୨୫ ନଭେମ୍ବର ଶୁକ୍ରବାର (ଓଡ଼ିଶା ତାଜାନ୍ୟୁଜ )ଆର. ଉଦୟଗିରି :- ରାଜ୍ୟ ଓ କେନ୍ଦ୍ର ସରକାରଙ୍କ ଆଦିବାସୀ ଅଞ୍ଚଳର ବିକାଶ ପାଇଁ ମାଳମାଳ ଯୋଜନା । ହେଲେ ଏବେବି ଏମିତି ଗାଁ ରହିଛି ଯେଉଁଠି ରାସ୍ତା ଓ ପାନୀୟ ଜଳ ଭଳି ମୌଳିକ ସୁବିଧା ପହଞ୍ଚାଇବାରେ ଯେମିତି ଅସମର୍ଥ ପ୍ରଶାସନ । ସେଭଳି କିଛି ଗାଁ ରହିଛି ମୋହନା ବ୍ଲକରେ । ଗୋଟିଏ ପଟେ ଦୁର୍ଗମ ରାସ୍ତା ଅନ୍ୟ ପଟେ ପାନୀୟ ଜଳର ଉତ୍କଟ ଅବ୍ୟବସ୍ଥା । ରାସ୍ତା ସାରା ଖାଲଖମା ହୋଇଥିବା ବେଳେ କେଉଁଠି ବାହାରି ରହିଛି ଵଡ଼ଵଡ଼ ପଥର ତ ରାସ୍ତାର ଉଭୟ ପାର୍ଶ୍ଵରେ ଲଟାବୁଦା ମାଡି ଗଲାଣି । ଅନ୍ୟ ପଟେ ମହିଳା ମାନେ ଚହଲା ପାଣିକୁ ଛାଣି ଆଣୁଛନ୍ତି । ଏହା ହେଉଛି ମୋହନା ବ୍ଲକର ସୁବ୍ଯବସ୍ଥା ।
ଗାଁ ଲୋକେ ସ୍ୱାସ୍ଥ୍ୟ ସେବା ପାଇଁ ଚନ୍ଦ୍ରଗିରି ଡାକ୍ତରଖାନା ଓ ପ୍ରାଥମିକ ଶିକ୍ଷା ପାଇଁ ଛାତ୍ର ଛାତ୍ରୀମାନେ ଡରାବ ଗାଁ ଏବଂ ବଜାରବାଟ ଏବଂ ଚାଉଳ, କିରୋସିନି ପାଇଁ ଜିରାଙ୍ଗ ପଞ୍ଚାୟତ ଉପରେ ନିର୍ଭର କରନ୍ତି । ଖରାଦିନେ ଯେନତେନ ପ୍ରକାରେ ଲୋକେ ଯାତାୟତ କରନ୍ତି । କିନ୍ତୁ ବର୍ଷା ଦିନେ ଏହି ରାସ୍ତାରେ ଚାଲି ଚାଲି ଯିବା ମଧ୍ୟ କଷ୍ଟ ସାଧ୍ଯ। ଗାଁ ରାସ୍ତାକୁ ପକ୍କା ସଡ଼କ ନିର୍ମାଣ କରାଯାଉନଥିବାରୁ ବର୍ଷା ସମୟରେ ଗାଁରେ ପହଞ୍ଚି ପାରୁନି ଆମ୍ବୁଲାନ୍ସ । ଯାହାଫଳରେ ଜରୁରୀକାଳୀନ ଚିକିତ୍ସା ପାଇଁ ଗାଁର ଅସୁସ୍ଥ ରୋଗୀଙ୍କୁ ଖଟିଆରେ କିମ୍ଵା ଦୋଳା କରି ବୋହି ନେବା ପାଇଁ ଲୋକେ ବାଧ୍ୟ ହେଉଛନ୍ତି ।
ସେହି କୂଅରେ ଅରଟ ଖଣ୍ଡିଏ ମଧ୍ୟ ନାହିଁ । ଅରଟ ସ୍ଥାନରେ ବ୍ୟବହାର ହେଉଛି ତିନି ଖଣ୍ଡ କାଠ । ସେହି କୂଅର ଦୂଷିତ ଜଳକୁ ପାନୀୟ ଜଳ ରୂପେ ବ୍ୟବହାର କରନ୍ତି ଗ୍ରାମବାସୀ । ହେଲେ ତାହା ବି ଗାଁ ପାଇଁ ନିଅଣ୍ଟ । ତେଣୁ ଲୋକେ ଆବଶ୍ୟକ ସ୍ଥଳେ ଗାଁ ନିକଟରେ ଥିବା ଚୁଆଁର ଚହଲା ପାଣିକୁ ଛାଣି ଆଣି ବ୍ୟବହାର କରିବା ପାଇଁ ବାଧ୍ୟ ହେଉଛନ୍ତି । ଫଳରେ ଲୋକେ ପେଟ ଜନିତ ବିଭିନ୍ନ ରୋଗରେ ଆକ୍ରାନ୍ତ ହେଉଥିବା କହିଛନ୍ତି ଗ୍ରାମର ମହିଳା ।
କିନ୍ତୁ ପାନୀୟ ଜଳ ଓ ରାସ୍ତାର ସୁବିଧା ପାଇଁ ସରକାରଙ୍କୁ ଗୁହାରି କରୁଥିଲେ ମଧ୍ୟ କେହି ଶୁଣୁନଥିବା ଅଭିଯୋଗ କରିଛନ୍ତି ଗ୍ରାମର ରାଜେଶ୍ଵରୀ ଶବର, କୌଶଲ୍ୟା ଶବର, ରାମୁଲୁ ଶବର, ଗଣେଶ ଶବର ଓ ଗ୍ରାମ ଏନେଇ ଜିରାଙ୍ଗ ପଞ୍ଚାୟତ ସରପଞ୍ଚ ପଦ୍ମିନୀ ଶବର କହିଛନ୍ତି ଏହି ଆର୍ଥିକ ବର୍ଷରେ ଶବରସାହି ପାଇଁ ପାନୀୟ ଜଳ ଓ ରାସ୍ତାନିର୍ମାଣ ପାଇଁ ଏକ୍ସନ୍ ପ୍ଲାନ୍ ରଖାଯାଇଛି ଡିସେମ୍ବର ମାସ ସୁଦ୍ଧା କାର୍ଯ୍ୟ ଆରମ୍ଭ କରାଯିବ ।
