୧୭ ଜାନୁଆରୀ ମଙ୍ଗଳବାର,୨୦୨୩ ( ଓଡ଼ିଶା ତାଜାନ୍ୟୁଜ ) କଟକ :- କଟକ ସଦର ୪୨ମୌଜା ସ୍ଥିତ ସର୍ବ ପୁରାତନ ତଥା ବ୍ୟସ୍ତ ବହୁଳ ବେଣ୍ଟକାର ଡାକଘରେ ଥିବା ହୋଣ୍ଡା କମ୍ପାନୀର (ଇଏକ୍ସକେ ୨୮୦୦) ୨୨୦ ଭୋଲଟ୍ ଜେନେରେଟରଟି ଆଜକୁ ଦୀର୍ଘ ୪ମାସ ହେବ ଅକାମୀ ହୋଇ ସେବା କାର୍ଯ୍ୟରେ ଆସୁନାହିଁ । ୪୨ମୌଜା ସ୍ତରରେ ବିଦ୍ୟୁତ୍ ବିଭାଗ ଦ୍ଵାରା ବିଦ୍ୟୁତ ସଂପ୍ରସାରଣ ଓ ମରାମତି କାର୍ଯ୍ୟ ବୃଦ୍ଧି ପାଇଥିବାରୁ ପ୍ରତି ମାସରେ ଦୁଇଦିନ ସକାଳ ୯ରୁ ଅପରାହ୍ନ ୪ ଘଟିକା ପର୍ଯ୍ୟନ୍ତ ବିଦ୍ୟୁତ୍ କାଟ୍ ହେଉଅଛି । ଏପରି କେତେଥର ଘଟିଛି ଯେଉଁଦିନ ଡାକଘରେ ଦିନ ତମାମ ଲିଙ୍କ୍ ନଥିବା ହେତୁ ସେବା ବନ୍ଦ ଥିଲା ଓ ଠିକ୍ ତା ପର ଦିନ ଦିନଭରି ବିଦ୍ୟୁତ୍ କାଟ୍ ହୋଇ ଡାକ ସେବା ଲଗାତାର ଦୁଇଦିନ ବନ୍ଦଅଛି ।
ଏତତବ୍ୟତୀତ ଏହି ଉପ ଡାକଘର ଅଧୀନରେ ୫ଗୋଟି ଶାଖା ଯଥା ଝିଙ୍କିରିଆ,ଦଧିବାମନପୁର, କଳପଡା, କୁଳସରିଚୁଆଁ ଓ ଝାରକଟା ବ୍ରାଞ୍ଚ ପୋଷ୍ଟ ଅଫିସ କାର୍ଯ୍ୟ କରୁଅଛି । ବେଣ୍ଟକାର ଉପ ଡାକଘର କାର୍ଯ୍ୟ ବ୍ୟାହତ ହେଲେ ଏ ୫ ଗୋଟି ବ୍ରାଞ୍ଚ ପୋଷ୍ଟ ଅଫିସ ସ୍ଵାଭାବିକ ଭାବେ ଅଚଳ । ଏ ବାବଦରେ କଟକ ନଗର ମଣ୍ଡଳର ବରିଷ୍ଠ ଡାକ ଅଧିକ୍ଷକଙ୍କୁ ତାଙ୍କ ଅଫିସ ଯୋଗାଯୋଗ ନମ୍ୱର୍ ୦୬୭୧-୨୩୦୪୧୫୧ ରେ ଯୋଗାଯୋଗ କରାଯାଇଥିଲେ ମଧ୍ୟ କୌଣସି ଉତ୍ତର ମିଳି ପାରି ନଥିଲା । ଏଣୁ ବିଭାଗୀୟ ଉଚ୍ଚ କର୍ତ୍ତୁପକ୍ଷ ଏହି ଘଟଣାକୁ ଗୁରୁତର ସହ ବିଚାରକୁ ନେଇ ସଂପୃକ୍ତ ଜେନେରେଟର ଟିକୁ ତୁରନ୍ତ କାର୍ଯ୍ୟକ୍ଷମ କରାଇଲେ ୪୨ମୌଜା ଅଞ୍ଚଳବାସୀ ବିଶେଷ ଉପକୃତ ହେବେ ବୋଲି ୪୨ମୌଜା ବିକାଶ ପରିଷଦ ଉପଦେଷ୍ଟା ତଥା ୪୨ମୌଜା ଯାଦବ ମହାସଭା ସଭାପତି ବୁଲେଇ ବେହେରା ପ୍ରେସ୍ ବିବୃତିରେ ଜଣାଇଛନ୍ତି ।
