ବିଜେଡିର ୨୬ ତମ ପ୍ରତିଷ୍ଠା ଦିବସରେ ମାହାଙ୍ଗାରେ ପ୍ରତାପଙ୍କ ଶକ୍ତି ପ୍ରଦର୍ଶନ !

ବିଧାୟକ ପ୍ରତାପ ଜେନା କହିଲେ -ମାହାଙ୍ଗାର ସର୍ବାଙ୍ଗୀନ ବିକାଶ ପାଇଁ ଆମେ ନିଜକୁ ନେତା ବୋଲି ପରିଚୟ ଦେବା ଅପେକ୍ଷା, କିପରି ଅଧିକରୁ ଅଧିକ ବିକାଶ ମୂଳକ କାର୍ଯ୍ୟ ହୋଇପାରିବା, ସେ ଦିଗରେ ଅଧିକ ଧ୍ୟାନ ଦେବାକୁ ପଡିବ ବୋଲି ଶ୍ରୀ ଜେନା ଯୁବକ ମାନଙ୍କୁ ଆହ୍ୱାନ ଦେଇଥିଲେ l 

୪ ଜାନୁଆରୀ ବୁଧବାର୨୦୨୩ ( ଓଡ଼ିଶା ତାଜା ନ୍ୟୁଜ ) ମାହାଙ୍ଗା :-ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଶାସକ ବିଜୁ ଜନତା ଦଳ ଶ୍ରୀକ୍ଷେତ୍ର ପୁରୀ ଠାରେ ଦଳର ୨୫ ତମ ପ୍ରତିଷ୍ଠା ଦିବସ ଆୟୋଜନ କରିସାରିଛି  l ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶଙ୍ଖ କ୍ଷେତ୍ରରୁ ନିର୍ବାଚନୀ ବିଗୁଲ ବଜେଇ ସାରିଥିବା ବେଳେ,ମାହାଙ୍ଗା ନିର୍ବାଚନ ମଣ୍ଡଳୀର ଜବାହରଲାଲ ନେହେରୁ କଲେଜ ପଡିଆରେ ଆଜି ଦଳର ଏକ ବିଶାଳ ଜନସଭା ଅନୁଷ୍ଠିତ ହୋଇଯାଇଛି lଏହି ସଭାରେ ଦଳର ରାଜ୍ୟ ସ୍ତରୀୟ ବହୁ ବରିଷ୍ଠ ନେତୃ ମଣ୍ଡଳୀ ଯୋଗଦେଇ ନବୀନ ବାବୁଙ୍କୁ ରାଜ୍ୟର ଅଦ୍ୱିତୀୟ ଜନପ୍ରିୟ ନେତା ଭାବେ ପ୍ରଶଂସା କରିବା ଶହ ତାଙ୍କୁ ବିକାଶ ପୁରୁଷ ଭାବେ ଚିତ୍ରଣ କରିବା ଦେଖିବାକୁ ମିଳିଥିଲା l ମାହାଙ୍ଗା ବ୍ଲକ ବିଜେଡି ସଭାପତି ରାଜକିଶୋର ଜେନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଜନ ସଭାରେ ପୂର୍ବତନ ସାଂସଦ ପ୍ରସନ ପାଟ୍ଟସାହାଣୀ, ପୂର୍ବତନ ମନ୍ତ୍ରୀ ପ୍ରଫୁଲ୍ଲ ଘଡେଇ, ପୂର୍ବତନ ବିଧାୟକ ଦେବାଶିଷ ସାମନ୍ତରାୟ,ବିଧାୟକ ପ୍ରଶାନ୍ତ କୁମାର ବେହେରା, ପୂର୍ବତନ ମନ୍ତ୍ରୀ ତଥା ସ୍ଥାନୀୟ ବିଧାୟକ ପ୍ରତାପ ଜେନା ପ୍ରମୁଖ ବରିଷ୍ଠ ନେତାମାନେ ଯୋଗଦେଇ ନବୀନ ବାବୁଙ୍କ ନେତୃତ୍ୱରେ ବିଜୁ ଜନତା ଦଳର 25 ବର୍ଷର ବିକାଶ ମୂଳକ ଶାସନ ଇତିହାସ ସୃଷ୍ଟି କରିଛି ବୋଲି କହିଥିଲେ l ଶିକ୍ଷା, ସ୍ୱାସ୍ଥ୍ୟ, ଗମନା ଗମନ, ବିଜୁଳୀ,ପିଇବା ପାଣି,କୃଷି ଓ କୃଷକର ଉନ୍ନତି ସାଙ୍ଗକୁ ମହିଳା ସଶକ୍ତିକରଣ କ୍ଷେତ୍ରରେ ନବୀନ ବାବୁଙ୍କ ନିରବଛିନ୍ନ ସଫଳତା ତା’ଙ୍କୁ ଦେଶର ଶ୍ରେଷ୍ଠ ମୁଖ୍ୟମନ୍ତ୍ରୀ ଭାବେ ସ୍ୱୀକୃତି ଦେଇଛି ବୋଲି ଦଳର ବରିଷ୍ଠ ନେତାମାନେ ମତବ୍ୟକ୍ତ କରିଥିଲେ lମାହାଙ୍ଗାର ଅଦ୍ୱିତୀୟ ନେତା ତଥା ସର୍ବାଧିକ ଭୋଟ ବ୍ୟବଧାନରେ ଲଗାରତ ୩ ଥର ଜିତି ମନ୍ତ୍ରୀ ମଣ୍ଡଳରେ ସ୍ଥାନ ପାଇବାରେ ଓ ମୁଖ୍ୟମନ୍ତ୍ରୀଙ୍କ ବିଶ୍ୱାସ ଜିଣି ଦଳର ସାଙ୍ଗଠନିକ ଦାୟୀତ୍ୱ ସଫଳତାର ସହିତ ନିର୍ବାହ କରିଆସୁଥିବା ବିଧାୟକ ପ୍ରତାପ ଜେନାଙ୍କ ପଛରେ ମାହାଙ୍ଗାବାସୀଙ୍କ ଦୃଢ ଭାବେ ଛିଡା ହେବା ଓ ତାଙ୍କ ପ୍ରତି ବିପୁଳ ସମର୍ଥନ ରହିବା ଆଜିର ଜନ ସମାବେଶରୁ ବାରିହୋଇ ପଡିବା କୁହାଯାଉଛି l  ମାହାଙ୍ଗାରେ ବିରୋଧୀ ବିଜେପି ଓ କଂଗ୍ରେସର  ଦୁର୍ବଳ ନେତୃତ୍ବ ସାଙ୍ଗକୁ, ସେମାନଙ୍କ ପ୍ରସଙ୍ଗହୀନ ରାଜନୀତି ଠାରୁ ଲୋକେ ମୁହଁ ଫେରାଇ ନେଉଥିବାରୁ ଏହା ବିଜେଡ଼ିକୁ ବେଶ ମଜଭୁତ ସ୍ଥିତିରେ ରଖିବା କଥା ଦଳର ବରିଷ୍ଠ ନେତାମାନେ କହିଥିଲେ lମାହାଙ୍ଗା ନିର୍ବାଚନ ମଣ୍ଡଳୀରେ ପ୍ରତାପ ଜେନାଙ୍କ ସାଙ୍ଗଠନିକ ବିଚକ୍ଷଣତା ସାଙ୍ଗକୁ,ସବୁ ବର୍ଗର ଲୋକଙ୍କ ଦ୍ୱାରା ସେ ଗ୍ରହଣୀୟ ହୋଇପାରିବା ଯେତିକି ଗୁରୁତ୍ୱପୂର୍ଣ୍ଣ,ବିଜୁ ବାବୁଙ୍କ ପଟ୍ଟଶିଷ୍ୟ ଭାବେ ଶ୍ରୀ ଜେନା ନବୀନ ପଟ୍ଟନାୟକଙ୍କ ଆସ୍ଥା ଓ ବିଶ୍ୱାସ ଜିତିବାରେ ବିଜେଡିରେ ଚର୍ଚ୍ଚିତ ଯୁବ ଚେହେରା ବୋଲି ଦଳର ପୁରୁଖା ନେତା ତଥା ପୂର୍ବତନ ମନ୍ତ୍ରୀ ପ୍ରଫୁଲ୍ଲ ଘଡେଇ ମତବ୍ୟକ୍ତ କରିଥିଲେ lଦଳୀୟ ପ୍ରତିଷ୍ଠା ଦିବସ ପାଳନ ନାଆଁରେ ମାହାଙ୍ଗାରେ ପ୍ରତାପଙ୍କ ନିର୍ବାଚନୀ ରଣ ହୁଙ୍କାର ବିରୋଧୀଙ୍କ ପାଇଁ ଖୋଲା ଆହ୍ୱାନ ସୃଷ୍ଟି କରିବା ବକ୍ତାମାନେ ଆହ୍ୱାନ ଦେଇଥିଲେ l ଏହି ସମାବେଶରେ ହଜାର ହଜାର ମହିଳା,ଛାତ୍ର,ଯୁବକ, କୃଷକ, ବୁଦ୍ଧିଜୀବୀ ଓ ସାଧାରଣ ଜନତାଙ୍କ ଯୋଗଦାନ ନବୀନ ପଟ୍ଟନାୟକଙ୍କ ପ୍ରତି ସେମାନଙ୍କ ଅତୁଟ ଜନ ସମର୍ଥନ ବୋଲି ପୂର୍ବତନ ସାଂସଦ ତଥା ଦଳର ପୁରୁଖା ନେତା ଡକ୍ଟର ପ୍ରସନ୍ନ ପାଟ୍ଟସାହାଣୀ କହିଥିଲେ l

