୧୩ ଜାନୁଆରୀ ଶୁକ୍ରବାର୨୦୨୩ ( ଓଡ଼ିଶା ତାଜାନ୍ୟୁଜ ) କନ୍ଧମାଳ :- କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଫିରିଙ୍ଗିଆ ଗୋଛାପଡା ରାସ୍ତାର ବାଲିପଦର ଡମପିଡ଼ିଆ ଗାଁ ନିକଟ ରାସ୍ତାରେ ଏକ ବାଇକ ଜଣେ ବୃଦ୍ଧାଙ୍କୁ ଧକ୍କା ଦେଇଥିଲା । ଏହି ଦୁର୍ଘଟଣାରେ ବୃଦ୍ଧା ଜଣକ ଗୁରୁତର ଆହତ ହୋଇ ଥିଲେ । ସେହିପରି ବୃଦ୍ଧାଙ୍କୁ ଦୁର୍ଘଟଣା ଘଟାଇଥିବା ବାଇକ ଆରୋହୀ ମଧ୍ୟ ଆହତ ହୋଇଥିବା ସୂଚନା ମିଳିଛି । ଗୁରୁତର ଆହତ ହୋଇଥିବା ବୃଦ୍ଧା ଜଣକ ପଲାବ୍ରୁଡି ପଞ୍ଚାୟତ ଅନ୍ତର୍ଗତ ଡମପିଡିଆ ଗାଁର ସୁକାନ୍ତି ମଲିକ ଓ ତାଙ୍କର ବୟସ ୬୦ ବର୍ଷ ବୋଲି ଜଣାପଡିଛି। ଦୁର୍ଘଟଣା ଘଟାଇ ଥିବା ବାଇକ ଆରୋହୀ ଦୁଇଜଣ ବି ପଲାବ୍ରୁଡି ପଞ୍ଚାୟତ ରାଣୀମିଲକା ଗାଁ ର ଅଜୟ ନାୟକ ଓ ସୁଜିତ ନାୟକ ବୋଲି ଜଣାପଡିଛି ।
ସୂଚନା ଅନୁସାରେ ଫିରିଙ୍ଗିଆରୁ ଏକ ବାଇ ରେ ଦୁଇ ଜଣ ଯୁବକ ନିଜ ଗାଁ ରାଣୀମିଲକାକୁ ଯାଉ ଥିଲେ । ଡମପିଡିଆ ଗାଁ ନିକଟରେ ବୃଦ୍ଧା ଜଣକ ରାସ୍ତା କଡରେ ଥିବା ନିଜ ଘର ସମୁଖରେ ଠିଆ ହୋଇଥିଲେ। ବାଇକଟି ବୃଦ୍ଧାଙ୍କୁ ଧକ୍କା ଦେବା ପରେ ବାଇକରେ ବସିଥିବା ସେହି ଦୁଇଜଣ ଯୁବକ ଛିଟିକି ପଡ଼ିଥିଲେ । ଦୁର୍ଘଟଣା ପରେ ସ୍ଥାନୀୟ ଲୋକେ ଫିରିଙ୍ଗିଆ ଅଗ୍ନିଶମ ବାହିନୀଙ୍କୁ ଯୋଗାଯୋଗ କରିଥିଲେ ।
ଘଟଣା ସ୍ଥଳରେ ଦମକଳ ବାହିନୀ ପହଂଚି ଆହତ ବାଇକ ଆରୋହୀ ଓ ଗୁରୁତର ଆହତ ହୋଇଥିବା ବୃଦ୍ଧା ଙ୍କୁ ଉଦ୍ଧାର କରି ଫିରିଙ୍ଗିଆ ମେଡିକାଲକୁ ଆଣିଥିଲେ । ଗୁରୁତର ଆହତ ହୋଇଥିବା ବୃଦ୍ଧାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଫିରିଙ୍ଗିଆରୁ ଫୁଲବାଣୀ ଜିଲା ମୁଖ୍ୟଚିକିତ୍ସାଲୟକୁ ସ୍ଥାନାନ୍ତର କରାଯାଇଛି । ଅନ୍ୟପଟେ କନ୍ଧମାଳ ବିଜେପିର ଜିଲା ଯୁବମୋର୍ଚା ସଭାପତି ଗୋଲକ କହଁର ଓ ଫିରିଙ୍ଗିଆ ବିଜେପି ବ୍ଲକ ସଭାପତି ଗଣେଶ ସାହୁ ମେଡିକାଲରେ ପହଞ୍ଚି ଆହତ ଓ ଗୁରୁତର ଲୋକଙ୍କ ସ୍ୱାସ୍ଥ୍ୟବସ୍ଥା ବୁଝିଥିବା ଜଣାପଡ଼ିଛି । 
