର କେବଳ ଏହି କାମରେ ନିୟୋଜିତ ହୋଇଛନ୍ତି। ହେଲେ ଲୋକଙ୍କ ପାଇଁ ନିୟୋଜିତ ପୁଲିସ ଲୋକପର୍ବରେ ଲୋକଙ୍କୁ ଦୁର୍ବ୍ୟବହାର କରିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇଛି। ଆଗାମୀ ତିନି ଦିନ ପୁଲିସ ନିଜର ବ୍ୟବହାରରେ ପରିବର୍ତ୍ତନ ଆଣିବା ଆବଶ୍ୟକ ବୋଲି ନିବେଦନ କରିଛନ୍ତି ସାଧାରଣ ଲୋକ।