ଏହି ସଭାରେ ବିଧାୟକ ପ୍ରତାପ ଜେନା କହିଲେ -ମାହାଙ୍ଗାର ସର୍ବାଙ୍ଗୀନ ବିକାଶ ପାଇଁ ଆମକୁ ସଂକଳ୍ପ ନେବାକୁ ପଡିବ l ବିଜୁ ଜନତା ଦଳରେ ଜଣେ ସମର୍ପିତ ସେବକ ଭାବେ କାର୍ଯ୍ୟ  କରିବାରେ ମୁଁ’ ବିଶ୍ୱାସ କରେ ବୋଲି ସେ କହିଥିଲେ l ନବୀନ ବାବୁ ଆମ ନେତା, ସାଢେ ଚାରି କୋଟି ଓଡିଶା ବାସୀଙ୍କ ସାମୁହିକ ବିକାଶ ପାଇଁ ଯେଉଁ ମୁଖ୍ୟମନ୍ତ୍ରୀ ଅନବରତ କାର୍ଯ୍ୟ କରୁଛନ୍ତି, ତା’ଙ୍କ ବାପା ପ୍ରବାଦ ପୁରୁଷ ବିଜୁବାବୁଙ୍କ ଆଦର୍ଶରେ ଅନୁପ୍ରାଣିତ ହୋଇ ଛାତ୍ରଜୀବନରୁ ସମାଜସେବା ଓ ରାଜନୀତିରେ ରହିବା ମୋ’ ପାଇଁ ପରମ ସୌଭାଗ୍ୟ ବୋଲି ପ୍ରତାପ କହିଥିଲେ l